¹ Omwana omusuki arigwa amegyo gawise,atakurekibhwa ng'ana. ² Omutu arazomerwa nebhigiro ebhizomu bhya amatunduguru gomunwa gwaye,kwokubha abhang'eniriribhwa nibhabhi. ³ Wuno akuribha omunwa gwaye okuribha obhwikari,wuno akwasama omunwa gwae aranyaharika omwene. ⁴ Okurohererya kwaabhatu bhatakubhona kigiro,kwokubha abhatu bhomukya bhariswa. ⁵ Omukori wa amazomu arabhihirirwa norurimi,kwokubha omtu omubhihu arahakana omwene,nokukora okusukya. ⁶ Wobhuhene bharabharibha bharya bhanobhobhuhene kuzinzira zyabhu,obhubhi bhuragwisha bharya abhakori bha mabhi. ⁷ Ariho omutu wuno akwinibhya omwene,nawe anyora atana kigiro,naariho omutu wuno akurusha kira ekigiro,noranyora nimunibhi hene. ⁸ Omutu omunibhi aranagya kwiturira erikuru ryobhwikari bhwaye kwebhigiro bhaye,omutu omutaka atakwobhoha kyokyosi. ⁹ Obhweru bhwo mutu omukori wa amazomu arazomerwa,nawe ekimuri kyo bhubhihu kirarima. ¹⁰ Ekigoti kiribhura okunyaragania,kubhano bhakwigwa bharasuka. ¹¹ Wuno akwihema obhunibhi bhurahwa,unewe akubhona ezihera kwokukora emirimo kwa mabhoko gaye ezihera zyaye zirongerya. ¹² Hano otisegiri omtima kurakwa,hano okumara orazomerwa nomti gyo bhuhoru. ¹³ Wuno akuzera abhegya arabha iyasi yobhukangati bhwaye,uno akusuka erihatike arahabhwa omubhano. ¹⁴ Amegyo gomutu omusuki niyekisabhuko kyo bhuhoru,girarushaho emitego gyoruku. ¹⁵ Amang'eni amazomu garareta obhera,enzira yo mbehi etana bhutero. ¹⁶ Abhatu abhang'eni bharakora kwa mang'eni kwo bhwamuri,ilamugege arerekya obhugege bhwaye. ¹⁷ Omutumwa omubhihu aragwera munyako,omukangati wobhuhene arareta omugwatani. ¹⁸ Wurya uno akuzera arabhona obhutaka nezisoni,okusuka kuramwizera omwegibwa kureka okukyorera. ¹⁹ Obhuzomerwa bhuno bhumenyekeni kuzomu nenyota,omugege aratinda okutiga obhubhi. ²⁰ Genda hamwe na bhatu abhang'eni wosi orabha mung'eni,ila omusani omugege aranyaka. ²¹ Oruku ruraryarira abhabhi,ila abhakori bha mazomu bharahabhwa omubhano muzomu. ²² Omtu omuzomu aratiga ubhugabhi kubhazukutu bhaye,ebhigiro bho mutu omubhi bhiraturwa obhuhoro akukora ehene. ²³ Omugundu gyo mtaka guno gurimire kuranagya okwibhurya ebhyakurya bhyaru,ila aragegwa kwo uzurumati. ²⁴ Wuno atakumkyora omwana aramubhihira,wuno asegiri omwana wae aramugania nokumukyora. ²⁵ Ewe wuno akukora eheene ararya tee okwiguta ehamu yaye nawe enda yoomubhihu erizura kuzisiku zoosi.