¹ Poope nambe nijova hwene nilin'jasu nisuuma mhumhulikisie, Looli muvwa kyang'haani, muli nu lugudo nuune. ² Une nili nikivavilisi numue, ikivavilisi iki kihuma kwa Nguluve, ulwakuva muli ndavule umhinja juno naamanyile umughoosi, juno nikan'tavwile kutolua nu mu ghoosi juno ghwe Kilisite. ³ Neke lino nikwoghopa kuuti, ndavule u Eefa vule alyasyangilue ni njoka jila in'sumbufu, najumue kyande musyangua, mukuvuleka uvugholofu nu lughano lwinu ulwa kyang'haani kwa Kilisite. ⁴ Ulwakuva ndepoonu ikwisa umuunhuu ujunge kupulisia uYeesu ujunge, juno usue natukampulisie. Nambe mukumwupila u Mhepo ujunge, juno na ghwe juno mukupiile kulyusue, nambe mukwupila imhola ijingi, jino namukwupiile kuhuma kulyusue. Mungigude ku isio, kuva lukwiliine! ⁵ Une nakwekuti nili n'debe kukila vuo vano vitambulua vasung'hua vavaha. ⁶ Neke lino nambe nanivulanisivue kudalikila, uvukagusi vwango vukome. Tuhufisie uluo kulyumue mu sooni sino tuvombile, kange vukagulike kulyumue. ⁷ Asi, nikavombile fivi pano nikajisisie mu lwa kupulisia imhola inofu ija Nguluve kulyumue, kuuti umue mughinisivue? ⁸ Ye nivomba imbombo kulyumue, nupilagha ulutango kuhuma kufipugha ifingi ifya vitiki. Mu uluo nikaale hwene nikuunya ifiinu fwave, neke nivatange umue. ⁹ Un'siki ye nili palikimo numue, pano naghiluagha nanikaale n'sigho kwa muunhu, ulwakuva avitiki vano vakahumile ku Makedonia vakamheliile fino nilonda. Mu uluo nikaale nikulolelela kuuti nileke kuuva n'sigho kulyumue, kange nifikulolelelagha. ¹⁰ Ndavule uvwakyanghaani vwa kilisite vule vulivuo mun'kate mulyune, nakwale nambe jumo mulikaaja lwoni ilya Akaya, juno kya ikusigha kukughinia vwimila imhola iji. ¹¹ lwa kiki? ulwakuva nanivaghanile? uNguluve akagwile kuuti nivaghanile. ¹² Nifivombagha ndavule nivomba lino, kuuti avasung'hua avuo vano viiti ve vavaha, vakunue ikya kughinia kuuti nivomba ndavule usue. ¹³ Ulwakuva avaanhu avuo vasung'hua vavudesi, ve vavombi avasyangi. Vikuviika hwene vasung'hua va Kilisite. ¹⁴ Mu uluo natudegha, ulwakuva naju Setano jujuo ikuviika hwene nyamhola ghwa lumuli. ¹⁵ Kange natudegha pano voope avavombi vaake vikuviika hwene vavombi vagholofu. Uvusililo vwake vilikwupila sino siling'hiine ni mbombo saave. ¹⁶ Nijova kange, napeangavisaghe umuunhu ghweni juno isagha kuuti, une nilin'jaasu. Neke nambe mwiti nilin'jaasu, nikuvasuuma mhumhulikisie, neke najune nighinue padebe. ¹⁷ Amasio ghano nijova lino aghakughinia, nanilaghilue nu Nguluve, looli nijova hwene muunhu n'jaasu. ¹⁸ Ulwakuva vinga vikughinia vwimila isa m'bili, najue nighinie. ¹⁹ Umue muli nu luhala, fyenambe mukuguda na kukuvakunda nu lukeelo avaanhu avajaasu. ²⁰ Mukuguda na kukun'kunda nambe umuunhu juno angakuviike mu vukami, nave ipelela kubaghulana n'kate mulyumue, nave ikuvatumila umue ku luvumbulilo lwa mwene, nambe ikughinia na kukuvavapula ku maaso. ²¹ Nivona soni kujova kuuti pe usue tukaale vavotevote kuleka kuvomba isio. Lino nave kwale umuunhu ghweni juno ikughinia -- nijova hwene nilin'jaasu -- najuune ninoghiile kukughinia. ²² Asi, aveene vaYahudi? najune nili mu Yahudi kikola kya Abulahamu? najune nili kikola kya Abulahamu. ²³ Asi,aveene vavombi va Kilisite? (nijova hwene nihasing'hinie uluhala.) une neene m'bombi ghwa Kilisite kukila aveene. Une nighimbilue kuvoma imbombo kukila, ke kinga nidindilue mu ndinde, ke kinga nitovilue kyongo. kange ke kinga navisagha mu lutalamu ulwa kufua. ²⁴ Nitovilue na vaYahudi ing'hwego fijigho fitatu nabusika lubale, nivombilue uluo ²⁵ Kahaano. nikopilue ning'hwegho katatu. Nitovilue kamo na mavue. Nikulwike katatu mu ngalava. Nikikalile mu nyanja pakilo na pamwisi. ²⁶ Ke kinga pano nakyulagha, navisagha mulutalamu ulwa fikogha, mulutalamu ulwa vahiiji avabudi, mulutalamu kuhuma kuvajango, mu lutalamu ulwa vano navitiki, mulutalamu ulwa mulikaaja, mulutalamu ulwa kulihaka, mulutalamu ulwa mu nyanja, mulutalamu luno luhuma ku vanyalukoloavadesi. ²⁷ Nivombile imbombo inhalamu na kupumuka ke kinga ninoghonile maaso, nipumwike ni njala ni kyumilua, ke kinga nikalile kisila kulia, na kukukala ku mhepo na kuuva kisila mhenda. ²⁸ Palikimo nisio sooni, jaatu nisagha vwimila ifipugha ifya vitiki. ²⁹ Nave jumonga m'botevote, najuune nikupulika m'botevote. Nave jumonga van'kuvisie najuune niiva muvuvafi. ³⁰ Nave lunoghiile, nikughinia vwimila uvuvotevote vwango. ³¹ u Nguluve nu Nhaata ghwa Mutwa Yeesu juno anoghiie kughinisivua ifighono fyoni, akagwile kuutinanijova vudesi. ³² Ye nili mu likaaja lya Damesiki, umulongosi juno akalongosiagha ikighavo kino kyale mu vutwa vwa Ntwa u Aleta, alyavikile avaloleleli mu likaaja ilio kuuti vang'hole. ³³ Looli avaanhu vamonga vakanyisia mu kiivo kukilila pa lidilisa lino lyale mu luvumba nikakuluka kukolua.