¹ Gano ni amagano go Sulemani,gaagwatirwe na abhatu bha Hezekia,omutemi wa Yuda. ² Obhweeru bhwe Eryoobha bhurabhisa ering'ana,obhweeru bhwa abhatemi bhuramenyekereerya iguru wa amang'ana. ³ Kama erisaaro riri iguru weekyaro,ne ekoro yo omutemi etakurorwa. ⁴ Rusha obhuchafu kuzihera,no omuturi we ebhyooma aranagya kuhokeerya ezihera kubhuhokya bhwaaye. ⁵ Hamwe na gayo,mubharusyeho abhatu abhabhi kumutemi,neekitumbe kyaaye kiguru kirakorwa kwa makokyo mazomu. ⁶ Otaza kwikumya omwene kumutemi,nootimerera ahagiro hano hakoriirwe abhakuru. ⁷ Hakiriku wuno akukubhurira, ''Nauze hano' kuriko awe okwisuukya kumukuru. ⁸ Otamamana kutina kukino oruuzi.Kwokubha oraaza kukoraabhwi mubhuteero,eribhaga rino omunyarobho wazo akukusuukya? ⁹ Ihakanira omwene kumunyarobho wazo,otahaya siri ya mutu wuundi, ¹⁰ kama tigo uno akukwiigwa arareeta ezisoni iguru waazo kwa amang'ana amabhihu gano gatakutiigwa. ¹¹ Kukerenia amang'ana gano gakusorwa bhwahene,nkye edhahabu ino ekoriirwe kuzihera. ¹² Kye epete ye dhahabhu,naekigiro kino kikorirwe kwe dhahabhu enzomu,nigo okutwi kukurekiibhwa kwa bhuzomu. ¹³ Kye embeho emeezu eribhaga rye engesa,nigari omutu omuhene kubhano bhakumutuma,bharangaraara obhwikari bhwe ezimbwa zyaaye. ¹⁴ Kya amasaro no omukama guno gutana embura,nigo eri ku wuno akwihemeera omubhano guno atarusiirye. ¹⁵ Kwokwikong'ererya omwimereri aranagya kubhuriirwa amang'ana mazomu gokusakirya. ¹⁶ Hano arabhone obhuuki,norye bhwaaru,nahno okuurya bhwaaru bhukong'u oraruka. ¹⁷ Otagya wamunyaroobho wazo ibhaaga ryoosi,oramuniihya no okumutindya. ¹⁸ Uno akubhehera omunyaroobho waye ewe nkye erugu yookurwanira,au erisabha,nemibhwe emihari. ¹⁹ Okumuroreera omutu atari omuhene eribhaga rye enyako nkyerino erirweeri,no okuguru kwokutereera. ²⁰ Omutu uno arusirye ezingibho mumbeho,au nkyesumu ino eterwe mumunyu,nigo eri kuuno akwemba eryembo kuwekoro ekong'u. ²¹ Hano omubhihu wazo ana enzara,muhane ebhyakurya arye,aribha ne enyota mhane amanzi anywe, ²² kwego oramwitiriira amakara mumutwe gwaaye,na Yehova arakuhana omubhano. ²³ Obhuhene omukama gwa nyanza gurareta embura nigo omutu uno akuhurukya esiri arareta obhutindi. ²⁴ Ni hakiriku wikare mukona yo kwirongo kuriko okwikara nyumba imwe no omukari we eriyooge. ²⁵ Kya amanzi ge embeho kwenyota,nigo eri enyanza enzomu kureka ekyaaro kya kure. ²⁶ Kyo omusobhogo guno gusarikiri,nigo ari omutu omuzomu wuno akugwereno neno mubhatu abhabhihu. ²⁷ Etari bhuzomu kurya obhuki bhwaaru;kwego nkyokumohya obhuzomererwa kubhuzomererwa. ²⁸ Omutu wuno atakwitawaara nkyoomugye guno gukomokiri gutana rugito.