¹ Baada ya majowo ago Uyesu waiwonensaga khanji kwa vanafunsi ku Bahari ya Kutiberia; ndeni ndiyo shini waiwonensaga yumwene: ² Usimoni Upetro akhandi bahamo nu Thomaso mwini ishemelwa Didimas, Unathanaeli wa kukana ya Kugalilaya, avana va Zebedayo na vanafunsi avanji vavili va Yesu. ³ Usimon Upetro wamujovela, ''One niluta kilova inswii.'' Navene vamujovela. ''nayuse , Ose ambi tiluta nowe.'' Valutaga vayinjilaga kumashua, lakini ishilo isho shona vasikhapatile shohona. ⁴ Ni subuhi pini kwashesaga, Uyesu wayimaga kumbalamo, na vene avanafunsi vasikhamenye kija akhandi yu Yesu. ⁵ Bahene Uyesu wavajovela, ''Vadimi, muna shoshona sha kilya?'' Navene vajibu, ''Hapana.'' ⁶ Wavajovela, ''Yisi uwafu ulubali lwa shigosi lwa mashua, nayumwe ambi mwipata shidodo. ''Bahene vayisaga uwafu navene vasikhawesise kulikweha khanji kwa sababu ya winji wa nswii. ⁷ Basi yula umwanafunsi mwini Uyesu wamudobokhaga wamujovelaga Upetro, '' Yu Mtwa.'' Numwene Usimon Upetro pini wapulikhaga kija yu Mtwa, waipinyaga umwenda gwakwe ( kwa kiva akhandi asigufwele unofu), bahene waitagaga mubahari. ⁸ Vala avanafunsi avanyi vayinsa kumashua( kwa kiva vakhandi vasili kutali ni mwani, ngaja mita mia moja kihuma mumbalamo), navene vakhandi vikweha sina inyafu sini sikhandi simemile inswii. ⁹ Pini vafikhaga mumbalamo, vagwagaga umoto nu mukhala pala na pashanya yakwe kukhandi ninswii bahamo na makhate. ¹⁰ Uyesu wavajovela, ''Leti iswii isimonga sini mwalova isalisi.'' ¹¹ Basi Usimon Petro watanaga na kuukhokhota wula uwafu wini wukhandi wumemile inswii ikhome, uwinji wa nswii 153; japo sikhandi nyinji, wula uwafu wusikhademwishe. ¹² Uyesu wavajovela, ''Yinsi muwese kidindula amalomo.'' Kusina hata yumo wa vanafunsi mwini wajelaga kimuposa, ''Owe uli nani?'' Vamanyaga kija akhandi yu Mtwa. ¹³ Uyesu wayinsaga, wagutolaga gula umukhate, na bahene wavapelaga, wagahaga shshila na ku sila inswii. ¹⁴ Iyi yikhandi mara ya utatu Uyesu kuiwonensa kwa vanafunsi vakwe baada ya kifufukha kihuma kwa vini vafwile. ¹⁵ Baada ya kiva vadindula amalomo, Uyesu wamujovela Usimon Petro, ''Simon mwana wa Yohana wuli, unigene one kishila ava?'' Upetro wajibu, ''Ndiyo, Mtwa; ''Owe umenye kija one nikugene.'' Uyesu wamujovela, ''Lisa umwanakholo wangu.'' ¹⁶ Wamujovela ulwa uvili, ''Simon mwana wa Yona, wuli, unigene?'' Upetro wamujovela, ''Ndiyo, Mtwa; owe umenye kija nikugene. ''Uyesu wamujovela, ''Dima ikholo sangu.'' ¹⁷ Wavajovela khanji lwa utatu, ''Simon, mwana wa Yohana, Wuli unigene?'' Numwene Upetro wasugumilwagwa kwa ndenela shini wamujovelaga lwa utatu, ''Wuli Owe unigene?'' Numwene wamujovela, ''Mtwa, umenye gona'mumenye kija nikugene.'' Uyesu wamujovela, Lisa ikholo sangu. ¹⁸ Yamini, yamini, nikikujovela, pini ukhandi mudimi wasovelelaga kifwla amenda yuwe na kiluta kokona kwini wadobokhaga; lakini pini ukhava musehe, ukhagolosa amokho gakho, nu yunji ambi akikufwasa amenda na kukutwala kwini usigene kiluta.'' ¹⁹ Uyesu walogolaga aga ili kiwonensa ni aina nshii ya nfwaa yini Upetro nda wamutukusa Unguluvi. Baada ya kiva walogola aga, wamujovela Upetro, ''Nifwata.'' ²⁰ Upetro wasetukhaga na kimwaga yula umwanafunsi mwini Uyesu wamudobokhaga wavafwata- Uyu ndiyo mwini ayigonis kushifuva sha Yesu umuda gwa shakilya sha pashlo na kimuposa, ''Mtwa, yu nani mwini ambi akikusetukha?'' ²¹ Upetro wamwagaga na bahene wamuposaga Uyesu, ''Mtwa, Uyu umunu ambi igaha nshii?'' ²² Iyesu wamujibu, ''Nda nisakula asigale mpakha pini ambi niyinsa, ilyo likikuhusu nshii?'' Nifwata.'' ²³ Kwa hiyo ihabari iyi yayenelaga muvamo va vala avanyalukholo, kija umwanafunsi uyo asikhafwa. Lakini Uyesu asikhamujovele Upetro kija, umwanafunsi uyo asifwa, ''Nda nisakula umwene asigale mpakha pini ambi niyinsa yikikuhusu nshii?'' ²⁴ Uyu ndiyo umwanafunsi mwini ihumya uushuhuda kihusu amajowo aga, na ndiyo mwini wayandikha amajowo aga, na timenye kija uushuhuda wakwe uli wa kweli. ²⁵ Kuna amajowo aganji minji gini Uyesu wagasengaga. Nda shila lyolyona nda lyayandikhwa, nihiva kija uwulimwengu wuwene nda usakwila kufivikha ifitabu fini nda fyayandikhwa.