¹ Yesu nednile akajenda kulawa mwe divikilo, yumwenga ywa wanampina wakwe nakamuza mhinyi kaula amayuwe yano yakwehela na mazengo. ² Agamba wayawona amazengo yano makulu, hamna hata yuwe dimwenga dikunga dino nadisigale mlanga mwe tuhu ambadyo hadigwiswe hasi. ³ Naye nednile kekala mlange mwe lugulu lwa mizeituni mnyuma mwe divikilo, Petulo, Yakobo, Yohana na Anduleya wamuza kwa chinyele, ⁴ chigambile izimbuli zino nazitende ini ni mbwani ichilagiso chakwe izimbuli zino kulaila. ⁵ Yesu kakonga kuwagambilani ikalani vyedi kugamba mntu yoyose asekufanyanya. ⁶ Walozize naweze kwa zina dyetu wakalonga miye nuyo nawo naweze walozize. ⁷ Mkeva nkondo na kupelemba kwa nkondo, msekogoha izimbuli izo vyaungwa zilaile mna uleho haunati. ⁸ Si nainuke chinyume na si ntuhu, na Useuta chinyume na Useuta, nahatende na masingisiko ntendele zesimile, na sala, ino ni nkongelo yo usungu. ⁹ Tendani meso nawawegale mwe vitala naho namtoigwe mwa mavikilo namchimaliswe kulongozi kwa Mazumbe na Maumbe kwachausa cha miye saviya uchindedi kwawo. ¹⁰ Mna ulosi waungwa nkongo ulongwe kwe izisi zose. ¹¹ Wakaunga wawagwile na kuwenka, msekogoha kwachiya mkungwa mlongwe chipindi kwa chipindi uwo na mwinkwe ni mbwani cha kulonga hamtende ni nyuwe mkunga mlonge mna ni Muye Ukukile. ¹² Mlukolo namlahe mlukolo kumkoma, tate na mwanawe, wana nawahigane na tati zawo na kuwahosa kubanika. ¹³ Namwihiweni chila mntu kwachausa cha zina dyangu, mna akunga ajijimize kubula udumo mntun uyo nambulwe. ¹⁴ Mna wona wihi wa ubanasi uchimala hadya hehekungigwa kuchimala, akusoma na manye, naho weyuko mndani mwa Yuda wagulukile ko lugulu, ¹⁵ naye ekulanga mwe nyumba asekusela hasi henyumba hegu kuguha chochose kweise. ¹⁶ Naye eyuko kwenkonde asekuya kuguha nguwo yakwe. ¹⁷ Mna nawaluwone wavyele wenye nda na wakonkeza mwe mazuwa ayo, ¹⁸ walombeze kugamba ise kulaila chipindi cha mpeho. ¹⁹ Kaviya nakutende kuna masulumizo makulu ambayo hayawahile kulaila kukongela Chohile kumba isi kubula haluse hakuna naho havilaile naho. ²⁰ Kubula Zumbe nahituze zuwa hakuna mwili ukunga wambulwe mna kwachausa cha wasigilwa akunga awasagule napunguze namba za zuwa. ²¹ Mwa uwo uneva kuna mntu yoyose nawagambile kaula Kulisito ehano hegu kaula ehadya msekuzumila. ²² Mna Wakulisito wa lulimi na waoni wa lulimi nawalaile nawalavye maula na mpintuko chani kugamba wawadante mwa hata wasigilwa. ²³ Mtende meso siheza kuwagambila yano yose kabula ye chipindi. ²⁴ Mna bada ya masulumizo ye dizuwa idyo, zuwa nadijelwa chiza mwezi haulavye lumuli lwakwe. ²⁵ Ntondo nazigwe kulawa kulanga nezi kwembingu naisingisike. ²⁶ Nivyo nawamuwone Mwana ywa Adamu akeza mwa maingu kwanguvu nkulu na Ukuka. ²⁷ Nivyo natume wandima wa kwembingu wakwe na kuwachisnya hamwenga wasagulwa wakwe kulawa ntendele nkulu ze isi kulawa ko udumo we isi kubula udumo we zimbingu. ²⁸ Kwa mtini kwehinyeni saviya tawi dikudaha kulavya na kwika upesi mani yakwe nivyo nammanye kugamba eyuko hajihi mo lwivi. ²⁹ Nivyo vili mkawona mbuli zino zikalaila mmanye kugamba ni hajihi na ho lwivi. ³⁰ Chindedi nawagambila chino icheleko hachijinke hale kubula imbuli ino hainati kulaila. ³¹ Izimbingu ne isi nazijinke mna imbuli ya miye haijinke hata. ³² Mna kulanga idizuwa idyo, hegu isa iyo hakuna amanyize hata wandima wekulanga hegu wana mna Zumbe. ³³ Mtende meso kaulani naho lombezani kwaviya hammanyize ni chipindi chani nayalaile. ³⁴ Ni saviya mntu akwita ntambo ayasa inyumba yakwe na kumwinka mtalizwa ywakwe atende Zumbe ywe nyumba chila yumwenga na ndima yakwe na kumwika mwamizi ekale meso. ³⁵ Ivyo ikalani meso kwaviya hammanyize Zumbe we nyumba nauye mwe nyumba vyadahika ni chisingi nechilo chikulu umo zogolo dikaila hegu nomtondo. ³⁶ Uneva keza ntuntila asekubwila kugona. ³⁷ Chiya huchilonga kwako nachilonga kwa chila mntu chelezani