¹ Yesu arugayo, agya omu Wilaya ya Buyahudi na buseli bwa Yorodani. Embaga eshuba ehurura emugoba, na wenene agarukamu kubegesa nk'okwo yakagiraga. ² Abafarisayo baija kumulengesa, bamubaza bati, “Nikijuburwa omushaija kumulekera omukaziwe?” ³ Abahorora ati, “Musa akabaragiraki?” ⁴ Bahorora bati, “Musa akajubura omushaija kuhandikira omukazi ebarua y'okumulekera akagenda nayo.” ⁵ Yesu abagambira ati, “Musa okubahandikira omuhango ogu akaiwa omu kugumangana kw'emitima yanyu. ⁶ Nawe kwema aha kutondwa kw'ensi, Katonda akatonda omushaija n'omukazi. ⁷ Kityo omushaija arasigagaho ishe na nyina ajwangane na mukaziwe, ⁸ mara bombili barabaga mubili gumo. Aho nibaba batakili babili shana nibaba basiigaire mubili gumo. ⁹ Aha rw'ekyo abo Katonda yajwanganise, omuntu atalibataishuranisa.” ¹⁰ Kababaire bali omu nju abegesibwa bashuba bamubazaho ekigambo eki. ¹¹ Yesu abagambira ati, “Omuntu alekera mukaziwe akashuba akashwera ondijo, aba aisire obushwere ahali mukaziwe mara aba nasiyana. ¹² N'omukazi ayaruga omwa iba akashwerwa omushaija ondijo, nawe aba nasiyana.” ¹³ Abantu baija baletera Yesu abaana k'abakwataho. Chonka abegesibwa babarotokera. ¹⁴ Yesu kayaboin'ebyo anigara, abagambir'ati, “Muleke abana baije ahaliinye, mutabatanga; manyasi obukama bwa Katonda bwabo. ¹⁵ Nimbagambira amazima, aliba atatoire bukama bwa Katonda nk'omwana talibutahamu.” ¹⁶ Ababumbatira, abataho emikono nabaha omugisha. ¹⁷ Kayabaire naimuka kugenda omushaija aija airukire amubandama omu maisho, amubaza ati, “Mwegesa murungi, nkoreki kubona oburora obutalihwaho?” ¹⁸ Yesu amubaza ati, “Aha kiki kunyeta murungi? Omurungi tabayo n'omoi shana Katonda wenka. ¹⁹ Nomanya emihango: Otaliita, otalisiyana, otaliiba, otalihangilira muntu, otaligobeza banu, okunire sho na nyoko.” ²⁰ Ogu amugambira ati, “Mwegesa, emihango egi nkagyekomya kwema obusigazi bwange.” ²¹ Yesu amuleba amugonza, ashuba amugambira ati, “Noburwaho ekintu kimo: Ogende oguze ebyawe, empiha ozigabire abanaku, eitunga lyawe oliligira omw'iguru; aho oije ompondere.” ²² Yesu kayamazire kugamba ekyo omushaija ajunara, agenda ashobeirwe; nobona akaba aina eitunga lingi. ²³ Yesu aleba oku n'oku agambira abegesibwabe ati, “Abatungi baligumirwa kutaha omu bukama bwa Katonda!” ²⁴ Aho abegesibwa batangara kubona yagamba atyo. Chonka Yesu abagambira ati, “Bana bange, kigumire kite abesiga eitunga kutaha omu bukama bwa Katonda! ²⁵ Nikyoroba engamia kuraba omu kahuru kesindano kushaaga omutungi kutaha omu bukama bwa Katonda.” ²⁶ Bashoberwa muno munonga, bamugambira bati, “Ahosi ayakurokoka n'ohi?” ²⁷ Yesu abaleba, abagambira ati, “A bantu tikilikushoboka, nawe ahali Katonda nikishoboka; ahakuba ahali Katonda ebintu bishoboka byona.” ²⁸ Petro amugambira ati, “Ichwe tukasigaho buli kantu twakuhondera.” ²⁹ Ndi Yesu agamba ati, “Nimbagambira amazima, taliho n'omo ayasigireho nju anga barumuna anga banyanya anga nyina anga ishe anga baana anga mataka aha rwange n'aha rw'evangeli, ³⁰ aliba alibona emirundi chikumi akaanya akomunsi egi, amaju, abarumuna, banyanya, banyina, abaana n'amataka, chonka n'okugingiizibwa kubulimu, kandi n'omu makiro agalija atahairwe burora obutalihwaho. ³¹ Nawe abali ba mbere baliba b'enzindo, n'ab'enzindo baliba ba mbere.” ³² Yesu n'abegesibwabe bashangwa bali aha muhanda nibagya Yerusalemu, Yesu wenene abebembeire. Abegesibwa bakaba bainamu amashoberwa, n'abantu ababaire nibabaruga enyuma bakaba nibatina. Yesu ashuba akwata eikumi na babili abagambira agabaire nigaija kumugwaho, ³³ ati, “Leba nitugya Yerusalemu. Omwana w'Omuntu nibaija kumunaga omu mikono y'abakuhani bakuru n'abegesa b'Amateka, bamuramure kufa bamare bamunagire Abanyamahanga; ³⁴ bamujangura, bamuchwere ebichwante, mara bamutere bamwite. Kabiralabao ebiro bishatu ahimbuke.” ³⁵ Yakobo na Yohana batabani ba Zebedayo bamugoba bamugambira bati, “Mwegesa, nitwenda ekyoturakushaba okitukolere.” ³⁶ Ababaza ati, “Nimwenda mbakolereki?” ³⁷ Bamuhorora bati, “Singa omu kitinwa kyawe otushoboze: Omo akushuntame obulyo, ondijo obumosho.” ³⁸ Chonka Yesu abagambira ati, “Ekyo mulikushaba timulikukimanya. Murashobora kunywa ekikompe ky'obushasi ekyo ndikwija kunywa, handiki kubatizibwa eibatiza elyo ndikwija kubatizibwa?” ³⁹ Bamushubamu bati, “Nitushobora.” Yesu abagambira ati, “Ekikompe ekyo ndikwija kunywa mulikinywa; n'okubatizibwa okwo ndikwija kubatizibwa mulikubatizibwa?; ⁴⁰ Chonka okushuntama aha bulyo anga aha bumosho, ekyo tinyina bushobora bwa kukibaha. Ekyo kya balinya abakitekatekeirwe.” ⁴¹ Abegesibwa eikumi kukihulira, babanza kunigalira Yakobo na Yohana. ⁴² Yesu abeta abagambira ati, “Nimumanya okwo abatwazi b'abanyamahanga babatwaza eikama, n'abamanyi babo babatwaza amani. ⁴³ chonka ekyo, omuli inywe kitaliba kityo. Aligonza kuba mukuru wanyu abakorele , ⁴⁴ kandi n'alikugonza kuba wa mbere omuli inywe, abe mwiru wanyu. ⁴⁵ Nobona n'Omwana w'Omuntu tiyaizire kukolerwa, wenene akaija kukolera abandi, n'okweyanga oburorabwe abone kuchungura beingi.” ⁴⁶ Yesu n'abegesibwabe bagoba Yeriko. Kababaire nibaruga omu kigo ekyo amo n'embaga etali nke, Baritimayo, omuume w'amaisho mara omwanje mutabani wa Timayo akaba ashuntamire aha muhanda. ⁴⁷ Kayahuliire okwo ogwo ali Yesu owa Nazareti, abanza kwomba nayeta ati, “Yesu Mwana wa Daudi, honganyire!” ⁴⁸ Abali bengi bamusiza. chonka wenene ataka muno ashagaho ati, “Yesu Mwana wa Daudi, honganyire!” ⁴⁹ Yesu ayemelera agamba ati, “Mumwete.” Omuume w'amaisho ogwo bamweta nibamugambira bati, “Guma, imuka, Yesu nakweta.” ⁵⁰ Omwendogwe agujugunya kulinya, abanduka ahansiaguruka izire ahali Yesu. ⁵¹ Yesu abaza Baritimayo ati, “Nogonza nkukolereki?” Omwigazi w'amaisho amuhorora ati, “Waitu Mwegesa, singa mbone.” ⁵² Yesu amugambira ati, “Iroko ogende, okwesiga kwawe kwakukiza.” Niho honka Baritimayo abona, ashuba ahondera Yesu mbali yabaire nagya.