1 Imwe abhagaraatiya mobhere bhageege heene! morogirwe na weewe? nebheerekirye habhwero keno chagirirye Yeesu Kiriisito akakwa komosarabha. 2 Nango nerasabha komenya kegero kemwe. mokasong`aana Ekoro endendu ku kugwata imigiro ja Musa, hamwe ne-ko kobha mukiitengeerera na kwisirirya engana inzomu igoro wa Yeesu? 3 Kwake mobheere bhagegebhu? Imwe mokotanga ubhwikari bhwanyu ubhuhya komanaga ge Ekoro endendu, nawe moreenda komara komanaga gaanyu imubheene? 4 Nango, enyaako yeno yaabhabhwene, morakina yaare bhooha? etare bhooha! 5 Momboorere, Mungu abhaheere Ekoro endendu na kokora ebhesego gate waanyu ko kobha mukagwata imigiro ja Musa, Kisha ko kobha mukiitegerera na kwisirirya eng`ana enzomu igoro wa Yeesu? 6 Mwisege eng`ana ya Abhurahaamu. Amaandeko Amarendu garabhuga, " Abhuraahahu akisirirya Mungu, na Mungu akamobhara kobha we eheene." 7 Mmbe nango, momenye kobha, abhaato bhano bhakwisirirya Mungu, nebho abhana bha Abhurahaamu! 8 Amaandeko Amarendu gakorootorera kobha, Mungu arabhabharera abhaato bhano bhatare Abhayaahudi kobha bhe eheene konzera yu ubhwisirirya bhwabhu. Mungu aakangatire komoragan`ya Abhurahaamu eng`ana enzomu yeyo kobha "kohetera kwa naawe, abhaato bhi ibhyaro bhyosi bharahakwa." 9 Mmbe, bhano bhakumwisirirya Mungu, bharahaabhwa orobhango, chembu Abhurahaamu aahakirwe ko kobha akiisirirya. 10 Nawe bhoosi bhano bhakwisega kokora gano gakwenderwa ni imigiro ja Musa, bhiihiimirwe, ko kobha Amaandeko Amaandeko Amarendu garabhuga, "Wowoosi wono atakugwatwa na kokora goosi gano gaandikirwe mokitabho chi imigiro, ihiimirwe." 11 Ni-maheene kobha atareeho omooto wono akobharwa kobha we eheene mobhotange bhwa Mungu ku ukugwata imigiro, ko kobha Amaandeko Amarendu garabhuga, "We eheene, ariikara kubhwisirirya." 12 Imigiro gitakwisega ubhwisirirya, nawe amaandeko Amarendu garabhuga,"omooto wono akogwata goosi gano gari mumigiro, ariikara ku kugwata imigiro giyo." 13 Kiriisito akatosabhura kurwa momaraga gi imigiro ko kogega amaraga geeto. Amaandeko Amarendu garabhuga, "wowoosi wono abhambirwe komosarabha, ihiimirwe." 14 Akatosabhura korereke orobhango rono aaheerwe Abhurahaamu, robhahikere abhaato bhano bhatare Abhayaahudi kohetera Yeesu Kiriisito. Toratora kosong`aana Ekoro endendu yeno Mungu aatoragire konzera yu ukwisirirya Yeesu Kiriisito. 15 Abhahiiri bhaane, hinga nihuruche ekerenjo kurwa mubhwikari bhweto bhwa kirakabhu. Mwiseege igoro wa amiisiriran`yo ga abhaato bhabhere. Amiisiriran`yo gareemere kokorwa na kutuurwa orokaamo, atareeho omooto wa kwanga hamwe kwongera chochosi. 16 Mmbe, Mungu akahurucha obhorage kwa Abhurahaamu, hamwemwe nu umwibhurwa waaze. Amaandeko Amsrendu gatakubhuga, "Kuribhorwa bhaaze nkina bhnaaru," Nawe garabhuga, "Nu umwibhurwa waaze," enzobhooroyaku, ni-womwee, nawe ni-Kiriisito. 17 Reno nikwenda kogamba ni-reno, Mungu akakora rirage ryaze reno aamenyekereerye imyaka magana ane ne emerongo etato, hano emigiro ja Musa jare gekeere kobhoha. Imigiro giyo getakotora kusarya rirage riyo nooro kuchora obhorage bhuyo. 18 Nawe areebhe 0bhogabhi bhwabhu kurwa kwa Mungu bhuriisega imigiro, mmbe obhogabhi bhuyo bhotakotora naatu kwisega obhorage bhwa Mungu. Newe Mungu, korobhango rwaze, akamoha Abhurahaamu obhogabhi konzerayo obhoragi bhwaze. 19 Nango, imigiro gena meremoke? Imigiro gekoongerwa igoro wu ukwerecha obhosarya bhwa abhaato, kuhika hano araaze umwibhurwa wa Abhurahaamu, wono Mungu aaragen`ye kobha araaza. Imigiro giyo, Mungu akomoha Musa kohetera bhamaraika, Musa akabha umwigwan`ya wa abhaato na Mngu. 20 Umwigwan`ya aheenderwa hano zembaara ibhere zikurya ering`a. Nawe Mungu ne-womwe, akarya iring`a umwene na Abhurahaamu. 21 Nango, imigiro gerahakaana no obhorage bhwa Mungu? Zeyi! Angabheere gihurukibhwe imigiro geno gekotara kobhaha abhaato obhohoru, mmbe tware torabharwa bhe eheene mobhotange bhwa Mungu ku ukugwatwa imigiro. 22 Nawe etaribhu. Amaandeko Amarendu garabhuga kobha, eese yoosi egwatirwe mobhokangati bhwo obhobhi, korereke bhano bhamwisirirya Yeesu Kiriisito bhahaamwe rirage reno Mungu aare arageen`ye. 23 Hano ribhaga ryu ukwisirirya Yeesu Kiriisito ryare rekeere kuhika. tware turiimiiririrwa ni imigiro ja Musa, ncha abhabhohwa. Tware tprarenda ribhaga reno ubhwisirirya bhuyo bhiukundukurwe. 24 Kwebhu imigiro jare geretokangata, kuhika hano Kiriisiti iizire, korereke tobharirwe eheene mobhotange bhwa Mungu konzera ua ubhwusirirya. 25 Nawe nango, ko kobha ubwisirirya bhuhikire, totare naatu iyaase wi imigiro. 26 Nango imwe bhoosi, ni-bhaana bha mungu Mungu ku ubhwisirirya bhwanyu, ko kobha mugwateene na Kiriisito. 27 Imwe bhoosibhano mubhatizirwe, mugwateeni na Kiriisito. 28 Nango, kotareeho kwahokan`ya gate ya omoyaahudi na wono atare omoyaahudi, mbuusa nu umwiyagaaruri, umusubhe no omokari. Bhoosi moreng`eene, ko kobha mugwateene na Yeesu Kiriisito. 29 Imwe, ne-bha Kiriisito na konzera yiyo mobheere urwibhoro rwa Abhurahaamu, na morasung`aana ubhiugabhi bhono Mungu aarageen`ye.