¹ Basi Uyesu pini wamanyaga kija Amafarisayo vapulikha kija Uyesu akhandi ifwasa na kibatisa saidiya Yohana, ² (japokiva Uyesu yumwene akhandi asibatisa ila avanafunsi vakwe), ³ wahumaga Kuyudea na walutaga Kugalilaya. ⁴ Ino yikhandi muhimu kishilila Kusamaria. ⁵ Na wafikhaga kumji gwa Samaria, gwini gushemelwa Sikari, kholela nilieneo lini Uyakobo wamupelaga umwanakwe Uyusufu. ⁶ Nishisima sha Yakobo shikhandi hapo. Uyesu akhandi akhatele kwa sababu ya lushulo na wakhala kholela nilisima . yikhandi luhavi lwa paminsi. ⁷ Umudala umusamaria wayinsaga kinega amalenga, nu Yesu wamujovelaga, ''Nipela amalenga ning'wele.'' ⁸ Kwa kiva avanafunsi vakwe vakhandi valutile lwanave kumujini kigula ishakilya. ⁹ Yula umudala wamujovelaga, ''Yiva wuli owe Muyahudi, kunilomba one umudala Musamariya, ishinu sha king'wela?'' Kwa kiva avayahudi vasihansikhana na Vasamaria. ¹⁰ Uyesu wajibu, ''Nda wa umanye ikarama ya Nguluvi, nu yula mwini akikujovela 'Nipela amalenga, ' nda wamulomba, na nda wakupela amalenga ga usima.'' ¹¹ Umudala wajibu, ''Mtwa usina akhadowo kha kunejela, nilisima litali. Ambi ukigapata kwii Amalenga ga Usima.? ¹² Wuli owe uli mukhome, kishila uwihesu wesu Uyakobo, mwini watipelaga ilisima ili, numwene yumwene na vanakwe vakwe bahamo na mifugo gwakwe vang'welaga amalenga ga lisima ili?'' ¹³ Uyesu wajibu, ''Yeyona mwini ing'wela amalenga aga ambi ipata ikhau khanji, ¹⁴ lakini umwene mwini ambi ing'wela amalenga gini ambi nikimupela asikhapata ikhau khanji. Badala yakwe amalenga gini ambi nikimupela ambi giva chemchemi yini yifwilila hayta shiluta.'' ¹⁵ Yula umudala wamujovelaga, ''Mtwa, nikigalomba amalenga ago ili nisikhapataga ikhau khanji, na nisikhalavaga kiyinsa panu kinega amalenga.'' ¹⁶ Uyesu wamujovela, ''Luta umushemele umugosi wakho, bahene utine.'' ¹⁷ Umudala wamujovela, ''Nisina mugosi.'' Uyesu wajibu, ''Walogola unofu, 'Nisina mugosi;' ¹⁸ kwa kiva wava na vagosi vasanu, na yumo mwini unawo isalisi asili mugosi wakho. Ku ili walogola kweli!'' ¹⁹ Umudala wamujovela, ''Mtwa nikilwaga kija owe uli mukuvamalago. ²⁰ Ava wihesu vesu vaabudugu kushidunda ishi. Lakini omwe mwija Iyerusalemu ndiyo sehemu yini avanu vipaswa kiabudu.'' ^{21 22} Uyesu wajibu, ''Mudala, niyamini, uluhavi luyinsa pini musikhamwabudu Ubaba kushidunda ishi au Kuyerusalemu. Omwe vanu muabudu shila shini musishimenye, lakini ose tiyabudu shini tishimenye, kwa kiva uukulusaji wihuma kwa Vayahudi.'' ²³ Hata ndeno, uluhavi luyinsa , naisalisi luli panu, pini vini viyabudu kweli vasimwabudu Uwihesu kwa roho ni kweli, kwa kiva Uwihesu akivasakula avanu va namna iyo kiva avanu vakwe vini vakimwabudu. ²⁴ Unguluvi yu Roho, na vala vini vakimwabudu vipaswa kumwabudu kwa roho ni kweli.'' ²⁵ Umudala wamujovela, ''Nimenye kiva Umasihi iyinsa, (mwini ishemelwa Kristo). Uyo pini akhayinsa ambi akitijovela gona.'' ²⁶ Uyesu wamujovelaga, ''One mwini wulogola none ndiyo.'' ²⁷ Uluhavi lulo avanafunsi vakwe vatinaga. Navene vashangalaga kwanshii akhandi ilogola na vadala, lakini kusina mwini wajelaga kimuposa, ''Wusakula shishi?'' au ''Kwanshi wulogola numwene.?'' ²⁸ Bahene umudala wailekhaga injilo yakwe na walutaga kumujini na wavajovelaga avanu, ²⁹ ''Yinsi mulelele umunu mwini wanijovela amajowo gangu gona gini nagasenga, wuli yiwesekhana angava ndiyo Kristo?'' ³⁰ Vahumaga kumjini vayinsaga kunyakwe. ³¹ Uluhavi lwa paminsi avanafunsi vakwe vamulombaga vija, ''Rabi lyaa ishakilya.'' ³² lakini umwene wavajovelaga, ''One ninasho ishakilya shini musishimenye omwe. ³³ ''Avanafunsi vajovelanaga, kusina mwini wamuletela ishinu shoshona kilya,'' Wuli valetaga?'' ³⁴ Uyesu wamujovelaga, ''Ishakilya shangu ni kisenga uugani wakwe umwene mwini wanifilikha na kitiminsa insengo yakwe. ³⁵ Wuli, musilogola, 'Bado mesi gasanu na mafuno ambi giva tayari?' Nikivajovela leleli amagunda shini gali tayari kwa mafuno! ³⁶ Umwene mwini ikungula iposhela umushahala na kikunganiya amatunda kwa ajili ya usima wa shiluta, ili kija umwene mwini ivyala numwene mwini ikungula vashendeve bahamo. ³⁷ Kwa kiva umusemo ugu ni gwa kweli, 'Yumo ivyala nu yunji ikungula.' ³⁸ Navafilikhaga kikungula shini musikhashilavile, Avamonga vasenga insengo nomwe mwayinjila kuushendefu wa nsengo yanave.'' ³⁹ Avasamariya vinji ku mji gula vamuyaminigi kwa sababu ya taarifa ya yula umudala mwini akhandi ishuhudila, ''Mwini wanijovelaga amajowo gona gininnagasengaga.'' ⁴⁰ Bahene Avasamaria pini vayinsaga vamulombaga akhale bahamo nawo na wakhalaga kunyanave kwa nsiku sivili. ⁴¹ Na vinji mandu vamuyaminigi kwa sababu ya liswi lyakwe. ⁴² Vamujovelaga yula umudala, ''Tiyamini siyo tu kwa majowo gakho, kwa kiva ose yuse tapulikha, naisalisi timenye kija hakika umwene yu mukulusaji wa ulimwengu.'' ⁴³ Baada ya nsiku iso sivili, wawukhaga na kiluta Kugalilaya. ⁴⁴ Kwa kiva umwene yumwene akhandi atangasise kija umukuvamalago asina lishila kunyii yakwe yumwene. ⁴⁵ Pini wayinsaga kihuma Kugalilaya, Avagalilaya vamukhalibisaga. Vakhandi vagaga amajowo gona gini wagasenga Kuyerusalemu kusikukuu, kwa kiva na vene vakhandi valutile ku sikukuu. ⁴⁶ Wayinsaga khanji Kukana ya Kugalilaya huko kwini wagasetusaga amalenga kiva ujimbi. Kukhandi nu ofisa mwini umwana wakwe akhandi ali mutamu huko Kukapernaumu. ⁴⁷ Pini wapulikhaga kija Uyesu wahumaga Kujudea na kiluta Kugalilaya, walutaga kwa Yesu na kimulomba ayishe amuponese umwanakwe,mwini akhandi kholela kifwa. ⁴⁸ Bahene Uyesu wamujova, ''Omwe nda musisajile iishara na maajabu musiwesa kuyamini. ⁴⁹ Umulongosaji wajova, ''Mtwa yikha pansi khabla umwanangu asinafwe.'' ⁵⁰ Uyesu wamujovelaga, ''Luta umwanakho ali musima.'' Yula umunu wayaminigi iliswi lini walilogola Uyesu na walutaga lwakwe. ⁵¹ Pini akhandi iyikha, avatumishi vakwe vamuposhelaga na kimujovela umwanakwe akhandi musima. ⁵² Bahene wawaposaga muda mushi wapataga inafuu. Vajibugu, ''Imihe muda gwa saa saba ihoma yamuleshelaga.'' ⁵³ Bahene uwihe wakwe wamanyaga kija gu muda gugula uyesu gwini Uyesu walogolaga, ''Umwanakho ali musima.'' Bahene umwene ni familiya yakwe vayaminigi. ⁵⁴ Iyi yikhandi ni ishara ya uvili yini waigahaga Uyesu pini wahumaga Kuyudea kiluta Kugalilaya.