¹ Ululongosi musooni nisuma munsumilanilaghe kwa Nguluve. Munsumaghe uNguluve kuuti, avatange na kukuvafunya avanhu vooni kange, u Nguluve vwimila avanhu vooni. ² lunoghiile kukuvasumila avatwa na vange vooni avanya vutavulua, neke tukalaghe nulutengano, pano tukumwimika u Nguluve na kuuva na maghendele amanofu. ³ Ulu lwe lunono luno uNguluve u Mpoki ghwitu ikeela ⁴ UNguluve ilonda avanhu vooni vapokue nakukagula uvwakyang'ani. ⁵ Tukagula kuuti isio sakyang'ani, ulwakuva uNguluve ali jumo kange unya kuvasambania avanhu nu Nguluve ali jumo ujuo ghwe munhu uYeesu Kilisite. ⁶ Juno alyahumisie uvwumi vwake kuuti avavange avanhu vooni. Uvu vwe vwolesi vuno uNguluve alyatupelile munsiki ghuno alyataviike. ⁷ Neke mu uluo nilyavikilue kuuva n'daliki na kuuva nsung'hwa, nanidesa nijova isa kyang'ani. Kange nilyavikilue .Kuuva m'bulanisi ghwa vano navaYahudi kuuti nipulisyaghe imhola ja lwitiko nu lwakyang'ani. ⁸ Lino panomukong'anile, nilonda avakinhaata pano panovikwinula amavoko kukyanga kukufunya, vavisaghe ni nyivonelo inofu, vifunyaghe kisila ng'alasi nambe kukaning'ana. ⁹ Nava vakijuuva vafyalaghe vunono amenda, vavisaghe nu luveelo ulunofu. Navangakelaghe ulutogo ulwa ulwakitiva ilinyele, nambe ulwakufwala ifinu ifya kyuma na fino filengadika, nambe amenda agha ndalama nyinga. ¹⁰ Looli vavisaghe na maghendele amanofu ndavule lunoghile kuvakijuuva vano vano viitile kukufunya kwa Nguluve. ¹¹ Avakijuuva vavisaghe vapuliki, kange vakundi pano vimanyila. ¹² Nanikumpela umukujuuva uvutavulua ulwakuvulanisia nambe kukuntema umukinhaata looli avisaghe mpuliki. ¹³ Ulwakuva uNguluve alyampelile uAdamu taasi, pambele u Eefa. ¹⁴ Kange u Adamu naalyasangilue, akadenya ululaghilo lwa Nguluve. ¹⁵ Neke nave umukujuuva ilikwupila uvupoki vwimila uvupaafi vwake nave ikukala mulwitiko, mulughano, muvwimike na kuuva nu luveelo ulunono.