¹ Ulu luuva lwa vutatu une kukwisa kulyumue "lunoghiile un'kole uvwolesi vwake vukagulikaghe na vooleso vavili nambe vatatu.'' ² Ye nisile ukuo ulwa vuvili, nikavavulile kuuti, niliivi nikwisa naniliiva ni kisa kuveene na kuvange vooni. ³ Ulu nikuvavuula umue ulwakuva mulonda ikivalilo ikya kukagula nave ukilisite ijova kukilila une. Ulwene nam'botevote kulyumue, looli umwene ghwe nya ngufu. Ghwe juno ivomba imbombo n'kate mulyumue. ⁴ Poope, nambe alyale n'sila ngufu ye ikomelua pa kikovekano, lino mwumi mu ngufu sa Nguluve. Fye enendiki najusue tuli vasila ngufu mwa Kilisite, neke pano tukuvavombela umue, tuuva vwumi palikimo nu mwene mu ngufu sa Nguluve. ⁵ Lilo, mughelaghe jumue neke mukagule nave muli nu lwitiko. Asi, namukulutang'hania kuuti, uYeesu Kilisite ali n'kate mulyumue? umwene mwale, looli nave namukulutang'hania mukunilue. ⁶ Neke nihuviila kuuti, umue kya mukulutang'hania kuuti usue natukanilue. ⁷ Lino tukuns'uuma u Nguluve kuuti namungavombaghe inyifi. Nanisuuma kuuti usue tuhwene tusilolile ingelo, ulwene tusuuma kuuti muvombaghe inofu, nambe usue tuvoneka hwene tukunilue ingelo. ⁸ Ulwakuva natuliningufu isa kusigha uvwa kyang'haani, looli kughina kupulisia uvwakyang'haani. ⁹ Ulwakuva tuhovoka pano usue tulivavote vote, neke umue muli ni ngufu. Tukun'suuma uNguluve avatange muuve vagholofu. ¹⁰ Nikuvalembela amasio agha pano nikyale kukwisa, kuuti niiva nikwisa kulyumue, naningasivonaghe sino ndepoonu sikumheela niive n'kali vwimila uvutavulua vuno amheliile uMutwa. Ulwakuva u Mutwa naamheliile uvutavulua uvwa kuvanangania, looli uvwa kuvatanga mu lwitiko. ¹¹ Lino vanyalukolo vango, muhovokaghe muvisaghe vagholofu, munyamasaniaghe, muvisaghe vumo, muvisaghe nu lutengano. Naju Nguluve unya lughano nu lutengano iiva palikimo numue. ¹² Mu hungilanaghe mu lughano lwa Kilisite. ¹³ Avitiki vooni vikuvahungila. ¹⁴ Ulusungu lwa Mutwa Yeesu Kilisite, nu lughano lwa Nguluve, nu vuhangilanisi vwa Mhepo uMwimike, fivisaghe palikimo numue mweni.