¹ Ulusiku lwa sita khabla ya Pasaka, Uyesu walutaga Kubethania, pini akhandi akwali Ulazaro, umwene mwini wamufufulaga kihuma kwa vini vafwile. ² Basi vamuyandalilaga ishakilya sha pa jioni huko, nu Martha wamutumishila, uluhavi ulo Ulazaro akhandi yumo wa vala vini vakhele pashakilya bahamo nu Yesu. ³ Bahene Umariamu watola ratli ya mafuta gini gatendilwe kwa nardo nofu, aganya hela khome, wamususuta Uyesu mumagulu, na wamupuguta amagulu kwa nyele sakwe; inyumba yona yamemaga iharufu ya mafuta. ⁴ Uyuda Iskariote, yumo wa vala avanafunsi vakwe, mwini ndiyo ambi akimusetukha Uyesu, waja, ⁵ ''Kwanshi amafuta aga nda gasasetuswa kiva dinari mia tatu na vapelwe avapina?'' ⁶ Numwene walogolaga ago, sio kwa kimuwonela ulusungu umupina, ila kwa kiva akhandi muhiji: umwene ndiyo akhandi ikhata umufukho gwa hela na akhandi itola fimonga ya fini fikhandi fikwali umo kwa ajili yakwe yumwene. ⁷ Uyesu wajovaga, ''Mulekha avisha shini anasho kwa ajili ya lusiku lwa kisilwa kwangu. ⁸ Avapina ambi mwiva nawo insiku sona; lakini musiva none nsiku sona.'' ⁹ Bahene uumati mukhome wa Vayahudi vapataga kimanya kija Uyesu akwali uko, na vene vayinsa, sio kwa ajili ya Yesu tu, ila vamwaje nu Lazaro mwini Uyesu wamufufulaga kihuma kwa vini vafwile. ¹⁰ Navene avakhome va makuhani vayitikhanaga ili vamubude Ulazaro; ¹¹ maana kwa ajili yakwe vinji Kuvayahudi valutaga lwanave na vamuyaminigi Uyesu. ¹² Nulusiku lwa uvili uumati mukhome vayinsaga kusikukuu. Pini vapulikhaga kija Uyesu iyinsa Kuyerusalemu, ¹³ vatolaga amatawi ga mapishi ga mitende na kihuma kunja kiluta kimuwawusa na vatovaga ilyowo, ''Hosana! Abarikiwe umwene mwini iyinsa kwa litawa lya Mtwa, Umfalme wa Israeli.'' ¹⁴ Uyesu wamupataga umwana- punda wamutana; ngaja ndenela shini yiyandishwe, ¹⁵ ''Usikhatilaga, muhinja Sayuni; lelela, Umfalme wakho iyinsa, atanile umwana- punda.'' ¹⁶ Avanafunsi vakwe vasikhagayelewe amajowo aga hapo pamwaandi; lakini Uyesu pini watukuswagwa, bahene ndiyo vakumbukhaga kija amajowo aga wayandishilwagwa umwene na kija vasenga amajowo aga kunyakwe. ¹⁷ Basi shila ishipuga sha vanu vini vakhandi bahamo nu Yesu pini wamushemelaga Ulazaro kihuma mukhaburi, vashuhudila vanji. ¹⁸ Na yikhandi kwa sababu iyi khanji kija ishipuga sha vanu valutaga kumuwawusa kwa kiva vapulikhaga kija waisenga iishara iyo. ¹⁹ Amafarisayo valogonsaniyaga vene kwa vene, ''Lelela, isalisi musiwesa kisenga lyolyona; lelela uwulimwengu waluta kunyakwe.'' ²⁰ Ino vamonga va Vayunani vakhandi vamo va vala vini vakhandi viluta kiabudu ku sikukuu. ²¹ Ava vamulutilaga Ufilipo, mwini wahumililaga Kubethsaidi ya Galilaya, vamulombaga vija, ''Mtwa, ose tidobokha kimwaga Uyesu.'' ²² Ufilipo waluta wamujovela Uandrea; Uandrea nu Filipo valutaga na kimujovela Uyesu. ²³ Uyesu wavajibu waja, ''Ilisala lwafikha kwa ajili ya Mwana wa Adamu kitukuswa. ²⁴ Yamini, yamini, nikivajovela, ichembe ya ngano nda yisigwile kunyii yifwe, yikhala ihali yiyo yene duguli; ila nda yifwe, ambi yisava amatunda minji. ²⁵ Umwene mwini idobokha uuhai wakwe ambi akiuyasa; ila umwene mwini akiukhalalila uuhai wakwe ku ulimwengu uwu ambi iva nawo mpakha usima wa shiluta. ²⁶ Umunu yeyona nda anitumishile one, na anifwate; nayune pini nikwali, baho nu mtumishi wangu pini ambi iva akwali. Umunu yeyona nda anitumishile, Ubaba ambi akimuheshimu. ²⁷ Isalisi iroho yangu yasugumilwa:nayune nije wuli? 'Baba, unikuluse ku lisala ili'? Lakini ni kwa kusudi ili nalifishila ilisala ili. ²⁸ Baba, ulitukuse ilitawa lyakho.'' Bahene ishauti yayinsa kihuma kushanya yija, ''Nalitukusa nayune ambi nikilitukusa khanji.'' ²⁹ Basi avanu vini vayimile kholela numwene vapulikha, vaja kija kwava numugulumo. Avanji vajovaga, ''Umalaikha walogola numwene.'' ³⁰ Uyesu wajibu na kija, ''Ishauti iyi yisikhayinsile kwa ajili yangu, ila kwa ajili yenyu. ³¹ Ino uuhigo wa ulimwengu uwu wukwali: Ino umukhome wa wulimwengu uwu ambi itagwa kunja. ³² Nayune niyinulwa kushanya ya nyii, ambi nikivakweha wona kunyangu.'' ³³ Walogolaga ago iwonensa ni mauti nshii yini ambi ifwa. ³⁴ Umukutano vajibu, ''Ose tapulikha kusheriya kija Ukristo ambi akhala hadi shiluta, Newe wija wuli, 'Umwana wa Adamu lasima ayinulwe kushanya'? Uyu Umwana wa Munu yu nani?'' ³⁵ Basi Uyesu wavajovela, ''Inuru yili bahamo nomwe muda shidodo. Luti kwa kiva munayo inuru, ili kija inshisi yasikhajelaga kivawesa. Umwene mwini iluta kunshisi asimenye kwini iluta, ³⁶ Pini bado munayo inuru, yiyamini inuru iyo ili muwese kiva vana va nuru.'' Uyesu wagalogolaga aga na bahene waluta lwakwe waifiha vasikhamwagaga. ³⁷ Japo Uyesu wasengaga iishara nyinji namna iyo pamwandi yanave, bado vasikhamuyaminile ³⁸ ili litimile iliswi lya mukuvamalago uisaya, lini wajovaga: ''Mtwa, yu nani mwini wasiyitikha ihabari sesu? Niliwokho lwa Mtwa wagubutulilwa yumani?'' ³⁹ Ndiyo sababu avene vasikhamuyaminile, maana Uisaya walogolaga khanji, ⁴⁰ ''Wavapofusa ameho, na wasisenga kiva nyumu inumbulu sanave; vasikhayinsaga valwaje kwa meho ganave na kivamanya kwa numbula sanave, na vaongoshe nayune nivaponese.'' ⁴¹ Uisaya walogolaga amajowo ago kwa kiva wawagaga uutukufu wa Yesu na walogola ihabari sakwe. ⁴² Lakini, hata avakhome vinji vamuyaminigi Uyesu; lakini kwa sababu ya Mafarisayo, vasikhayitishe ili vasikhayinsaga vabagulwe nili sinagohi. ⁴³ Vadobokhaga isifa sa vanadamu kuliko isifa sini sihuma kwa Nguluvi. ⁴⁴ Uyesu watansaga ishauti na kija, 'Umwene mwini akiniyamini one, asikiniyamini one tu ila numwene mwini wanifilikha one, ⁴⁵ numwene mwini akiniyaga one akimwaga umwene mwini wanifilikha. ⁴⁶ One nayinsa ngaja nuru kuwulimwengu ili shila munu mwini akiniyamini one asikhakhalaga minshisi. ⁴⁷ Nda umunu yeyona ambi akigapulikha amajowo gangu aleshe kigakhata, one nisikimuhiga; kwa kiva nisikhayinsile ili niuhije uwulimwengu, ila niukuluse uwulimwengu. ⁴⁸ Umwene mwini akinikhana one na mwini asikigayitikha amajowo gangu, anaye mwini akimuhiga: iliswi ilyo lini nalilogola ndiyo lini ambi nikimuhiga ulusiku lwa mwisho. ⁴⁹ Kwa kiva one nisikhalogwele kwa nafsi yangu tu. Ila yu Baba mwini wanitwalaga, umwene yumwene wanilajisa gini ambi nikigalogola na gini ambi nikivajovela. ⁵⁰ Nayune nimenye kija iliagiso lwakwe ni usima wa shiluta; basi ago gini nilogola one - ngaja Ubaba shini wanijovela, ndiyo gini nilogola kunyanave.''