¹ Ebiro ka byahingwire bike Yesu akagaruka Kapernaumu, kimanyika okwo yaizire, ali omuka. ² Abantu bangi bashomboka baburwa n'obwikaro, nangu n'aha mulyango chei; mara abarangira ekigambo. ³ Abandi baija bamuletera Yesu omuntu ayabaire akabaire orubaju, ashutwirwe abantu bane. ⁴ Kababuzirwe agamugobya ahali Yesu aharw'obungi bw'abantu, balengelera mbali ali bashakarura oruswi. Orwo bamazire kutema ekihuru bamusongora bamutaire aha machera ago wenene ogwo ayabaire akabire orubaju yabaire abyamireho. ⁵ Kayaboine omwesigo gwabo, Yesu amugambira ayabaire akabire orubaju '' mwanawange, entambara zawe zaganyirwa." ⁶ Ahonu abegesa b'Amateka abandi bashangwa bashuntamireho, nibebaza aha mutima bati, ⁷ “Ahakubaki omuntu ogu nagamba ati? Yarogota! Ayakugarulira amafu n'ohai atali Katonda wenkai?” ⁸ Yesu ayanguha akenga omu mwoyo okwo abantu aba balikwebaza batyo aha mutima, na wenene ababaza ati, “Kiki kwebaza mutyo aha mutima? ⁹ Ekyorobire kushaaga ni kihai, kugambira akabire orubaju nti, ‘Wagarulirwa amafu gawe,’ anga kugamba nti, ‘Imuka, okwate amachera gawe otambuke?’ ¹⁰ Chonka mumanye okwo Omwana w'Omuntu omu nsi aina obushobora bw'okugarulira amafu,” nagambira akabire orubaju ati, ¹¹ “N'inye ndikukugambira, imuka, kwata amachera gawe ogye omuka.” ¹² Aimuka akwata amachera aturuka. Bona okwo bakamulebire, kibabera kitangaro, bahaisiliza na Katonda bakwese, “Ekilikushusha kiti titukakibonaga.” ¹³ Yesu ashuba atwarwa omuanda ogw'enyanja, embaga ehurura emuta omugati. Abegesa. ¹⁴ Kayabaire nahingura abona omuLawi owa Alifayo ashuntamire omu ofisi y'abashoza, amugambira ati, “Ompondere.” omuLawi aimuka amuhondera. ¹⁵ Kayabaire ali omwo Yesu nalya akakulya, abashoza bangi n'abafakare bashuntama nawe, ahakuba hakaba haliho bangi ababaire bamuhondeire. ¹⁶ Abegesa b'Amateka n'Abafarisayo kababoine okwo alikulya n'abashoza n'abafakare, babaza abegesibwabe bati, “Ahakubaki omwegesa wanyu nalya n'abaashoza n'abafakare?” ¹⁷ Yesu kayahuliire ekigambo ekyo abagambira ati, “Abagumire tibetaaga mutambi, shana abarwaire. Nkaija kweta abafakare, tinaizire kweta bagorogoki.” ¹⁸ Abegesibwa ba Yohana n'Abafarisayo basiibaga. Aho abantu baija babaza Yesu bati, “Kubaki abegesibwa ba Yohana. n'Abafarisayo basiiba, chonka iwe abegesibwa bawe tibalikusiiba?” ¹⁹ Yesu abahorora ati, “Abagenyi aha kiro ky'obushwere bakusiiba baina kishwera? Orwo bakyaina kishwera tibakusiiba." ²⁰ Ebiro biliija orwo balibaihyaho kishwera, aho kir'ekyo balisiiba. ²¹ Taliho muntu ateka kiraka kihya aha mwendo gukuru. Kayakugira atyo ekiraka kitaguka aha mwendo, ekihya kiruga aha mwendo ogukuru, lero kandi aho emitagukire eba mibi kushagaho. ²² Taliho muntu ateka divai empya mu nshaho nkuru ya ruhu. Kayakutwaza atyo edivai ebarura enshaho, edivai eshesheka, n'enshaho z'oruhu zifa. Edivai empya egya omu nshaho z'oruhu ezihya.” ²³ Ahali Sabato Yesu ashangwa naraba omu ndimiro z'engano. Kababaire nibagenda, abegesibwabe babanza kugutura ebikumba by'engano. ²⁴ Nikwo Abafarisayo kubaza Yesu bati, “Olebe, kubaki abegesibwa bawe nibakora ekizira ahali Sabato?” ²⁵ Abagambira ati, “Timukashomaga ekyo Daudi yagizire orwo yabaire aine ametago n'enjara ekamulya wenene n'orwo yabaire ainabo: ²⁶ Okwo yatahire Rwensinga omwa Katonda, Orwo Abiatari ali Mukuhani Nyamukuru, akalya Omukate gw'Obusinge bwa Katonda, ogutajubulirwa muntu n'omo shana kuliibwa abakuhani bonka, amara yahaho n'abo yabaire ainabo?” ²⁷ Abagambira ati, “Sabato ekagyaho aha rw'omuntu, omuntu talikutwarwa Sabato. ²⁸ Kityo Omwana w'Omuntu nangu n'iwe Mukama wa Sabato.”