¹ Vughasisile amanchuva sita u Yesu avatoliele pwu paninie numwene u Petro, nu Yakobo, nu Yohana ulunkhololwe, akhavahielikha ukhuluta ukhutogha khu kyamba eikhitali khuvutitu. ² Khumiho khumwene khukhasyetuka khukava lumuli ndhu lwa linchuva. Emiendha gya mwene ghinkhang'ala ukhuta lumuli. ³ Pwu, vakhahumiela u Musa nu Eliya valiekhunchova nu mwene. ⁴ U Petro akhamula, akhambula u Yesu, "Ntwa, ndalwiva lunonu ufywe ukhuva apha. Unghanongwe une pwuninchengha ifye violatu khiemo kyakho, khimo kya Musa, nie khinghe kya Eliya." ⁵ Vu viphinchova, lola likhincha eiliviengho eilivalafu, liekhaviekha eikhiphe phenchela, puvu eilimenyu likhaphulienkhikha ukhuma khuliviengho, liekhanchova liekhata, "Uyu vie mwana vangho unghane uvienie nghaniele umwene, mumphuliehienchaghe umwene. ⁶ Avankhonghi va mwene vuvaphuliekhe ewo, vakhaghwa phasi valiekhufughafugha vakhadwda eino. ⁷ U Yesu akhincha, akhaviebhata nu khunchova, "Mwieme mlekhe ukhundwada." ⁸ Pwu vakhinula amiho ghavene khukyanya savakhakhivona khienu, vakhambona u Yesu mwene. ⁹ Vaviele vikhyikha ukhuma khukyamba u Yesu pwakhavavula akhata mkhielekhelwe ukhuvavula avanu nchincho munchiwene khunu, "Iemphakha umwana va Adamu alava inchukha ukhuhama khuvufwe." ¹⁰ Avankhonghi va mwene vakhambuncha vakhata, "Ulwa khuva khikhi avakhalani vinchova ukhuta, u Eliya alatala ukhwincha? ¹¹ U Yesu akhavamunu akhunchova, "Lweli u Eliya itala ukhwincha umwene vyalavomba nchoni inchi. ¹² Hanghe nikhuvavula umwe ukhuta, u Eliya akhinchile, umwe samukhamanye. Pwu vakhambombile nchoni inchuvakhanoghwaghwa avane. Vulevule umwana va Adamu wayietesiwa ewo mumavokho ghavene." ¹³ Pwa avankhonghi vakhaluma ukhuta akhanchovagha inonghwa iencha Yohana Uvikhwoncha. ¹⁴ Vuvafikhe pavanu avinghi, umunu yuomo akhandhutiela, akhafughama khuvulongholo khumwene, pwa khambula, ¹⁵ "Nkhuludeva nidhova, unanghe umwana vangho alienielighonchi likhughwisya mumwoto aphanghe mumaghasi linkhung'angha yiesya eno ietabhiekha. ¹⁶ Niekhangheghile khuvankhonghi vakho vankhalemilwe ukhumphonia. ¹⁷ Pwu u Yesu akhanda akhata, "Umwe mwievaholwa yumwe samkhwidhikha, yuomwe muyaghile, nientamagha, numwe imphankha ndhieli? Mungheghe khulyune khunu." ¹⁸ U Yesu akhankhemela, iemepho nchikhahegha. Undhimi akhaphona unkhuhuma unsiekhe ghula. ¹⁹ Pwu avankhonghi va Yesu vankhandutiela ukhuvutitu vakhambuncha vakhata, "Ufwe mbona tukhalemilwa ukhukhencha?" ²⁰ U Yesu akhavavula akhata, "Ulwa khuva ulywiedhinkho lweinyo ludhebhe. Mwiedhikhe nikhuvavula, inave mwiva nulwidhinkho ludhebe ndhie mbeyu iendhebe eiya haladali, ukhuta khiekheghe upwukhili pho khilelute phavunghe, kyophe khikhegha, ulwa khuva khiesikhuli eikhienu khiekyo eiyo ukhilemwa ukhuvombekha khulyumwe. ²¹ (Ulwa khuva iemepho ndinchi sanchiwesya ukhuhegha, nchikhegho nukhudhova nukhufungha). ²² Vuvakhale viphitama khu Galilaya, uYesu akhavavula avankhonghi vamwene akhata, "Umwana va Adamu iluta khuviekhiwa mumavokho aghavanu. ²³ Avanu avo vikhumbudha, haghe eilinchuva eilya dhatu alanchukha.'" Avankhonghi va mwene vasaghile ukhulutielila. ²⁴ Vuvafikhe khu Kapelnaumu, avasonghasongho iya nusu sekeli vakhandhutiela u Petro vakhata, "Nayu manyisi venu iehomba eisongho eiya nusu sekheli?" ²⁵ Umwene vuinghile nunyumba, akhambuncha akhata wivuna ndakhikhi Simoni? Avakhuludeva avankhilungha aviephokhela isongho aphanghe ukhuhombencha ukhuhuma khwani? Khuvana vavene aphanghe khuvagheni? ²⁶ U Petro akhata, "Ukhuma khuvagheni" U Yesu akavavula, aviloleliwa muvakhenche ukhosongha eisongho. ²⁷ Aphanghe uyoutukhuvaviekha avasongha songho ukhutula einonghwa lutagha khunyanja, ukhalole iendhovana, ukhatole eisomba eyietala ukhwincha. Akhieva vudhiendhula undhomo gwa yeene, uyuovukhuyie vona mula isekheli yiemo. Utole ukhavape avasongha songho yieva yangho nuve.