¹ Paolo etangwe ni Kulisito Yesu kutenda msigilwa mwe ungi wa Chohile na Sosithene mlukolo ywetu. ² Mwe vikilo dya Chohile diyuko Koliso mwe wadya awo walenguswe mwa Yesu Kulisito awo wetangwe kutenda wantu wakukile, chawdolonyeza naho wadya wose wakuditanga zina dya Zumbe ywetu Yesu Kulisito mwe hantu hose Zumbe ywawo na ywetu. ³ Wedi na utondowazi utende wenyu kulawa mwa Chohile Tati ywetu na Zumbe ywetu Yesu Kulisito. ⁴ Mazuwa yose namtogola Chohile ywangu kwachausa chenyu mo wedi wa Chohile uwo Kulisito Yesu nakawenka. ⁵ Kawetenda kugamba wata ugoli mwe chila sila mwe kulonga hamwenga na ubala wose. ⁶ Kawatenda wata ugoli saviya ukuzi kulanga Kulisito kugamba kawonekana uchindedi kugamba chindedi emgati mwenyu. ⁷ Mwe ivyo hamkuhungukilwa luso za muye saviya mtendile na nkwina kugoja ugubulo wa Zumbe ywetu Yesu Kulisito. ⁸ Nawatogezeni nyuwe nanywi kubula udumo chani msekutenda na lema mazuwa ya Zumbe ywetu Yesu Kulisito. ⁹ Chohile ni mchindedi uyo awetangeni nyuwe mwe ndala ya mwana ywakwe Yesu Kulisito Zumbe ywetu. ¹⁰ Haluse nawaunga wakulu na walumbu zangu kujinkila zina dya Zumbe ywetu Yesu Kulisito kugamba wose mzumile na kugamba msekutenda na kupagula mgati mwenyu nawaunga kugamba mhanganyike hamwenga mwe ungi umwe na mbuli imwenga. ¹¹ Ivyo wantu wa nyumba ya Kloe wanigambila kugamba kuna kubagulana kujendeleza mgati mwenyu. ¹² Imana ni ino chila yumwenga ywenyu agamba miye ni wa Paolohegu naho miye niApolo hegu naho miye ni wa Kefa hegu naho miye ni waKuilsito. ¹³ Vino Kulisito kabagulika? haluse Paolo nakasulumizwa kwachausa chenyu? Vino nambatizwa mwe zina dya Paolo? ¹⁴ Namtogola Chohile kugamba simbatize yoyose mna Krispo na Gayo. ¹⁵ Ino nendile kugamba hahana yoyose akunga alonge nambatizwa kwa zina dyangu. ¹⁶ Naho nasiwabatiza we nuymba ya Sitefania vitende aho simanyize hegu nasimbatiza mntu mtuhu yoyose. ¹⁷ Kwaviya Kulisito hanisigile kubatiza mna kalonga ulosi wedi, hanisigile kulonga mwe ulosi wa umanyi wa chiuntu chani kugamba udahi wo msalaba wa Kulisito usekusigwa. ¹⁸ Kwaviya ulosi wo msalaba ni uhezi mwe wadya wakubanika mna mwe wadya awo wa Chohile wakugombelwa ni udahi wa Chohile. ¹⁹ Kwaviya idolonywa nanibalange umanyi wa wenye ubala, ubala wa fanyanyi. ²⁰ Ekuhi mntu mwenye umanyi? Ekuhi mwenye elimu?Ekuhi akulonga mhembeleza we isi ino? vino Chohile hahitule umanyi we isi ino kutenda uhezi? ²¹ Kukongela mwe isi itenda yenye umanyi wakwe haummanyize Chohile, kakavyunga Chohile wo uhezi wawo wakulonga chani wambulwe wadya wazumile ²² Mwe Wayahudi wauza mpituko na Wayunani walonda umanyi. ²³ Mna chigambilwa Kulisito asulumizwe, atendile achinda mwe Wayahudi naho ni uhezi mwe Wayunani. ²⁴ Mna mwe wadya awo wetangwe ni Chohile, Wayahudi na Wayunani chamlonga Kulisito enga udahi na umanyi wa Chohile. ²⁵ Kwaviya uhezi wa Chohile una umanyi kujinka awantu no usokezi wa Chohile una udahi kujinka vya wantu. ²⁶ Kaula witwngo wa Chohile mlanga mwenyu mkulu na lumbuzakwe kugamba walozize mwenyu nawelekwa mwe usenta. ²⁷ Mna Chohile nakasagula vintu vihezi vye isi chani kuvijela soni vikutenda na umanyi Chohile nakasgula chiya chisokele mwe isi kuchijela soni chiya chenye udahi. ²⁸ Chohile nakasagula chiya chili cha hali ya hasi na chiya chibeligwe mwe isi, nakasagula hata vintu viya heviwazigwe kugamba ni chintu, mwe vikutenda siyo chintu vitendile na ugoli. ²⁹ Nakadamanya vino chani asekutendekana yoyose mwe mbuli ya kweduvya kulongozi kwakwe. ³⁰ Mwe chiya Chohile adamanye haluse mndani mwa Kulisito Yesu uyo adamanyike umanyi kwachausa chetu kulawa mwa Chohile nendile uwagila wetu na ukuka na ugombezi. ³¹ Saviya ulailo saviya wandiko ivyo dikulonga, akweduvya eduvye mwa Zumbe.