¹ Pauro akabharoora kimwe kimwe abhatu bhe eribharaza akabhuuga. Abhahiiri bhaane nikeeri haguihi ne Eryoobha kwa kooro nzoomu reero. ² Omusengeri omukuuru Anania akabhahamurisha bhaano bhimereeri haguuhi na neewe bhamuteme omuunwe gwaaye. ³ Niho Pauro akamubhuriira, Eryoobha rirakuteema awe orugiito ruumo ruhakiirwe echakaa, wikeeri oraatima kwe emigiro, woosi orahamurisha nteemwe kutiiga emiigiro. ⁴ Bhhno bhaari bhimereri haguuhi na neewe bhakabbhuga, kumbe nigo okumutuuka omusengeeri omukuuru we Eryoobha? ⁵ Pauro akabhuga, bhahiiri bhane enye ntamenyiri kubha uno ni omusengeri omukuru. Kwo kuubha ekamiirwe otakukerenia bhubhihu iguru wo omutawaane wa abhaatu bhaazo. ⁶ Pauro haano yaruuzi kuubha orubhaara oruumwe rwe eribharara ni masadukayo na abhandi ni mafarisayo, akongeerya eriraaka akabhuuuga, bhahiiri bhaane enye ni mfarisayo, omwoona wo omufarisayo, kwookubha ndamahiiirira obhuhaari bhwo okuryooka abhaaku bhaano nkuhukumiirwe nabho. ⁷ Hano yagambiri gaayo iyooge ikuuru rikabhooho rya mafarisayo na masadukayo no omukutano gukatwanikaana. ⁸ Amasadukayo garabhuga bhuryooki bhutareeho, maraika, hata ekoro etareho amafarisayo bharabhuga gaayo goosi gaariho. ⁹ Iyooge ikuuru rikabhooho na abhakereenya abhamwe bhano bhaari orubhara rwa amafarisayo bhakimerera na kukerania bhakabhuga tukyaari kuroora ng'ana mbiihukumuutu uno. Nibhuri au ekoro, au maraika akereenie na neewe? ¹⁰ Eribhaaga rino ekabhooneka eng'ana ekuuru, omukuru wa abhasirikare akobhooha kuubha Pauro yaratimwa matiniika na neebho, kuugayi akahamuriisha abhasirikare bhituunie iyaasi bhamugeege kwa nguuru kureeka kuubhajumbe bhe eribharaaza bhamureeta mwigereeza. ¹¹ Obhuutiiku bhuno bhwafatiiye akimerera haguuhi na neewe akabhuga, otabhoha kwookubha onduuzi Yerusaremu, kweego orarusia obhuheene hata Roma. ¹² Hano kwekiri Abhayahudi abhamwe bhaarya omuunwa na kibhiriikira eraana iguru waabhu abheene. Bhakabhuuga bhatakuurya waara kuunywa kyokyoosi kiirya mpaka haano bharamwiite Pauro. ¹³ Bhaahabhooho abhaatu zaiidi ya miringo eene bhaano bhakariri amang'eeni gaayo. ¹⁴ Bhaakaagya kubhaakuru bha abhasengeri na abhakaruuka bhakabhuuga. Twiteeri abheene kuroorana ekuuru, tutarya kyokyosi mpaka hano turamwiite Pauro. ¹⁵ Kweego, eribharaza rimubhurire omukuru wa abhasirikare abharetereewe kwookubha etwe twamuuri kumwita kwibhaga rino akyari kuuza haano. ¹⁶ Omwana wo omusubhati waye na Pauro akigwa kubha gakoriirwe amang'eeni akagya akasikiira mwosi we eseng'eenge akamubhurira Pauro. ¹⁷ Pauro akamubhirikira akida uumwe akabhuga, mumugege omumura wuno kuumkuru kwokubha ana ering'ana rya okumubhurira. ¹⁸ Akida akamugeega omumura uuyo akamuhiira kuu omukuru wa abhasirikare akamubhurira, Pauro omubhoohwe akambirikira akeenda nikuretere omurooro kwaawe, ana ering'ana ryo okukubhurira. ¹⁹ Omukuru akamugwata okubhooko akagya nawe embariika akamubhuurya. Ni kigirooki okweenda kunibhuriira. ²⁰ Omuumuurooyo akabhuga, abhayahudi bhikirireenie kukusabha tabhoori omureete Pauro mwibharaza kwokubha bhareenda kubhoona amang'ana gaaye bhuzomu zaidi. ²¹ Otaza kwikiriirya kwo kubha abhaatu zaidi ya miroongo eene bharamumoohya bhwibhisi. Bhigwatiri eraana, bhataarya waara bhataanywa mpaka haano bharamwiita. Mpaka bhoono bhaari tayari bharaganya oruguusa rwazo. ²² Omukuuru wa abhasirikare akabhatiga omumurooyo akagya zyaaye, hano yamutemeenie, otamubhiriira mutu wowosi kuubha omburiiri gaano. ²³ Akabhiriikiira maakida bhabhiiri akabhabhuriira bhatayariishe bhasirikare magana abhiri kuugya Kaisaria, na abhasirikare abhezifarasi mirongo muhungati, bha amatiimu magana abhiri, muriimuka ezaamu ya kataatu yo obhutiiku. ²⁴ Abhabhirikira kutuura haayo ezityeenyi zino Pauro akamutiimira na kumugeega bhuzoomu ku Feliki Gavana. ²⁵ Akakaama enyarubha kama iino. ²⁶ KlaudiaLisia ku liwali wiiguru Feliki ndakukeerya. ²⁷ Omutu uno akagwatwa na abhayahudi, bhahabha haguuhi kumwiita niho nkagya hamwe ne ekikosi kya abhasirikare nkamuhoonya, hano nkabhoona amang'ana kubha ewe ni mwikari wa Kirumi. ²⁸ Nkenda kumenya kwaki bharamuseema, niiho nkamuuhiira mwibharaza. ²⁹ Nkaroora kubha esemiirwe kwokubha yo okubhuurya emuuma yaabhu atasemirwe kwing'ana ryoryosi rino rikwenderwa kwiitwa waana kubhohwa. ³⁰ Ekemenyekana kuneenye kuubha bharamukoreera mang'eeni kuneewe nkakoora bhwaangu nkamutuuma kuu nawe na kubhatumanuia bhano bhakumusema bhareete amasemo gaye kunaawe bhakaragana. ³¹ Abhasirikare bhakikirirya ehamuuri, bhakamugeega Pauro bhakamuhira Antipatrio, obhutiku. ³² Orusiku runo rukafata abhasirikare bhaaru bhakabhatiga abhatiiri bhe ezifarasi bhakagya hamwe bhaagye hamwe na newe, na neebho bhakakyoora mukambi. ³³ Na abhatiiri kuzifarasi hano bhahikiri Kaisaria, na kumuhana Liwali enyarubha bhakamutuma Pauro embere waaye. ³⁴ Hano Liwali akaisoma enyarubha akamubhuurya Pauro, arekiiri ijimbo riihe, hano yameriiri kuubha ni mutu wa Kilikia. ³⁵ Akabhuga, ndakwiigwa awe hano bharaze bhano bhakusamiiri, akarusya ehamuuri atuurwe muhofiisi ya Herode.