¹ Lino nikalamwile nu mwojo ghwango kuuti, nanikwisa kange kulyumue kukuvalemasia amoojo ghiinu. ² Ulwakuva une ningavapelele umue kuuva nuulusukunalo, kwekuuti nakwale juno kyaikumhelela une niive nu lukeelo, looli jumue mwe vano nivalamisie mu moojo ghiinu. ³ Fye nambe nikavalembile mu kalata jila kuti, ningiise kulyumue nileke kulemasivua mu mwojo ghwango na vaanhu vano vaveele vanoghiile kukumhela nihovoke, nikagwile kuuti ningave nu lukeelo, na jumue mweni muvisaghe nulukeelo. ⁴ Pano nikavalambiile ikalata vwimila imumuko imbaha nu lusukunalo ulukome ni misosi minga. Looli nalondagha mukagule vule nili nu lughano ulukome kulyumue. ⁵ Liino umuunhu ghweni juno apeleleliile kulemala mu mwojo, naandemisie juune, looli avalemisie najumue. neke lino nanilonda kuviika uluo kuuva lutalamu kyongo kulyumue. ⁶ Ulukwegho lunolumwaaghile umuunhu ujuo kuhuma kiviinga mulyumue lunkwilile. ⁷ Lino, munoghile kukunsaghila na kukunkangasia umuunhu ujuo.Kuuti aleke kusukunala kyongo kuhanga afue umwojo. ⁸ Liino, nikuvasuuma mumhufiqghe kuuti mumughanile. ⁹ Uvufumbue vwango vwa kukuvalembela ikalaata jila, vulyale vwa kukagula nave mukumulika mu sooni. ¹⁰ Pano mukunsaghila umuunhu, najuune ninsaghiile. ulwakuva nave pwelili lino ninoghiile kusaghila, nisaghiile pamaaso gha Kilisite vwimila umue. ¹¹ Ulwa kuuti, uSetano aleke kukutulema, ulwakuva tukagwile uvusufu vwake. ¹² Lino, ye nifikile kulikaaja lya Tuloa kupulikisia imhola inofu ija Kilisite, u Mutwa akandindulila umulyango ughwa kuvomba imbombo jaake kula. ¹³ Neke nanikatenganile mu mwojo ghwango, ulwakuva nanikamwaghile kula unyalukolo ghwango uTiito. Pe nikahwesia nikavuuka kuluta ku Makedonia. ¹⁴ Neke tukumwongesia uMutwa ulwakuva mwa Kilisite ikutulongosia jaatu kulefia avalugu. Kange ikutupelelausue kukwisia uvukagusi vwa mhola sa Kilisite imbale sooni, ndavule ulunusi ulunono vule lukwilana. ¹⁵ ulwakuva kwa Nguluve usue tulindavule ulunusi ulunono lwa Kilisite luno lukuvafikila vooni, vanovipokua na vano visova. ¹⁶ Ku vano vipokua ulunusi uluo lunono, lukuvapeela uvwumi. Neke kuvano visova, ulunusi uluo luviivi, lukuvapeela uvufue. Lino ghwe veeni juno anoghiile kuvomba imbombo ijio? ¹⁷ Usue natulindavule avaanhu vinga vano vavikile ilisio lya Nguluve hwene kiinu kya kughusia. Looli mu ngufu isa Kilisite, tupulikisia ilisio lya Nguluve mu vugholofu vwoni pa maaso gha Nguluve ndavule utusaghile.