¹ Yehova aragenie ne ebhireengyo bhino bhitari kisi,nawe aragomerwa ne ebhireengyo ebhizomu. ² Hano kikuuza ekigoti bhukuuza neho okusukibhwa kukuuza,no obhwihoombi bhurareta amang'eeni. ³ Obhusuki bhwabheera bhurabhakangata,nawe okubheeha kwabhabheehi kurabhiita. ⁴ Obhuniibhi bhutaari na bhweera orusiku rwookukomera,nawe kwokutemya amazomu kurakuriibha no oruku. ⁵ Orugendo ro mutu omuzomu ruragororokya enzira yaaye,na abhabhisa bharagwa kwokubha ya amatemyo amabhihu gaabho. ⁶ Orugendo oruzomu robharya bhamseegiri Eriobha rurabhanibha kisi,nawe abhabheehi bharagwaatwa noomukya ghwabhu. ⁷ Omuutu omubhihu hano hakuhwa,okwisega kwaaye kurabhura no obhwiseegi bhuno kumanaga gaaye kurabha kutari na bhweera. ⁸ Wurya akutemya amazomu araribhwa kunyaaku na kukiraniaa enyaaku yaaye eramugyaku omubhisa. ⁹ Kumunwa gwaaye wuno atakumwikirirya Eriobha yahiita omwatani waaye,nawe amang'eeni gabhano bhakutemya amazomu bhaniibhibhwa kuzomu. ¹⁰ Hano bhakuniibha abhatemya amazomu,ebhyaaro bhirazomerwa,abhabhisa hano bhakukwa,abhaatu bhakura ekweeri yokuzomerewa. ¹¹ Kwo mubhano omuzomu gobharya bhakuzomera Tatabhugya,omugye gurabha mkuru;kuuminwa gya abhabhihu omugye guranyagana. ¹² Omtu wobhusiinaku kwomusaani waaye atari na mang'eeni,nawe omutu wa amang'eni arakirirania. ¹³ Wuno akuzya arinaara nenzerero arakunura embisaki,nawe omuutu omung'eeni arakirirania. ¹⁴ Hano bhutakubhaho obhukangati bhwa amang'eeni.ekyaaro kiragwa,nawe obhukundi bhuraaza kwo kwikirirania na abhaandi bhaani. ¹⁵ Omutu wuno akumukoperya omuginyi arabhona enyaaku,nawe wuno akwanga okwituura rahani arabha kisi. ¹⁶ Omukari we bhigongi arashuka nawe abhaatu abhateregenu bharaangwa no obhunibhi. ¹⁷ Omutu wuno atana mwooyo araniibha omwenigo,nawe woomoyo aranyaharika. ¹⁸ Omutu omubhihu arabheehya kubhona amariho gaaye,nawe wuno akuhokya amazomu ararihwaa kwo bhuheene. ¹⁹ Omuutu omuheene hano akutemya geheene ariikara bhuhoru,nawe wuno akutemya amabhiihu ariitwa. ²⁰ Yehova atakubhasega,bhekigoti kukoro,nawe yabhasegiri bhezinzera zigororokiri. ²¹ Ubhe nobheene kworino,abhabhisa bhatakubhurwa ebhiteme,nawe ezinyobhuro zya abharema abhatemya mazomu bharabha kwo bhuhoru. ²² Nkye epete ye dhahabhu kurinyweeri re embiizi niego ari omukari omuzomu wuno atari nobhung'eeni. ²³ Omweeko gwa abhatemya mazomu,arabhona obhweera obhuzomu,nawe abhatu abhatemya mabhiihu bhanyaharibhwa na amabhiihu. ²⁴ Wuno akweemya embhibho-aragesa bhyaaru;owundi atakweemya embibho wuyo aratakaha. ²⁵ Omutu wuno atanamwoyo arabhona bhyaaru,na wuno akuheeni abhaatu amaanzi arabhona amaanzi gaye omweene. ²⁶ Abhaatu bhara mwihime wuno atakugurya ebhyakurya,nawe omugiri wo kusurya ebhyakurya arabhona abhweera bhuno akukomya. ²⁷ Wuno akukomya amazomu kumanaga,omenye kubha arakomya kwikiriribhwa,nawe wuno akukomya riyoge arabhona enyaako. ²⁸ Bhano bhakwitindira obhuniibhi bharagwe,nawe nkya amato,bhano bhakutemya amazomu bharanyeregeta. ²⁹ Wuno akureta eriyoge kumugya gwaaye aragabha obhukama,no omugege arabha omutomwa we ekoro yo bhung'eeni. ³⁰ Bhano bhakutemya amazomu bharabha nkya nkyo omuti gwobhuhoru,nawe eriyoge rirateesha obhuhoru. ³¹ Rora!hano bharya bharatemya amazomu bharabhona kino bhakwenderwa,kubhano bhakutemya amatemyo mabhihu bhatakubhona amabhuhu makuru!