¹ Wurya akwiyahura aramohya amaghana ghaye omwene arahakana na amasinziro ghosi ghe ehene. ² Omugeege atakubhona obhuzomererwa mubhung'eni,nawe arakundukura kino kiriho mukoro yaye. ³ Omutu omubhisa hano akuza,enzeri eraza hamwe na newe-hamwe ne ezisoni no okuisegera. ⁴ Amang'ana gho omunwa ghwo omutu ni amazi ghe ekiryonga ekitambi;omusobhogo ghwo obhung'eni ni omugeri ghuno ghukugera. ⁵ Bhutari bhuzomu kubha no obhuseghi kumubhisa,nawe atakwenderwa okuanga ehene kubhano bhakukoora amazomu. ⁶ Emiinwa gyo omugege girareta okutema okuigwana no omunwa gwaye gurareta amatemo. ⁷ Omunwa gwo omugege niiobhusarya bhwaye bhurigwatya muminwa gyaye. ⁸ Amang'ana go omubhehi ni kye echembe enzomu garituma ahagiro ha mwosi hene kumubhiri. ⁹ Bhono,wuno ni omutobhu kumirimo gyaye ni omuhiri waye wuno akusarya bhaaru. ¹⁰ Erina rye Eryobha niekigwatiriro ekikong'u,wuno akukora ahene arariaririra no okubha hazomu. ¹¹ Ebhigiro bhyo omunibhi niomugye gwaye omukong'eru kumisego gaye ni kye ekibhambazi ekitambi. ¹² Ekoro yo omutu erabha ne ekisubhe hingayo okuugwa kwaye,nawe obhunyoheru bhurakangata inyuma yo obhunyohu. ¹³ Wuno akukyoora inyuma wo okuityegerera-ni obhusarya ne ezisoni zyaye. ¹⁴ Ekoro yo omutu erituurya na amabhihu,nawe ekoro yino ekozirwe niwi akunagya kuiganyirira? ¹⁵ Ekoro yo omwene obhuongo erabhono obhung'eni no pobhuitegereri bhwo omwene amisego aragamohya. ¹⁶ Omubhano gwo omutu guranaagya okukoora enzira no okumureta embere yo omutu omuhene. ¹⁷ Wo obhwemero okuisakirya kubhusemwa bhwaye ararorekana kubha ne eheene tee omubhi waye yiize no okumubhurya amakyooro. ¹⁸ Okutema ezikura kuramara amahakano okunyaragania abhahakani abhakong'u. ¹⁹ Omuhiri wuno abhihirirwe nioomukong'u okutongera kukira omugye gweezinguru,no okuruana muigobhe. ²⁰ Enda yo omutu eriguta kuurwa muitunduguru ryo omunwa gwaye;arigutiribhwa na amageswa go omunwa gwaye. ²¹ Obhuhoru no oruku bhirareetwa no orurimi,na bhano bhasegiri orurimi bharaarya eritunduguru ryaye. ²² Wuno akubhona omukari arabhona ekigiro ekizomu no okubhiona amazomu kuurwa kuu Tata. ²³ Omutu omutaka arasabha ebhigoongi,nawe omutu omunibhi arakyoora kwo obhuhari. ²⁴ Wuno akuikora kubhasani bharu bharamureta kubhusarya,nawe ariho omusani wuno akubha haguhi kukira omuhiri.