¹ Pu U Yeisu avile amalile ukhunchova amamenyu angha nghoni, pu akhavavula avakongi va mwene, ² "Mulumanyile ukhuta nchisinghile isikhu iveilei vuvule ukhuva pasakha, pu nayumwana va Nyamunu vikhungha lavanchukhilangha ukhuta avungiwe." ³ Pu pongela avavaha vavatekhenchi navanghongholo va vanu vikhwanghanila pupaninie pavanchenge vwa vutamo vwa tekhenchiumbaha, eilitawa lyamweme vei Kayafa. ⁴ Puvakhideihana ukhuta, "Tumwibate u Yeisu nukhubuda. ⁵ Ulwakhuva vaeideihine ukhuta, "Eilekhe ukhuva pakhinghono eikhivalanche pu yayipelaunchwengho pamiho ngha vanu." ⁶ Pu u Yeisu vwaleikha Betania munyumba ya Simoni uvei ale me buba, ⁷ Pu udala umo akhincha atwalile ekhovo, eikhinyamono inonu finchopwakhahenghelela pa Yeisu akhinama nukhududeiyeila inomo khuntwe upuatamile waleipakhulya. ⁸ Pu avakongi vamwa mwene vuvalolile ndavule vakhavipa fincho pu vakhata vweikhi uvuveyanile vwakhyuma ndavule? ⁹ Nakhuva imono inchi nchale nchinghunchiwa nukhukava ikhyuma ikhilipakhyanya fincho, nukhuvatanga avanghanchu." ¹⁰ Pu u Yeisu, akhava avamanyile amasangho nghavo pu akhata, "Kheikh mukhunghatancha udala uyu? Pakhuva khinu kheinonu eikhya ambombile une. ¹¹ Avanghanchu muleinavo ifinghono fyoni pu leino une samuleinune ifinghono fyoni. ¹² Ulwakhuva unkhundudeileila une imono inchi pa mbeilei nghwango, ambombile ewo pakhuva ikhunesania pukhusyielaune. ¹³ Ncha yeilweli nikhuvavula ukhuta, puponi upuyakhiva eilivangeili eilei lilumbeileiliwa ghwa mukhilunga khyono, ikhyuavombile udala uyu pukhinchuvivwangwa mumbu nkumbuheincha vwa mwene." ¹⁴ Pu ukongi umo muvala khinchingho na vaveilei, unyalitawa eilei Yuta uvanu Kalyoti, puahakhuluta khuvavaha va vayekhenchi. ¹⁵ Akhata, "Pumukhuma khinu kheikhi une neinganghalavandukhe u Yeisu?" Avene pukhanghelela nukhubineila indalama eimilevula nghidatu. ¹⁶ Pu ukhuhumangha apo pwaleikhulonda akhavaleilo akhakhunghalavandukha U Yeisu. ¹⁷ Pu paleinchuva eilitanchi elya fisyesye ifilivula nsabe, avakongi vakhanduteila u Yeisu nukhuta, "Ndapi upuvwinonghwa tukhutesa neiheinche puve munu vakhulya eipasakha?" ¹⁸ Indutanghe, "Khuvanchenge pumukhumbonangha umunu umo pumumbale ukhuta, Umanyisi atilei useikhei nghwango nghuhenghelile pu nilonda ukhuleila eipasakha munyumba yakho une navakongi vango.'" ¹⁹ Avakongi puvakhavomba nduvu u Yeisu avalanghiile, puvakhatesania apakhuleila eipasakha. ²⁰ Pu leino khwa vile khwilile, puakhatama navakongi va mwene pakhulya eipasakha. ²¹ Vavile vilya eipasakha akhata, "Ncha yeilweli nikhuvavula ukhuta umo ndyamwe ikhungalandukha." ²² Pu vakhansunsuvala fincho, pu umo umo aleikhuvuncha khwa Yeisu aleikhuta, "Pamo, nene, Nkuludeva?" ²³ Pu U Yeisu akhavamula akhata, "Ula uveininchaba paninie numwene mukhi hava vei uywa eikhungalava ndukha. ²⁴ U Mwana va Nyamunu pu iluta, tuvu asimbiwe. Pu leino lwa mwene umunu ula uveikhunghalavanchukha u Mwana va Nyamunu! Pu yale yiva huba khumwene umunu uywa ale ave saholiwe." ²⁵ U Yuda, ula unyakhunghalavandukha akhamula akhata, "Pu!, imanyisi?" Pu U Yeisu akhata, "uve vuwita." ²⁶ Vavile valeipakhulya pu, u Yeisu akhatwala eikhisyesye akhasana, pu akhamenyula. Akhavapa avakongi vamwene akhata, "Mutolanghe, mulinchnge. Unghu nghyu mbeilei nghwango." ²⁷ Pu akhatola neikhinywelo akhasana pu akhavapa akhata, "Munywenchanghe mweivoni mueikhi. ²⁸ Ulwakhuva unghu unghyu nkisa nghwango unghwa lweideihano, unghududei kha pavingi pavusyiekhilo vwa mbivi. ²⁹ Pu leino nikhuvavala ukhuta, pusaneikhanywe khange numwe, pupakha neilava ninywa upya paninie numwe pa ludeva lwa Daada vango." ³⁰ Pu leino vavile vamalile ukhwimba nukhunginia puvakhahuma khunji nu khuluta khukhyamba khya mono. ³¹ Pu u Yeisu akhavavula akhata, "Ekeilo eiyei mweivoni mukalalangha savali yango ulwakhuva yeisimbiwe, punikhutova utekhenchi pu ekhipungha khya ng'osi khye vanikha. ³² Pu leino yakhiva neinchukhite, puyanikhuvalongola ukhuluta khu Galilaya." ³³ Pu U Peteli akhamula akhata, "Ndaveipungave vooni yavi vipa savuli yakho une pusanikhavipe niva paninie nuve." ³⁴ U Yeisu akhamula akhata, "Ncha yeilweli nikhukhuvula eikeilo eiyei vueilikongove leikhale ukhuvekha pu vwiva umbelile khadatu." ³⁵ U Peteli akhata, "Nu pupanonghile une ukhufwa nuve, sanghakhubele lusikhu." Pu nava vakongi avange vakhata vulevule. ³⁶ Pu u Yeisu akhaluta navo avakongi paluvanja ulwa Getisamani pu akhata khuvakongi vamwene, "Mutame apa pu une neilute ukhu pakhudova." ³⁷ Pu akhatola u Peteli navana vaveilei ava Sebedayo pu akhatengula ukhu nsunsuvala nukhuyuyuvala. ³⁸ Pu akhavavula akhata, "Einumbala yango yeinsunsuvile fincho, ulunsunsuvalo ulwakhufwa. Pu mve apa hange mve miho paninie nune." ³⁹ Pu akhaluta pakhimbale padebe puakha nghwila, eilitumbu akhanja ikhubeileifyu kha nukhwisaya. Pwaleikhudova aeikhuta, "Daada vango, panghale pavonekhe apakhuluta eikhiywelo eikhi, eingave vunonghwe vwakho pu uvunonghwe vwakho vavombekhanghe." ⁴⁰ Pu akhaluta pavakongi vamwene akhavona vanghonelile, pu akhambula u Peteli akhata, "Pu kheiikhi mulemilwe ukhuva miho paninie nune napaseikhi nghumo vavula? ⁴¹ Muvenchanghe miho nukhwisaya ukhuta mulekhe ukhuva ndu nghelo. Inumbula yeidekhe umbeilei unghu nghyudekhedekhe." ⁴² Puakhaluta khange pakhudova ulwa veilei, akhata, "Daada eingave, eikhinywelo eikhi pasipali pavunge apa akhuluta, pu uvu nonghwe vwakho vukongivwanghwe." ⁴³ Pu akhavuya khange khuyakongi akhavona vanghonelile itulo pakhuva amiho nghovonghangatile. ⁴⁴ Pu akhavalekha khange akhaluta khudova ulwadatupu akhadova amamenyu nghunghalanghala. ⁴⁵ Pu pongela akhaluta khuvakongi va mwene akhavavula akhata, "Pumungonelele leino mukekhe? Lola, useikhi nghuhenghelile unghu u mwana va Nyamunu pu aleipakhuva mumavokho nghavatula nonghwa. ⁴⁶ Ima tuvukhe. Lola, uba uveikhungalavandu kha ahenghelile." ⁴⁷ Pu aveile ipinchova navo, lola uYuta umo mbakongi vala khinchingho navaveilei akhafikha, paninie. Numwene neikhipungha khya vana ikhivaha khihuile khuvavaha vavatekhenchi navanghongholo vavanu, puvakhincha ni mundu ni mbunda. ⁴⁸ Pu ula unyakhunghalavandukha u Yeisu akhava avavilile eikhimanyeilo akhata, "Uveiyakhiva nikhunchiba, khudomo vei uywa. mumwibatanghe." ⁴⁹ Pu ukhaluta khwa Yeisu pu akhata, "Nikhukhunya, vei Manyisi!" Pu akhanchiba. ⁵⁰ Pu u Yeisu akhata, "Imanyani, vombangha eilyuvwinchile. ⁵¹ Lola, leino vala avuvale nu Yeisu, umo pwakhangolosya eikhivokho khyamwene, akhaswekhula umundu ya mwene, pu akhatova khumbombi vatekhe nchi umbaha, pu akhamyatula eimbulukhutu ya mbombi. ⁵² Pu u Yeisu akhata, kilivula eimundu yakho veikha upuyeikhale, pakhuva voni avilwela nukhubuda neimundu puvibudi wanghwa neimundu. ⁵³ Pamo musangha mwita neilemwa ukhudova u Daada vupe puasuheile useikhi unghu eikhipungha khya vasuhwa eikhingho navaveilei nukhuluteila pakyanya? ⁵⁴ Pu leino pu uvusimbe vumanyeikhikhangha ndakheikhi uvuvwasimbiwe mukalata pu panonghelanile angha ukhuhumila?" ⁵⁵ Pa seikhi unghwa u Yeisu akhavavula eikhipangha eikhikhya inchile pakhu mwibata akhata, "Pu! mwinchile ni mundu nembunda ukhuta mukhu mwibata unyambunda? ifinghono fyoni muleikhu mutembile neileikhuya manyisya samuleikhunonghwa ukhu puleikha! ⁵⁶ Pu leino inchi nchoni nchivombekha ukhuta punchivonekhange nchila unchuvasimbile mukalata avanyamalangho."Pu avakongi voni vakhande kha vakhankimbeila. ⁵⁷ Pu vala avamwibite u Yeisu puva khanghileikha khwa Kayafa, utekhechi Umbaha, pakhuva puvalundamine avamanyakalata navavaha vakhivumbukhu. ⁵⁸ Pu u Peteli aleikhukonga musana akhava patale pu akha nchifikha munyumba ya tekhenchi umbaha, akhingeila akhanchitama paninie navaloleli alole khihumeila khiekhi. ⁵⁹ Pu leino avavaha navatekhenchi voni paninie neikhipungha khyavanchova nonghwa vanchovangha nincha vudesi eincha khuleyela khwa Yeisu, puvabude. ⁶⁰ Nda puyeingave vavonekhe avanyakhu nchova inonghwa ncha vudesi, pasava yeivone inonghwa eiyatulile u Yeisu, puvakheihumia avanchova nonghwa vaveilei pavubulongolo Vakhata, "Umunu uyu aatile, ⁶¹ "Aleina makha nghakhumamula eitembile ya Nguluve nukhunchenga pafinghono fidatu." ⁶² Pu utekhenchi umbaha akhima akhambuncha akhata, "Savukhwamula limenyu? Ava vinchova nyikhi palyuve?" ⁶³ Puu Yeisu akhanchingha mye. Utekhenchi umbaha akhambula akhata, "Nduvu u Nguluve uveikhwale itama niita utuvule, eingave uve veve keileisite, Mwana va Nguluve." ⁶⁴ U Yeisu akhamula akhata, "Uve veve vwinchova ewo paleino nukhukhuvula niita ukhuhumangha leino vuvonngha umwana Vanyamunu atamile khukhivokho eikhyakhundyo eikhinyamakha vuikhwincha khumaveingo anghakhukyanya." ⁶⁵ Pu utekhenchi umbaha akhalendula eimienda nghyamwene akhata, "Vubeingha sayilondiwa khange ukhulonda avanu avakhu tutanga ukhunchova? Lola, mumalile ukhupuleikha vuibeingha. ⁶⁶ Leino! Pu musangha kheikhi? Vakhamula vakhata, "Anonghile ukhubudiwa." ⁶⁷ Pu vakhabehela amati khumiho, vakhatova nimbuli, vakhatova na mapi, ⁶⁸ Nukhuta, "Putenghuleila veeni uvei akhutovile?" ⁶⁹ Useikhi unghwa u Peteli atamile khunji khuluvanja, pu udala umo umbombi akhanduteila akhata, "Uve na yuve ukhale paninie nu Yeisu uvamunu Galilai." ⁷⁰ Puakhabela pa vanu voni akhata, saneinchimanyile einchuvwinchova." ⁷¹ Avile ihuma pandyango, udala uyunge umbombi akhavavwa avanuavavale epwo pala akhata, "Umunu uyu vope akhale paninie nu Yeisu uva mu Nazaleti." ⁷² Akhabela hange akhijyiengha akhata, "Une sanimanyile umunu uyu." ⁷³ Pu akhaseikhi khadebe, vala avuvale pwuvale pala vavo vale pipi nave u Peteli, "Vakhata lweli uve uleinine va Yeisu pakhuva nayeinchovele yakho yivonesya." ⁷⁴ Pu akhatengula ukhwijyiengha mukhwikotola aleikhutu, "Saneimanyile umunu unywa," Pu eilikongove leikhavekha. ⁷⁵ U Peteli akhankumbukha amamenyu unghuavuliwe nu Yeisu, "Eilinkongove vusaleiveikhile yavukhumbela khadatu."