¹ ''Usikhayitikhaga inumbula yakho kiva mumalawo. Ukimuyamini Unguluvi niyamini khanji none. ² Ku nyumba ya Baba wangu kuna makholo minji ga kikhala; nda yayive yisili ndeno, nda nisakujovevela, kwa kiva niluta kukuyandalila amahala kwa ajili yakho. ³ Nda nilute na kivayandalila amahala, ambi niyinsa khanji kivakhalibisa kunyangu, ili amahala pini nikwali nomwe khanji muve mukwali. ⁴ Mumenye insila amahala kwini niluta.'' ⁵ Utomaso wamujibugu Uyesu, ''Mtwa, tisimenye amahala kwini wiluta; Wuli! Tiwesa wuli kuimanya insila? ⁶ Uyesu wamujovelaga, ''One ndiyo nsila, kweli, nuusima; kusina mwini iwesa kiyinsa kwa Baba bila kishilila kunyangu. ⁷ Nda mwamuve munimenye one, nda mwamumumenye nu Baba wangu wope; kuyansisa isalisi na kiyendelela mumumenye na sha mwamwaga umwene.'' ⁸ Uphilipo wamujovelaga Uyesu, ''Mtwa, tiwonensa Uwihesu, na ndeno abi yiva yatikwilana.'' ⁹ Uyesu wamujovela, '' wuli Nisava bahamo nomwe kwa muda mukhome, na bado usinimenye one, Philipo? Yeyona mwini waniyaga one wamwaga Ubaba; Namna nshii wulogola, 'Tiwonensa Uwihesu'? ¹⁰ Musiyamini kia one nili mukhati ya Baba, nu Baba ali mukhati yangu? Amajowo gini nikigalogola kunyenyu nisilogola kwa kusudi lyangu yune; badala yakwe, yu Baba mwini ikhala mukhati yangu mwini isenga insengo yakwe. ¹¹ Niyamini one, kija nili mukhati ya Baba, nu Baba ali mukhati yangu; shisho niyamini one kwa sababu ya nsengo sangu hasa. ¹² Yamini, yamini, nikivajovela, umwene mwini akiniyamini, one insengo sila sini nikisisengaambi akisisenga insengo isi sope; na ambi isenga hata insengo nkhome kwa kiva niluta kwa Baba. ¹³ Shoshona shini ambi mulomba kishilila ilitawa lyangu, ambi nisenga ili kija Ubaba awese kitukuswa kishilila Umwana. ¹⁴ Nda ambi mwilomba ishinu shoshona kishilila ilitawa lyangu, ilyo ambi nisenga. ¹⁵ Nda ambi mukinidobokha, ambi mukisikhata iamri sangu. ¹⁶ Na ambi nikimulomba Ubaba, Numwene ambi akivapela Umutanjilisaji uyunji ili kija awese kiva bahamo nomwe shiluta, ¹⁷ Uroho wa kweli. Uwulimwengu wusiwesa kimuposhela umwene kwa kiva usikimwaga, au kimumanya umwene. hata ndeno omwe, mumumenye umwene, kwa kiva ikhala bahamo nomwe na ambi iva mukhati yenyu. ¹⁸ Ambi nisikivalekha yumwe duguli; ambi Nitina kunyenyu. ¹⁹ Kwa muda mukhome, uwulimwengu usikhaniyaga khanji, lakini omwe mukiniyaga. Kwa kiva nikhala, nomwe ambi mwikhala khanji. ²⁰ Kulusiku ulo ambi mwimanya kija one nili mukhati ya Baba, na kija omwe muli mukhati yangu, na kija one nili mukhati yenyu. ²¹ Yeyona mwini akisikhata iamri sangu na kusisenga, ndiyo yumo mwini akinidobokha one; na mwini akinidobokha one ambi idobokhwa nu Baba wangu, na ambi Nikimudobokha na ambi nikiiwonensa one yune kunyakwe.'' ²² Uyuda (siyo Uiskariote) wamujovela Uyesu, ''Mtwa, Wuli! Shishi ambi shipolela kija ambi ukiiwonensa yuwe kunyesu na siyo kwa wulimwengu? ²³ Uyesu wajibugu wamujovela, ''Nda yeyona mwini anigene, ambi akilikhata iliswi lyangu. Ubaba wangu ambi akimudobokha, na ambi tiyinsa kunyakwe na ambi tisenga amakhalo gesu bahamo numwene. ²⁴ Yeyona mwini asikinidobokha one, asikhata amajowo gangu. Iliswi lini mupulikha siyo lyangu ila lya Baba mwini wanifilikha. ²⁵ Nagalogola amajowo aga kunyenyu, pini bado nikhala munyenyu. ²⁶ Hata ndeno, Umfariji, Uroho Mtakhatifu, mwini Ubaba ambi akimufilikha kwa litawa lyangu, ambi akivafundisa amajowo gona a ambi akivagaha mukumbushe gona gini nagalogolaga kunyenyu. ²⁷ Iamani nikivapela iamani yangu omwe. Nisikivapela iyi ngaja uwulimwengu shini wihumya. Musikhasigahaga inumbula senyu kiva na malawo nu woga. ²⁸ Mwapilikhaga ndenela shini navajovelaga, 'Niluta lwangu, na ambi nitina khanji.' Nda mwamunidoboshe one, nda mwava nuushendefu kwa kiva niluta kwa Baba, kwa kiva Ubaba ali mukhome kishila one. ²⁹ Isalisi sha navajovela khabla yisinapolele ili kija, pini ambi yipolela, muwese kiyamini. ³⁰ Nisikhalogola nomwe amajowo minji, kwa kiva umukhome wa dunia iyi iyinsa. Umwene asina ngufu kunyangu, ³¹ lakini ili kija uwulimwengu uwese kimanya kija nimugene Ubaba, nisenga shini Ubaba akinilajisa one, ngaja ndenela shini wanipela iamri. yimi, na tipole amahala panu.