¹ Avalongonchi ne avasimbi vavo vakhomile khu Yerusalemu valondamine nu khunchungutela umwene. ² Vakhavavona avakhongi va mwene vilya imikate ne fikokho khetakalava. ³ (Avalongonchi na Vayahudi voni savilya vikhalava vononu; vikhwibatelela inyikho incha vagogolo. ⁴ Avalongonchi vovayile ukhuhuma ukhuvigoncha, savilya vu savogile. Khulenindagelo inchinge inchovikhonchikonga, ukhusukha ifinywelo, isefulila, ifyombo ifya shaba niifigodo ifivitamela pakhulya.) ⁵ Avalongonchi ne vasimbi vakhambuncha u Yiisu, "Khehi avakhongi vakho samitame ukhukongana ni nyikho incha vatanchi, ulwa khuva vilya imikate khetakalava amavokho?" ⁶ Umwene akhavavola, "Unyamalago Yesaya anchovile vononu khulyomwe asimbile, 'Avanu ava vikhunyedehka khu milomo, inumbula incha vene chilikhutali nune. ⁷ Vikhombombela inekhelo injalubedo vimanyisya indagelo incha vanu ndi finchago fya vane.' ⁸ Munchilekhile indagelo incha Nguluve nu hwibatelela inyikho imepo incha vanu." ⁹ Pwu akhanchova khuvene, "Mlubelile ululagelo ulwa Nguluve ili mlolele inyikho nchenyo! ¹⁰ Ulwa khuva u Mose atile, "Umwedekhe u Dada vakho nu Jyova vakho, 'Yoywa inchova amavivi khwa Dadaye nu khwavanina lwa yelweli ifwa.' ¹¹ Ulwa khuva mwita, 'Ingave umunu inchova khwa dadaye nu vanina, "Ulutangilo lwolwoni lolwo mukhale mwikhava ukhuhuma khulyone lwiva khebana khu Hekalu,'" (elyo khuhuta atekhominche Unguluve') ¹² Pwu sikhondekhe ukhuvomba embombo yeyonikhwa deda ama uvanina. ¹³ Mukholovekhe ululagelo ulwa Nguluve ukhuta sakhenu khu nyikho nchenyo. Ni mbombo inchopingi mukhonchivomba." ¹⁴ Akhakilivukhela ukhuvelanga avalulundamano nu khuvavola, "Mumolekhenche one, mwe voni, munyeliwe. ¹⁵ Khesiholi kyokyoni ukhuhuma khunchi khu munu khekyo khiwesya ukhundamya amunu ekhihwingela khumwene. Khekhonguma omunu khyohikhondamya. ¹⁶ (Nchingakhencha: unsitali ugu, "Ingave omunu yoywa avenchaga ale ni mbulukhutu incha khupulikha, apulekhage" Gusimoli mu kalata incha khatale). ¹⁷ U Yiisu akhavalekha avalulundamano nu khwingela mu mbunchenge, avakhongi va mwene vakhambuncha ukhukongana ne khehwani khela. ¹⁸ Yiisu akhata, "Na nyomwe samweliwe? Samwilola ukhuta khyokyoni ni khekyo khihomwingila omunu sakhiwesya ukhundamya, ¹⁹ Ulwa khuva sakhehelote mu numbula eya mwene, khihwingela mulitumbu lya mwene pwu kheluta khu ya vele." Khu nchovele eye u Yiisu akhafivalancha ifyakhulya fyoni. ²⁰ Akhanchova, "Khehyo khihoma umunu khyohikhondamya. ²¹ Ulwa khuva khihoma mu munu, khunchi eya numbula, khilomana na masage amavivi, uvuligu, uvulyasi, uvubudi, ²² Uvumalaya, uvunogwe uvuvivi, uvuvivi, uvusyovi, ukhuligupa, ilweginio, uvokhonyofu. ²³ Amavivi aga goni gikho mugati, gugagyo gikhondamya omunu." ²⁴ Akhema ukhuhuma pala nu khuhega ukhuluta khu Tiro ne Sidoni. Akhingela mugati sakhanogwa omunu uveavinchaga alomanye ukhuta aleapo, yekhalemehan ukhumfikha. ²⁵ Pwu udala, unyamwana unyamepo imbivi, akhapulekha elimenyu lya mwene, akhincha, akhagwa pa malunde ga mwene. ²⁶ Udala uywa ale Myunani, uva khevumbuho kya Kifoniki. Akhansima ukhuta anchisweme imepo imbivi ukhuhuma khu mwaleve. ²⁷ Yiisu akhambula udala, "Valekhe avana valye tasi, ulwa khuva sio lunonu ukhutola unkate gwa vana nu khulakhela imbwa." ²⁸ Pwu udala akhanda ukhuta, "Lweli Ntwa, na nchimbwa pasi pa mwes yayilya amasigalelo ga khyahulya hya vana." ²⁹ Akhambola, "Ulwa khuva unchovile evwo, ulutage nuvudekhedekhe. Imepo nchindekhisye umwalevo." ³⁰ Udala akhavuya khuvunchenge uvwa mwene ambone umwaleve agonile pa khetalati, imepo nchindekhisye. ³¹ Yiisu akhahuma khu Tiro akhagengela khu Sidoni akhaloncha khunyanja eya Galileya ulunyikha ulwa Dikapolisi. ³² Pwu vakhandetela omunu uveanchivile uve ilemwa ukhonchova vononu, vakhansima u Yiisu avekhe ifivokho fya mwene pa mwene. ³³ Akhang'omya khunchi ya lulundamano khu lufikho, pwu akhavekhe ifikonche mu mbulukhutu nchamwene, vwu abekhile amati, akhibata ululimi lwa mwene. ³⁴ Akhalola khule yanya, akhakeha nu khumbula, "Efata, "Khuhuta "Dendukha!" ³⁵ Pwu unsekhe gugwa imbulukhutu nchikha dendukha, na khwhyo khehansigaga ululimi khehanangeha alekhunchova. ³⁶ Pwu akhavalagela vasite ukhumbula omunu uveavenchaga. Vwu ikhovalagela elyo, pwu vale khupanga imbombo incho khuvingi. ³⁷ Va yelweli vakhadega nu khuta, "Avombile khela khenu khenonu. Nu khuvavekha avanchivile ukhupulekha, na avabubu ukhunchova."