¹ Amang'ana go omutemi Lemueli-amakumiriiryo gano yegiibwe nina wabhu. ² Mwanawane nihi?Niki omwana weenda yane?Niki omwana we ebhiroto byane? ³ Ezinguru zyazo otabhaho abhakari;bhano bhakusarya obhutemi bhwe enzira yazo. ⁴ Lemueli,noonywe amarwa,etari kwookubha yo obhutemi,etari kwo abhakangati okubhurya, ''ekigwatwa ekihari kiri hayi?" ⁵ Kwokubha aribha bharaanywa,bharebha erisinziro niiki, no okubhuurya obhuheene bhwa bhosi bhano bhanyaharibhwe. ⁶ Bhahane ekigwatwa ekihari abhatu bhano bhabhuriiri,amarwa kubhano bhakunyaharika no obhusungu. ⁷ Araanywa no okwebha obhutaka bhwaye atakuhita enyako yaye. ⁸ Kereenia kubhano bhatakunaagya okukerenia,kumasabho ghabhana bhosi bhakubhura. ⁹ Kerenia no osinzire kubhirengo bhye ehene,noosakiirye erisabho rya abhataka na abhatu bhano bhakuenda. ¹⁰ Omukari omukaari ni wewi akunaagya kumubhona?Obhuhoreru bhwaye ni bhwaaru kukira ebhigiro ebhizomu. ¹¹ Ekoro yo omusubhe waye eramuikirirya,atakubha omutaka. ¹² Aramukorera amang'ana amazomu ghatari amabhihu ezisiku zyosi zyo obhwikari bhwaye. ¹³ Arasora engibho na ethai,na arakoora amirimo gyaye gye amabhoko kwo obhuzomereerwa. ¹⁴ Ariho kye emeri ya abhakori bhe ebhiasara,arareta ebhyakurya bhyiaye kurwa kure. ¹⁵ Arimuuka eribhaga ryo obhutiku no okuhabha abhiakurya abhatu bha mumugye gwaye,nookusondya emirimo kubhahookya bhe ekikari. ¹⁶ Arariitegerera omugundu nokugugura,kwe eritunduguru rya amabhoko ghaye areemia omugundu gwe emizabibu. ¹⁷ Ewe omwene ariibhoka ezinguru no okukoonya amabhoko ghaye. ¹⁸ Araroora ni kihe kikureta obhuera obhuzomu kunewe,obhutiku bhwosi etara yaye atakuriimibhwa. ¹⁹ Amabhoko ghaye aragatuura kumukwaami gwo okuriiziriira obhuze no okugwatirira kyoo kuriiziriira. ²⁰ Okubhoko kwaye kurabhahikira abhatu abhataka ;amabhoko ghaye garabhahikira abhatu bhano bhakuenda. ²¹ Atakuobhoha omusoke kumuugye gwaye,kwookubha enyumba yaye yosigo ayibhohirye kwe engibho ekangaru. ²² Arakora amaaryo ge ekitanda kyaaye,nookuibhoha ezingibho ezinzomu zye ezambarau enzomu. ²³ Omusubhe waye amenyekeni mubhisyoko,hano akuikara na abhakaruka bhe ekyaaro. ²⁴ Arakora amibhoho amazomu no okugaguurya, nirareta emichipi kubhakori bhe ebhiyasara. ²⁵ Yiibhohiri ezinguru no obhusuhi,ne eribhaga rino rikuuza araseka. ²⁶ AArasama omunwa gwaye kwo obhusuki ne erisinziro ryo obhusambaruku riri kururimi rwaye. ²⁷ Araroora enzira ya enyumba yaye na atakunaagya kuurya amabhotoro go obhutobhu. ²⁸ Abhana bhaye bharimuka no okumubhiorikira bhwahene,no omusubhe waye aramukumia,arabhuga, ²⁹ ''Abhakari abharu bhakoriri bhwahene,nawe awe obhahitii bhosigo.'' ³⁰ Obhwihemi no obhung'enererya,obhuzomu no obhubhihu; nawe omukari wuno akusabha Eryobha,arakumibhwa. ³¹ Mumuhe eritunduguru rya amabhoko ghaye ne emirimo gyaye gimukumie mubhisoko.