¹ Ulo izumilo yene ihaki yene alinayo undu pine wavwamba ichindu chimwi kuyimbu. ² Izya mwene kuchindu chene chichili chitaonekana. Poshe ulo asokulu witu wilondizye kwizumilo dyao. ³ Kwizumilo tumanile kukuti uwelelo waumbwe kuamri iyaka Mulungu ngani kuulo chene chiloleka chitatengenizywe kuvindu vyene alinge viloleka. ⁴ Alinge kusababu iyi zumilo kukuti u Habili wamfunyizizye Umulungu indupo yene ifwayile kuleka vino walongile u Kaini. Alinge kusababu iyi wantogwile kukuti yene unsokofu. Umulungu wantogwile kundupo zyene waletile. Kuwulo, u Habili achila wa panga, poshe vino wafwa. ⁵ Alinge kwizumilo kukuti u Enoko wasendiwe kululu alinge atauona ufwile. ''Ataonike, kuvino Umulungu wansendile'' kuvine wateliwe kukuti wanonizye Umulungu kabla iyasendiwe kululu. ⁶ Pine patakola izumilo itawezyekine kukunonezya Umulungu, kuvino yene aizile kwa Mulungu izyamwene azumila kukuti Umulungu ukwali na kukuti awapizaya izawadi wene wakumuwamba. ⁷ Alinge kwizumilo kukuti u Nuhu, alinge wafudwa nu Mulungu kuhusu amambo yene alinge wazyengile isafina ngani awapalushe aluko dwakwe. Vino wawikile ulo, wauhukwime uwelelo nu kukuwa umpyani uwahaki yene ikwizaya kupitila izumilo. ⁸ Alinge kwizumilo kukuti Hibrahimu, pono witiwe wazumile kuwala kwele alinge amavwambiwa akawe changati ufumpyani. Wafumile nuku atamana kweni kwene azile. ⁹ Alinge kwizumilo kukuti wikile kusi iya ahadi ngati unjeni, wikile ingambi papamwi nu u Isaka nu Yakobo, apyani ani yao awa ahadi yiyila. ¹⁰ Ngani yavwambiwe kuyipata ikaya yene mwene abuni uzyengi wakwe akuna Umulungu. ¹¹ Alinge kwizumilo kukuti u Ibrahimu, nu Sara unkala, watengine amaka ayasenda inda nanga vino alinge achikulu ichisini, vino wazumilile kukuti yene unsokofu, yene wawafingilile kuwapa umwana uwachilume. ¹² Ngani kufuma kwandu uyu adyumwi yene alinge apalamile kukufwa walwliwa awana wene sanga uwawazye. Walinge awinji changatiizota izya kululu ni mbeyu izya lusanga imbelo ya lukuwa. ¹³ Ewawasi alinge walimwizumilo nanga vino iza watatangana iahadi. Poshe ulo, alinge waziona na kuzitimbanila kutani, wazumile kukuti alinge ayeni na apitazile palulu yasi. ¹⁴ Kuwene wapanga inongwa changati izi izyamwene wakwilondezya kukuti wavwamba isi yao akala. ¹⁵ Izyo mwene, ngati iza wakwelenganya isi ya yene wafumile, alinge walininafasi iya suwa. ¹⁶ Ngati vino ili, walumwa isi yene ilinusokofu, yene, iya chiumani kuvivyo Umulungu ataona yazikukwitiwa Umulungu wao, kuvino alinganizyo ikaya yao. ¹⁷ Alinge kwizumilo kukuti u Ibrahimu baada iya yozyiwa, wamfunyizye u Isaka izyamwene, umwene yene watengine kwiseko iahadi, wanfunyizye umwanakwe adyumwi, ¹⁸ yene kulumwene wapangiwe, kufuma kwa Isaka ululelo lwako lukwitiwa.'' ¹⁹ UIbrahimu wamanile kukuti Umulungu alinge alinuwezyo uwakumpulusha u Isaka kufuma kwa fwile, na ukwapanga iluga iya maumbo, wantangine. ²⁰ Alinge kwizumilo kukuti u Isaka wantimbanile u Yakobo nu u Esau kuhusu ni nongwazyene zizile. ²¹ Alinge kwizumilo kukuti u Yakobo pine alinge wapalamila kukutfwao wantimbanile chilandu kuwana wa Yusufu. UYakobo watimbana, nuku asentime palulu ya nduwa yakwe. ²² Alinge kwizumilo kukuti u Yusufu isambo dyakwe dya kufuma kwa wana wa Israeli ku Misri na kwalagiza kusenda papamwi nao amafupa yakwe. ²³ Alinge kwizumilo kukuti u Musa pine waledwa, wapisiwe kunyezi itatu na lezi wakwe, vine wambwine kuku umwana umemba yene alinge unsokofu, walinge watatina iamri iyaka mwene. ²⁴ Alinge kwizumilo kukuti u Musa pine wawaundu unkali, wakanile kukwitiwa kukuti umwana wa mwalili uwaka Falao. ²⁵ Kuulo wachagwile kukwikala kumagayo papamwi na wana wa Mulungu badala iya sekela ianasa izyambi kwisambo itani. ²⁶ Welenginye iyaza idya kunkonga Ukristo yene udumbwe ukulu fuleka ihazina izya Misri kuvino walolekisha amiso yakwe kundupo izyisambo dyakwe dyene lizile. ²⁷ Alinge kwizumilo kukuti u Musa wafumile ku Misri alinge atatina uluyeso udwa mwene, vino wayimbile ikwalolekesha kwa yene ataloleka. ²⁸ Alinge kwizumilo kukuti walemile ipasaka na kusasa ukuda, ngani unduwezi aledwe awakwanza awa chilume ku Israeli. ²⁹ Alinge kwizumilo kukuti wapitile kulukuwa udwa shamu ngati kuukavu ngani a Misri pine wayozyizye kupita wamizidwe. ³⁰ Alinge kwizumilo kukuti uluwumbaudwa Yeliko dwawile pasi, baada iya upilima kusiku saba. ³¹ Alinge kwizumilo kukuti u Rahabu yane alinge ukuwi alinge alafwa papamwi na udwa wene nalinga kasi asokofu, vino kuwawika yaunonu. ³² Ngani ndele umichisini? Vino isambo litakwila kumlandaulila zyosi izya Gideoni, u Barak, Samsoni, Yeftha, Daudi, Samwel nizya aklagu. ³³ Wene kupitila izumilo wawapotile amwene, walongile usokofu, na kutangana ulufingwa nakuikana imindomo iya samu, ³⁴ wazimizye amaka ya ndilo, wakwepile ukali wa dwambi, wapulishwe kufuma kuwinu, alinge ayimbu kudwani, na waletelizye aluwi awinji kuchimbila . ³⁵ Achichima tatangine afwile wao kuzila iya upulushi. Awanji wagazyiwebila kulekwa nyani wapate uzoefu uwaupulusho uwachi usokofu. ³⁶ Awanji wagazyiwe kwibyedo nukwe kapwa, naam, nukwanyepwa nukwa nyepwa mwidyeselo. Walambilwe namawe. ³⁷ Wawengiwe ivipande kumisumeno. Wawakoninge kulwambi. Wazile kungwembezya ngozi ni ngwembe zya mbuzi walinge avwambi, wendelie ku wavi kulongeliwa amawi. ³⁸ (Yene uwelelo atuvwambiwe kukumanayo), alinge wayegayega inyika, mvitumba kumbako, na kumalindi aya pasi. ³⁹ Nanga vivyo awandu wosi ewa wazumiliwe nu Mulungu kwizumilo dyao, watapokile chene wawafingilile. ⁴⁰ Umulungu wakolelile kutupa ichindu chene ichisokofu ngani ngikasi sweswe ngati watalondooshwa.