¹ Naho niyo engila nyumba ya ntambi mudya namo namna mntu mnta mkono uholomale. ² Wantu wesimile nawambasa kwa hajihi, waone hegu namhonye zuwa dya kuhumula chani kugamba wamwigale kwechitala. ³ Yesu amgamba mntu mta mkono uholomale inuka uchimale mgati mwe dibunga dya wantu wano. ⁴ Niyo awagamba wantu, vino ni vitana kudamanya mbuli yedi mwe zuwa dya kuhumula hegu kudamanya heyekuwagila kumbwila ujima hegu kuukoma? Mna niyo wanyamala. ⁵ Niyo wamsinya kwa maya, niyo anyanyahala kwa udala we muye yawe, niyo amgamba yudya mntu nyolosa umkono wako niyo anyolosa Yesu naye niyo amhonya umkono wakwe. ⁶ Mafalisayo niyo wafosa kweise niyo wakutenda njama hamwenga na mahelode kumlanga yeye chani wamkome. ⁷ Niyo Yesu hamwenga na wanampina wakwe niyo waita kwe ibahali naho umati ulozize niyo wambasa ukalawa Galilaya na Uyahudi, ⁸ nakulawa Yelusalemu na kulawa Idumaya na kulongozi kwa Yolodani na mozi wa Tilo na Sidoni umati mkulu eze wive chila chintu atendile niyo weza kwakwe. ⁹ Niyo awagamba wanampina wakwe waike vyedi ngalawa ndodo kwachausa chakwe, cha umati chani kugamba wanase kumvigaviga. ¹⁰ Kwaviya nakahonya walozize, chani chila mntu mta masulumizo nendile akabesa ambwile amdonte. ¹¹ Hohose mpeho chafu wakamuwona, wagwa hasi kulongozi kwakwe na kuguta, wagamba weye wi Mawna ywa Chohile. ¹² Niyo azikwahila zisekutenda amanyike. ¹³ Niyo aita kulanga ko lugulu, niyo etangwa awo ungile niyo waita kwakwe. ¹⁴ Niyo asagula mlongo na waidi awo etenge wasigilwa, chani kugamba watende hamwenga na yeye naho adehe kuwasigila kulonga mbuli yedi. ¹⁵ Nakutenda na udahi wa kulavya mpepo. ¹⁶ Niyo asagula mlongo na waidi, Simoni akwitagwa Petulo, ¹⁷ Yakobo mwana ywa Zebedayo, na Yohana mwelekwa ywa Yakobo, enkigwe zina dya Bonagesi, awo ni wana wa mvumilo, ¹⁸ Anduleya, Filipo, Batolomayo, matayo, Tomaso, Yakobo, mwana ywa Alifayo, Tadayo, Simoni mkakanayo, ¹⁹ na Yuda Isikaliyote, uyo amhituke, ²⁰ Niyo aita kukaya na umati wa wantu niyo weza hamwenga na yeye hata wasekudaha kudya mgate. ²¹ Walukolo wakwe wweze weve ivyo, niyo waita wakumgwila kwaviya wagamba kapilika mnulu. ²² Wadolonyi eze weve kulawa Yelusalemu niyo wagamba kavalukwa ni Belizebuli, na kwamkulu ywa mpepo. ²³ Yesu niyo awetenga kwakwe niyo alonga nawo kwa miliganyo. ²⁴ Hegu Useuta ukapangana wenye, Useuta uwo haukuchimala. ²⁵ Hegu nyumba yepanga yenye, nyumba iyo haikudaha kuchimala. ²⁶ Hegu mwavu akenula chinyume chakwe mwenye na kupangana, hakudaha kuchimala, naho natende kabula uhelo wakwe. ²⁷ Mna hakuna hata yumwenga akudaha kwingila mndani mwe nyumba ya mntu mta udahi niyo abawa vintu vyakwe bila kumtaliza mta udahi nkongo nivyo naole vimnyumba. ²⁸ Chindedi nawagambilani masa yoyose ya wana wa mntu, nayalekeilwe hamwenga na vihiye ivyo wakulonga. ²⁹ Mna yoyose akunga amlonge vihiye Muye Akukile halekeilwe ng'o, mna ana masa ya kale na kale. ³⁰ Yesu kalonga ivyo kwaviya wagamba nandile ana muye mchafu. ³¹ Niyo mami yakwe na walukolo wakwe niyo weza wachimala kuse, niyo wayuma mntu akamwitange. ³² naho bunga dya wantu nadikala hamwenga na yeye niyo wamgambila, mami yako na walukolo wako weheise naho wakulonda weye. ³³ Awahitula ni yuhi mnala na walukolo wangu. ³⁴ Awasinya wadya wekalanye wamzunguluke niyo agamba, kaula wano nawo wamnala na walukolo wangu. ³⁵ Yoyose akusankana na ivyo akunga Chohile, mntu uyo ni mlukolo ywangu na lumbu na mnala ywangu.