¹ Amaaka minga ghakakila. Pambele akahumila umuunhu jumonga juno akatambulwagha Yohani Mwofungi. Umuunhu ujuoalyale ku lihaka ku Yudea ipulisia, iiti, ² Mulataghe inyivi siinu ulwakuva uvutwa uvwa kukyanya vuli piipi. ³ Yohani ujuo ghwe juno um'bili uYesaya alyajovile kuuti, "Ilisio lya muunhu lipulikika kuhuma ku lihaka liiti, 'Munnosekesyaghe uMutwa uNguluve isila, na kuling'hania muno kyaikilila.""* ⁴ U Yohani akafwalagha umwenda ghuno ghwatendilue nu lwaghe lwa ngamila, akipinyagha nu lukova ulwa ng'hwembe mu nsana. Kulihaka ukuo, akalisagha imhaasi nu vwuki. ⁵ Avaanhu kuhuma mu likaaja ilya Yelusalemu na mu kighavo kyoni ikya Yudea ni mbale sooni isa kikogha ikya Yolidani, vakava viluta kwa mwene ⁶ na kulaata inyivi saave. Neke u Yohani akavofughagha mu kikoghaikya Yolidani. ⁷ UYohani ye avwene aVafalisayi na Masadukayi viluta kwa mwene kuuti vofughue, akavavuula akati, "Umue mwe kisina kya njoka! Ghwe veeni jono avapaviile kuuti mkimbile ing'halaasi ja Nguluve jino jikwisa? ⁸ Lino amaghendele ghahufyaghe ululaato lwinu. ⁹ Mulekaghe kusaagha kuuti, "Tukulwike ulwakuva usue tuli kisina kya Abulahamu!' Kyang'haani nikivavuula, Nguluve anoghiile kuhambusia amavue agha kuuva avaana va Abulahamu! ¹⁰ U Nguluve angiike inhemo, kuuti umpiki ghuno naghukoma ifipeke ifinofu, aghudumule na kunyaanya pa mwoto. ¹¹ Une nikuvofugha na malenga, kuvonia kuuti mulatile inyivi siinu. Neke juno ikwisa mumbele mulyune ali ni ngufu kukila une. Nanino ghiile nambe kuuva m'banda ughwa kukola ifilatu fyake. ¹² Umwene ikuvofughagha nu Mhepo Mwimike nu mwoto. Umwene ilibaghulania avimike na vahosi, ndavule umuunhu pano ikwelusia ingano pa luvunga, ikong'hania ingano na kuviika mu kihenge, neke ilyelelo inyaanya nu mwoto ghuno naghusima." ¹³ Unsiki ughuo, uYesu kuhuma ku Galilaya, akafika ku kikogha ikya Yolidani kuuti ofughue nu Yolidani. ¹⁴ Neke uYohani akakaana, akati, "Une nilondua kukwofughua nuuve. Iwandaani ghukwisa kulyune?' ¹⁵ UYesu akamwamula akati "Uve itika kuvomba uluo lino, ulwakuva lunoghiile kukwikanisia sooni sino uNguluve ilonda." Pe uyohani akitika, akamwofugha. ¹⁶ UYesu ye ofughue, unsiki ghughuo akahuma mu malenga. Uvulanga vukadinduka, akamwagha uMhepo ghwa Nguluve ikwika hwene ng'hunda, jikwisa pakyanya pa mwene! ¹⁷ Pe ilisio kuhuma kukyanya likati, "Uju ghwe mwanango umughanike, ninkeliile."