¹ Mwanawane,ogabhike amang'ana gane mukoro yazo nobhiike amakumiriryo gaane. ² Orihe amakumiriryo gane obheho,obhike ameegyo gane kye ekikikye emoni. ³ Ogabhohe kubhyaara bhyazo,ogakaame kurubhao rwoomoyo gwazo. ⁴ Omubhurire omwisegi wa amang'ana bhuzomu, ''awee ni musubhati wane,'' noobhumenyi bhwa amang'ana obhubhirikire mhiiri wazo, ⁵ niwe wiriihe omwene iguru wo omukari omusarya,iguru woomukari omugini wa amang'ana gobhwizerezetya. ⁶ Nikasungurirya murweero rwa mwidirisha rye enyumba yane. ⁷ Nikabharora abhaatu bhano bhatana enaro,muubhatu bhayo abhamura nikamurora omumura wuno atana obhwongo. ⁸ Omumura wuyo akahiringita neenziro muroobho mubhwikoonyo haguhi no omukari wurya,akagya munyumba yaye. ⁹ Kwibhaga rya nyanza,eribhaga rye engorobha,mubhutiku gati ne ekirima. ¹⁰ Akasikana nomukari wurya,yibhohiri kyoomusimbe,kumwoyo gwoobhung'enererya. ¹¹ Ahabha nekitiri kyo obhubhurya;amaguru gaye gatahoreri kumugye. ¹² Akagya muziroobho na mumutera,kira orubhara ahaganya kwookughubhirirya. ¹³ Kyamwe aramugwata nokumukumbata mukikubha,kwoobhusyo bhweezinguru akamubhurira, ¹⁴ Rero ndusirye akigiro kyookusengerera kyoobhwigwani,ndihiri emuma yane. ¹⁵ Kwego niziri kusikana nanawe,okubhumohya obhusyo bhwazo kwoobhurohererya,na bhoono nkubhweni. ¹⁶ Nteri emyendo gyookwarya iguru woobhuriri bhwane,kitani zye erangi kurwa Misri. ¹⁷ Obhuriri bhwane nsusutiryeku amaguta gano gakuhuza kisi ga manemane,udi no omudarasini. ¹⁸ Nauze,tunywe twigute kwo obhusegi bhwetu tee etabhori,tubhone obhuzomererwa bhukuru kwe amahokyo ga amega. ¹⁹ Kwookubha musubhe wane atareho yika waye,agiri rugendo rwakure. ²⁰ Agegiri esakwa yezihera;arakorya mumweri gati. ²¹ Kwa amang'ana gayo maru akamhizo;kwe minwa gyookwizerezetya akamuhokya. ²² Kwoobhutukirirania akamugyaku kye etang'ana yino ekigya kumsinzi,kye embarahe yino egwatirwe kwanguru, ²³ tee omubhwe gubharwe eriini ryaye,yari kyee kinyonyi kino kiryaariri kumuheto.Atamenyiri kubha obhuhoru bhwaye bhuramukongera. ²⁴ Nabhoono,bhana bhane,munyitegerere;muhokye amang'ana go omunwa gwane. ²⁵ Omwoyo gwazo gutakyoka mubhihito bhyaye;otahabhibhwa mumahito gaye. ²⁶ Akoriri bhatu bhaaru kugwa kwookunyaharwa;yitiri bhatu bhaaru. ²⁷ Enyumba yaye iriiguru weeribharabhara rino rikugya nyari;ererekera hasi mubhinyumba bhyiooruku.