¹ Amarwa ni masakya na kyookunywebhwa ekikuru ni kyihi;wuno akubhura kwo obhunywi atana miseego. ² Okumwobhoha omutemi ni kyookwobhoha omwana wendwi wuno akuruma,wuno wosi akumutindirya ararusya enzagu yoobhuhoru bhwaye. ³ Ni bhusuuki kumutu wowosi wurya wuno atakwikirirya obhuhabhani,nawe kira omugege arabhururukira kuzihaka. ⁴ Omutu omutobhu atakurima kwibhaga ryoo muhaya;aramohya ebhyakurya kwibhaga ryeerigesa nawe atakubhona kigiro. ⁵ Amisego mwosi mumwoyo gwoomutu ni kya amanzi ga ahagiro ahatambi,nawe omutu wuno anaobhung'eni aragataha. ⁶ Ibhaga ryaru omutu arabhuga ewe ni muheene,nawe niei wuno akutura okumubhona wurya omuheene? ⁷ Omutu wuno akukora eheene aragenda mubhuheene bhwaye na abhaana bhaye bhano bhukuzaho eribhaga erindi bhano bhuzomererwa. ⁸ Omutemi wuno akwikara kukitumbi kyoobhusinziro hano arakore emirimo gyoobhusinziro arahunga kwa ameso gaye,amabhihu goosi ghano gariembere waye. ⁹ Niwi akunagya kugamba, "omwoyo gwane nikoriri gurabhiri;ndimuhuha neebhibhi bhyane"? ¹⁰ Eratiri yeetuubho yindi neebhirengo bhino bhitari kisi-Tatabhugya arabhabhihirirwa bhyoosi. ¹¹ No omumura aramenyekana kwa amahokya gaye,na eteemwa yaye aribha ni nzomu na yobhusuki. ¹² Amatwi gano gakwigwa,na ameso gano gakurora Tatabhugya akagatema gosi. ¹³ Otasega ezitiro orabha mutaka;ramukya ameso gazo orabha neebhyakurya bhyaaru. ¹⁴ "Mbihu! Mbihu!'' arahaya omuguri,nawe hano akurwaho arikumya. ¹⁵ Ereho ezahabhu na amagina goobhwera,nawe iminwa gya amang'eni ni akagina koobhwera. ¹⁶ Gega eribhoho aribhamweneryo arateeho ezihera okuribha esiiri yino omugini akutumibhwa,rigege aribha arariteho kuribhira esiiri yoobhusebheti. ¹⁷ Omukate guno gubhonekiri kwoobhungenererya guna obhusambaruku mumunwa,nawe kwibhaga isuhu omunwa gwaye kurizura obhukomogo bhwa amagina obhusuuhu. ¹⁸ Amiseego garakongibhwa kwo obhukerenia bhwookwigwana na kwo obhurangiriribhwa bhwa amang'ana amazomu orarwana eriihi. ¹⁹ Omubhehi arabhuurana eriku kweego atakwenderwa kugwatirana na abhatu bhano bhakugamba bhukong'u. ²⁰ Aribha omutu aramwihima wise na nina wabhu,ekimuri kyaye kirahemberwa mukiirima gatigati. ²¹ Engabho yino ebhonekiri bhwangu kubhutangiro,erabha na amazomu kusuhu kubhuteero. ²² Tiga kubhuga ''Enye ndakurihya kwiisaryo rino" mganye Tatabhugya ewe arakutuurya. ²³ Tatabhugya arabhihirirwa na eratiri yino etari kisi ne ebhirengo bhyoo kung'enererya bhitari bhizomu. ²⁴ Amatambuka goomutu garakangatwa na Tatabhugya;ni tubhooki araimenye enzira yaye? ²⁵ Nimheto kwoomutu okugamba kwo okuhurumka, ''Ekigiro kino ni kyoobhwaare'' no okutanga okwiseega iguru waye kubha kinabhureraki hano oramare okurya emume. ²⁶ Omutemi wa amiseego amazomu arabhahukania abhasarya na aragarabhura iguru wabhu erigata ryookuhurira. ²⁷ Ekoro yoo mutu nikimuri kya Tatabhugya,eratugukurya kira ahagiro mwosi waye. ²⁸ Obhurage bhwoo bhuheene no obhwiteeho bhuramuriha omutemi;ekitumbi kyaye kya kirakeego kirakorwa kikong'eru kwoobhusegi. ²⁹ Ubhwaare bhwa abhatu abhamura ni nguru zyabhu na obhuzoma bhwa abhaatu abhakaruka ni ezimbwe zyabhu. ³⁰ Ebhiteme bhino bhikukora amagaati bhirogya obhubhi no obhutema na akahimbo akasuuhu bhurakora ezimbara zya mwosi kubha nzomu.