¹ Hano okwikara kuurya hamwe no mkangati,rora kwa bhung'eni kino kitangirwe kuneebho. ² hamwe ni mutu asegiri ebhiakura bhukongu tura ekigeeso mwigoti. ³ Otarohererya ebhinuru bhaayo kwokubha mbyakuurya bhya ruriimi. ⁴ Otakora mirimo bhukongu niho obhoone kiniibho;obhe no bhusuuki bhwo kwiisa niho omenye eribhaga rya kutiga. ⁵ Orikiriryo ezimooni zyaazo zirorere iguuru waaye?Eraagya,kwokubha eraruguura amabhabha kye tai no kwibhururuka mwisaaro. ⁶ Otariiya kiakuriiya kyauria anemoni embihu-nootabha nabhwobha bwa ebhinuru bhyaaye, ⁷ Nawe nio omutu wuno akusuuka amariho ge bhyakurya. "Okurya no okuunywa!"arakubhurira,nawe omutima gwaye gutari hamwe. ⁸ Oraruka kigiro kisuhu kino oriri orabha obhurirye omukumo gwaazo omuzomu. ⁹ Otagamba gati yo kwitegerera abhagege,araza kuzeera obhusuki bhwa amang'ana gabhu. ¹⁰ Otasamia igina rye kimenyekereryo kye ekare hamwe kutesha emigundu gya abhataka, ¹¹ nawe omutuurya waabhu no muheene nokubhahakania ekesi yabhu ku neebho. ¹² Yerekererye omutima gwaazo gati wo kwegya na matwi gaabhu kumang'aana gobhung'eni. ¹³ Otarekia kweegya omwana,hano oramuteme kwe himbo,atakukwa. ¹⁴ Nawe wuno okwenderwa kumutema kwa himbo no kuikoza omutima gwaye okukwa. ¹⁵ Omwanawane,kumutima yaazo gunezisoni,nosi omutima gwaane gukuzomererwa; ¹⁶ agiro hane mosi bhukong'u harazomereerwa bhukongu emiinwa gyaane hano gikugamba eheene. ¹⁷ Otikirirya omutima gwazo kubhaseega bhano bhakusaarya,nawe gendererya kumsuuka tatabhugya ezisiku zyoosi. ¹⁸ Heene okuganya kwaane ritakuurushibhwaho neezisiku zyaazo hano zikuuza. ¹⁹ Igwa-awe!-omwanawane,noobhe orasuuka nawerekeryeomutima gwaazo gati we enzira. ²⁰ Mtagwatana hamwe nabhagwatwa bha maarwa,hamwe abhari bhezinyama abhanaamba, ²¹ kwokubha omunywi wa maarwa nomunamba bharabha bhataka ne ezitiro zirabhibhisha na amanyamuku gomweenda. ²² Mwitegerere wise wenyu wuno akwiibhuuri notamuzeera nyoko wenyu kwibhaga ryo bhukungu. ²³ Yiguure eheene,nawe atuguurya,gura obhusuki,okusuka nokwimeenya. ²⁴ Uso wenye we eheene arazomererwa bhukong'u,wuno akumwibhuura omwaana wuno akusuuka aramuzomererwa. ²⁵ Muzomerye wise weenyu na nina weenyu na wuno akwibhuuri azomererwe. ²⁶ Mwaana waane,niha omutima gwaazo nezimoni zyaazo zisomereryo ezinzira zyaane. ²⁷ Kwokubha omusimbe ni iruma itaambi,nomukaari wo musubhe wo owundi nkitaaro kinyerere. ²⁸ Arazobha kyomusakuri no kwongeryo obhubhaaru arabhongererya obhwaaru bhwa abhaatu. ²⁹ Ninawe we enyako? Ninawe wuno akurugura?Niwi wuno akurwaana?Niwi wuno akwizumaangira?niwi wuno anebhiteme atarikung'aana?Niwi anezimoni ezikangaaru? ³⁰ Nibhano bhakwisuuka ku maarwa,bhaano bhakusakiirya kusanganiya amaarwa. ³¹ Otarorerera amarwa orabhe mkangaaru,neribhaga oranyeregeta nyeregeta kukisezo nokuhiringita kwa bhunyohu. ³² Kubhusinziro bhwaye bhuraruma kye enzoka ne eriogo ryaaye kye rihiri. ³³ Ezimoni zyaazo zirarora ebhigoro ebhindi noo mutima gwaazo guragamba ebhigiro bhyo bhuhaari. ³⁴ Orabha kya wuno ahindiri kunyaanza na kiego wuuno akuhindira kwikoonge.'' ³⁵ Bhanitemiri," orabhuga,''nawe ntanyaharikiri.Bhanitemiri,nawe ntigwiiri bhiteme.Ndabhuuka ryoori?Ndamohya kyo kunywa ekiindi.''