¹ Lino mu fighono ifyo, jilyahumile kuuti, uKaisali Agusito akahumisie ululaghilo kuuti, vatole uluvalilo lwa vaanhu vooni vanovikukala mu iisi. ² Ulu lulyale lwe luvalilo lwa kwanda luno lulyavombike unsiki ghuno uKileoli alyale m'baha gha Silia. ³ Neke umuunhu ghweni akaluta kumpulo ghake kukulembekesia uluvalulo. ⁴ Ghwope uYosefu alyavukile mu mpulo ghwa Nasaleti ukuo ku Galilaya na kukyulalila ku Yudea ku mpulo ghwa Betelemu, ghuno ghukagulika hwene mpulo ghwa Davidi, ulwakuva jikahumile mu lukolo lwa Davidi. ⁵ Akaluta kula na kujilembekesia nu Maliya, juno alyale antuunile kange alyale ihuvila umwana. ⁶ Lino jilyahumile kuuti, ye valyale kula unsiki ughwa kuhola ghukafika. ⁷ Akahola umwana un'dimi, umuholua ghwake ughwa kwanda, akamun'yengelela umwana namenda neke kunsigha ni mhepo. Pe akam'bika mikivagha kya kulisikisia ifidimua, ulwakuva napwelukale ulubale lwa kum'bika mu numba ja vaghesi. ⁸ Ku lubale uluo kwevalyale avalongosi vano valyale vikukala mu maghunda kulolelela amapugha gha ng'olo ave pakilo. ⁹ Kukenyemukila unyaMhola va Mutwa akavahumila nu vwimike va Mutwa vulyang'alile kuvasyungutila, pe valyale nu vwoghofi kyongo. ¹⁰ Pepano unyaMhola akavavula, "namungoghopaghe, ulwakuva nikuvapela iMhola inofu isa lukelo uluvahaku vaanhu vooni. ¹¹ Umusyughu umpoki ghwinu aholilue vwimila jinu mu mpulo gha Davidi! umwene ghwe Kilisite Mutwa! ¹² Iki kye kivalilo kino mupelua, mukumwagha umwana vampinyile umwenda aghonile mu luvagha lwa kulisikisia ifidimua. ¹³ Kukenyemukila kukava ni lipugha livaha lwa va sikali kuhuma kukyanya likalungine nunya Mhola ujuo kukumughinia uNguluve vakatisagha, ¹⁴ "Uvutwa vwa nguluve juno ali kukyanya fiijo nu lutengano luve mu iisi ku vaanhu voni vano anoghilue navo." ¹⁵ Lulyale kuuti avanyaMhola ye vavukile na luluta kukyanya, avalongosi vakajofesania vavuo ku vavuo, "tuvuke lino ku Betelemu kula tukalole kiki kino kihumile, kino uMutwa atumanyisie'. ¹⁶ Vakaluta ng'hani ng'hani kula, neke vakamwagha uMaliya nu Yosefu, kange vakamwagha umwana aghonile mu luvagha lwa kulisikisia ifidimua. ¹⁷ Ye vavwene ndiki, vakavamanyisia avaanhu vala vano vakavulilue imhola sa mwana ghwa muunhu ¹⁸ Voni vakadegha ye vapulike imhola isi ni kila kuno kikajovilue vadalikili. ¹⁹ Neke uMaliya akaghendelela kusagha soni sino alyapulike, akaghavika mu mwoojo ghwake. ²⁰ Avadalikili vakagomoka na kumwimika na kumpaala u Nguluve wimila umuunhu ghweni kukino valyapulike na kukukyagha, ndavule jilyajovilue kuveene. ²¹ Kyati kifikile ikighono kya lekela kwoni ghulyale ghwe nsiki ghwa kun'dumula umwana, vakankemela ilitavua ghwe Yesu; ilitavua lino alyapelilue nu nya Mhola jula ye na vuvukunue vukyale kutungwa mu lileme. ²² kuling'ana ni ndaghilo ja Moose, uYosefu nu Maliya akantwala kunyumba inyimike ja kufunyila ku Yelusalemu na kum'bika pavulongolo pa Mutwa. ²³ Ndavule jilyalembilue mu ndaghilo ja Mutwa. "umukinhaata ghweni juno idindula ilileme ilikemelua juno avusikisivue uvuvaha kwa Mutwa". ²⁴ Vope vulevule vakisile kuhumia ilitekelo kuling'hana na kila kinokijovua ku ndaghilo ja Mutwa," vahumyaghe injiva ivili nambe inyaana ivili isa ng'unda". ²⁵ Lola, palyaale nu muunhu ku Yelusalemu juno ilitavua lyake ikemelua ghwe Simoni. Umuunhu uju alyale nya kyang'haani na kumwitika u Nguluve. Umwene alyale idalikila vwimila umuhuvilua ghwa Isilaeli, nu uMhepo uMwimike alyale nkyanya ja mwene. ²⁶ Jilyavonike kwa mwene kukilila u Mhepo u Mwimike kuuti umwene naale ifua ye akyale kumwagha uKilisite ghwa Mutwa. ²⁷ Ikighono kimonga akingile mu nyumba inyimike ja Hakalongosivue nu Mhepo umwimike. Pano avapafi vakamuletile umwana, u Yesu ikum'bombela sino simunoghile jaatu mu ndaghilo, ²⁸ Pepano u Simoni akamwupila mu mavoko ghake na kumpaala uNguluve na kuuti, ²⁹ "Lino nikum'bula untemi ghwako alute nu lutengano lwa Mutwa, kuling'hana ni lisio lyako. ³⁰ Ulwakuva amaaso ghango ghavuvwene uvupoki vwako, ³¹ vuno vuvonike ku vaanhu voni. ³² Umwene ghwe lumuli vwimila uvusyetulilo vwa iisi nu vwimike vwa vaanhu va Isilaeli. ³³ Ubaba nu mama va mwana vakadegha ku sino sijovua kwa mwana ghwa vanave. ³⁴ Pepano uSimoni akavafunyila na akati kwa Maliya ung'ina ghwa mwene, "pulikisia vonono! umwana uju iiva vufumbue kwa kusova nambe kukwitika ku vaanhu vinga va ku Isilaeli kane ke kivalilo kino avaanhu vinga vilikujikana. ³⁵ Kange lwe lubamba lunolulinyanya umwoojo ghako juve, neke kuuti amasaghe gha moojo gha vinga ghavoneke." ³⁶ Un'dala um'bili juno akemeluagha Ana kwealyale kunyumba inyimike ja kufunyila. Umwene alyale mwalive gha Fanueli kuhuma kulukolo lwa Asheli. alyale na maka minga kyongo. Akikala nu mughosi ghwake ku maka lekela lubale ye vatoline, ³⁷ pepano akava mfwile ku maka fijigho lekela kwaoni na ghaane. nakaghelile kuvuka mu nyumba inyimike ija kufunyila alyale ighendelela kudinda na kunsuuma uNguluve pakilo na pamwisi. ³⁸ Nu nsiki ughuo, akisa pala panovalyale akatengula kumuhongesia uNguluve. Akajova isa vaanha vooni vano vaghulagha uvupoki vwa Yelusalemu. ³⁹ Ye vamalile avaanhu voni vakanoghile kuvomba kuling'ana ni ndaghilo ja Mutwa, vakagomoka ku Galilaya umpulo ghwave, Nasaleti. ⁴⁰ Umwana akakula, akava ni ngufu akongelela mu vukoola, nu vumosi vwa Nguluve vulyale pa kyanya jake. ⁴¹ Avapafi vake amaka ghoni vakalutagha ku Yelusalemu vwimila ikikulukulu kya Pasaka. ⁴² Ya ale na maka kijigho na ghavili, kange vakisile mu nsiki ghuno ghunoghile ndavule uvutavike vwa kikulukulu. ⁴³ Ye vajighe ifighono fyoni vwimila ikikulukulu vakatengula kugomoka kunyumba. neke un'dimi u Yesu akajighe kunsana ku Yelusalemu kisila avapafi vake kukagula ili. ⁴⁴ Vakasaghile kuuti valilumo mulipugha lya vano vakyulagha lumo. Pe vakakyula ulukyusi lwa kighino pepano vakatengula kukumulonda mu vanyalukolo na vamanyani vave. ⁴⁵ Ye vakunilue kumwagha, vakagomoka kuYelusalemu na kutengula kumulonda umuo. ⁴⁶ Jilyahumile kuuti mu fighono fitatu valamwagha mu nyumba inyimike ja kufunyila, akkali pakate pa vavulanisi akavapulikisia na kukuvaposia. ⁴⁷ Voni vano vale vikumpulikisia vakadegha ku vukagusi vwake nu lwamulo lwake. ⁴⁸ Vati vamwaghile, vakadegha ung'iina akam'bula, "mwanago kiki utuvombile ndiki? pulikisia une nu baba ghwako tulya tukulonda ku vwoghofi uvukome". ⁴⁹ Akavaposia, "kiki mulyale mukunilonda? namukakagwile kuuti lunoghile kulyune kuva mu nyumba ja baba ghwango? ⁵⁰ Neke navakakagwile uluvumbulilo lwa masio aghuo. ⁵¹ Pepano akaluta palikimo na veene kukaja ku Nasaleti, kange alyale mwitiki kuveene. Ung'iina alyavikile sooni mu mwoojo ghwake. ⁵² Neke u Yesu alyaghendelile kukula mu vukoola ni vugoyo nakughina kuva mughanike kwa Nguluve na vaanhu.