¹ Poshe ulo ulufingwa uwa udwandilo izalilina isehemu iya ibada epa piwelelo isunde idya ibada. ² Vine kumimba iza kulima ichumba chandaliwe, lemba icha pazi, pitwile ieneo idya usokofu ku eneo hili izapalimi itala, imeza iya imikate iya lolesha. ³ Na panuma iya ipazia idya umili iaakulina ichumba chinji, iza patwile ieneo idya usokofu achisini. ⁴ Iza mulipalutale iya idhahabu iyafusha uvumba, poshe ulo iza kulima isanduku idya ulufingwa, lene lizyengiliwe kuidhahabu ndupu, nkasi yakwe iza kulini ibakuli idya idhahabu ndyane lilina imanna, isazu iya u Haruni yene ilembile amatundu, na zila imbao izya amwe izya ulufingwa. ⁵ Palulu pisanduku idya ulufingwa aidwauoneko iya amaselafi uwa utimu wakupikila imbawa zyao pamiso iya ichiti icha kwinganiko, chene izalizi sanga tulandaila vinonu. ⁶ Pene ivindu ivi vyandaliwa, ambwilagu kukawaida, wakwinjilaya ichumba icha pazi icha inumba kufunya ihuduma zyao. ⁷ Poshe ulo umbwilangu Unkali akwinjila ya chila ichumba icha uwili chicho lulumu chila mwaka, nanga kuleka kufunya idhabihu kwaajili iya kulumwene adyumu, na kuwi uwa awandu zyene walongile nanga kukwivwambila. ⁸ Umoyo uwa Chilimbano umalola kukuti, laila iya pachitimbano ichisini ichili itakupuliwa vine inumba iya udwandilo ichili yimilila. ⁹ Izya yene amalinganizyo iya isambo hili. Zyosi indupo papamwi ni dhabihu zyene zifunywa isalizi sanga vimala amanani iya unsalilaji. ¹⁰ Iviliwa ni vimwelelo zyene visanganiwe kunamna iya amasunde izya ibada iya kukwikusa, zyosi hizi iza zilina amasunde iya umbili vyene vyandaliwe pakize isunde ipya yene ilawikwe kukwakwe. ¹¹ Ukilisito aizile changati umwilagu Unkali uwi imbola inonu yene yizile, kufumila ku unkali nu ukamilifu vwa unumbi kulu yone iza italongeliwa kumikono iya awandu, wene kasi awa piwelelo wene ulinganizye. ¹² Iza kasi ku ulanda uwa imbuzi ni ngwanda, bali kuulanda uwa kukwakwe kukuli Ukilisito aingilile ieneo icha chitimbano ichisili lulumu kwa chila undu na utudhilisishizye aipulushi mtu uwa isiku zyosi. ¹³ Nge kuulanda uwa imbuzi na adumbwe na kuwa sasila ku amatwitwi iya ngwanda kuwala wenewilu awapeuliwe ku Umulungu na kuwika imimbili imyelu, ¹⁴ Je kasi ichisini ulanda uwa Ukilisito mwene kufumila ku umoyo uwa isiku zyosi wifunyizye mwene bila imidyungu ku Umulungu kukwelufya umanani yitu kufuma ku amatendo amafu kukunzumilila Umulungu mwene akwikalaya? ¹⁵ Chavine lo, Ukilisto mwene undanganizyi uwe ulufingo umbya. Hii yene isababu iya ufwile iwalelelile wosi wene ulufingo uwa udwandilo kufuma kuuwi iya amawi, ili kuwala wene witwile nu Umulungu waneye kusenda ulufingo uwa upyani uwa isiku zyosi. ¹⁶ Nge kula ulufingo dwene dukwikala, imatakiwa kudhibitisha ku chifo ichamndu yula umwene alongile. ¹⁷ Vine ulufingo alinamaka kueneo dyene ufwile umafumila, vine kutakolaamaka kwisambo mwene kulilonga amakwikala. ¹⁸ Nanga ulo kasi lila ulufingo udya udwandilo iza dyawikwa bila ulanda. ¹⁹ Pene u Musa afumizye chila lufingo uwa amasunde kuwandu wosi, asendile ulanda uwa ngombe ni mbuzi, papamwi na amazi, ichitambala chichemamu, ni hisopo na kuwasasila igombo dyene na awandu wosi. ²⁰ Kalinji atezile, '' Hii iyene ulanda uwa ulufingo wene Umulungu awapile amasunde kuminu.'' ²¹ Kuhali yiyila, asasile ulanda kululu pinumba ni vindu vyosi vyene vyatomiwe kuhuduma iya umbwilagu. ²² Vine amasunde, papipi chila chindu kikweluvya ku ulanda. Bala kufunya ulanda kutakola umsamaha. ²³ Ngani iza ilazima kukuti inaleala izya vindu iya kululu isunde dyakwe dyelufye ku dhabihu yene inonu icisini. ²⁴ Ngani Ukilisito alinjilila ieneo dyene lilina usokofu ichisini pene palongiwe ni imikono, yene inakala iya chindu chene. Linge winjila kululu, kwene isalizi alikumiso iya Umulungu kuajili iya kulusweswe. ²⁵ Atinjile kula kuajili iya kukwifinya indupo kuajili iya kulumwene kawili kawili, changati vine amalanga umbwilagu Unkali, mwene papamwi nu ulanda uwa winji, nge iza izya mwene, ²⁶ ngete yawi ilazima kupata ainagayo ichidini kufumila udwandilo uwa piwelelo. Lakini isalizi lulumu hadi usililo uwa imiaka yene yikupula kufunya amawi kudhabihu iya kulumwene. ²⁷ Changati kuchilandu kukufwa lulumwi, nange nge wafwa ikwizaya ihukumu, ²⁸ Chavile ulo Ukilisito mwene afunyizywe lulumu kufunya amawi izya awinji, afumile udwa uwili, kasi ku kwadi idya kulongela imbi, bali kuupulushi kuwala wene wamametekela ku isaburi.