¹ Pamwaandi kukhandi kukwali Iliswi, nu Uliswi akhandi bahamo nu Nguluvi, nu Liswi akhandi yu Nguluvi. ² Uyu, Uliswi, Pamwaandi akhandi bahamo nu Nguluvi. ³ Ifinu fyona fyasenjekhaga kishilila umwene, na bila umwene kusina hata shinu shimo shini shikhandi shisenjeshe. ⁴ Mukhati yakwe kukhandi usima, nuuwo uusima ukhandi nuru kwa vanadamu wona. ⁵ Inuru ying'ala munshisi, wala inshisi yisikhaisimise. ⁶ Pakhandi nu munu yumo mwini wafilikhwagwa kihuma kwa Nguluvi, mwini ilitawa lyakwe akhandi Yohana. ⁷ Wayinsaga ngaja shahidi kushuhudila kihusu yila inuru, ili kija wona vawese kiyamini kishilila umwene. ⁸ Uyohana akhali asili yila inuru, ila wayinsaga ili ashuhudile kihusu yila inuru ⁹ Iyo yikhandi nuru ya kweli yini yikhandi yiyinsa kunyii niyene yikimuponya inuru shila yumo ¹⁰ Akhandi kunyii, ninyii yawumbwagwa kishilila umwene, nayinyii yisikhamumanyile. ¹¹ Wayinsaga ku finu fyakwe, na vanu vakwe vasikhamuposhelile. ¹² Ila kwa vala vinji vini vamuposhelaga, vini vayaminigi ilitawa lyakwe, kwa awo wawapelaga ihaki ya kiva vana va Nguluvi, ¹³ Vini vasawagwa, siyo kwa danda, wala kwa ugani wa muvili, wala kwa ugani wa munu, ila kwa Nguluvi yumwene. ¹⁴ Numwene Uliswi wasenjekhaga muvili na wakhalaga munyesu, tawaga uutukufu wakwe, uutukufu ngaja wa munu mwene duguli wa shene mwini wayinsaga kihuma kwa Wihesu, amemile ineema ni kweli. ¹⁵ Uyohana washuhudilaga kihusu umwene na watansaga ishauti ija, ''Uyu ndiyo mwini nalogolaga ihabari sakwe nija, ''Yula mwini iyinsa baada yangu yu mukhome kishila one, kwa kiva wavaakwali khabla yangu.'' ¹⁶ Kwa kiva kihuma kuutimifu wakwe, ose wona taposhela bure ishipawa baada ya shipawa. ¹⁷ Kwa kiva isheriya yaletwagwa kishilila Umusa. Ineema ni kweli fyayinsaga kishilila Uyesu Kristo. ¹⁸ Kusina umwanadamu mwini wamwagaga Unguluvi luhavi lolona. Umunu mwene mwini yu Nguluvi, mwini ali pashifuva sha Baba, wamugaha umwene amanyishe. ¹⁹ Na uwu ndio ushuhuda wa Yohana pini amakuhani na valawi vini vafwilishwe kunyakwe na Vayahudi kunuposa, ''Owe yu nani?'' ²⁰ Bila kitilatila na asikhakhanile, ila wajibugu, ''One nisili Kristo.'' ²¹ Bahene vamuposaga, ''kwa hiyo owe yu nani ino?'' Owe yu Eliya? Waja, '' One siyo. ''Vaja, Owe uli mukuvamalago? Waja,'' Hapana.'' ²² Bahene vamujovelaga, ''Owe yu nani, ili kija tivapele ilijibu vini vatifilikha''? Ukiishuhudila wuli yuwe?'' ²³ Waja, ''One nilishauti yakwe mwini ikhola kunyikha: 'yigolosi insila ya Mtwa,' ngaja umukuvamalago uisaya shini wajovaga.'' ²⁴ Basi kukhandi kuna vanu vaflishwe pala kihuma kwa Mafarisayo. Vamuposaga na kija, ²⁵ Kwanshi wubatisa nda owe usili Kristo wala Eliya wala mukuvamalago?'' ²⁶ Uyohana wawajibugu ija, ''Nikivabatisa kwa malenga. Hata ndeno, munyenyu iyima umunu mwini musimumenye. ²⁷ Uyu ndiyo mwini iyinsa baada yangu.'' One nisifwaya kudedevesa ingalawo sa ndatu sakwe.'' ²⁸ Amajowo aga gasenjekhaga huko Kubethania, mwambwa ya Yordani, amahala pini Uyohana akhandi ibatisa. ²⁹ Ulusiku lwini lufwata Uyohana wamwagaga Uyesu iyinsa kunyakwe wajovaga,'' Lelela umwanakholo wa Nguluvi mwini akiitola isambi ya wulimwengu! ³⁰ uyu ndiyo mwini nalogola ihabari sakwe nija, ''Umwene mwini iyinsa kunyuma yangu ali mukhome kishila one, kwa kiva akhandi kabla yangu.' ³¹ Nisikhamumenye umwene, lakini yasenjekhaga ndeno ili kija agubutulwe Kuisraeli, kija nikhandi nibatisa kwa malenga.'' ³² Uyohana washuhudilaga, ''Namwagaga Uroho iyikha kihuma kushanya ngaja nkunda, na yasigalaga kushanya yakwe. ³³ One niikhamumenye lakini umwene mwini wanifilikha ili nibatiswe kwa malenga wanijovelaga,' yula mwini ambi ukimwaga Uroho iyikha na kikhala kushanya yakwe, Uyo ndiyo abatiswe kwa Roho Mtakhatifu.' ³⁴ Nalwaga na nashuhudila kija uyo yu Mwana wa Nguluvi.'' ³⁵ Khanji ulusiku lwini lwafwataga Uyohana akhandi ayimile bahamo na vanafunsi vakwe vavili, ³⁶ Vamwagaga Uyesu ijenda nu Yohana waja, ''Lolela, Umwana kholo wa Nguluvi!'' ³⁷ Avanafunsi vavili vamupulikhaga Uyohana pini ilogola aga vamufwataga Uyesu. ³⁸ Khanji Uyesu wasetukhaga na kivaga avanafunsi vala vakimufwata, na wavajovala, ''Musakula nshii?'' Vajibu, ''Rabbi, (imaana yakwe 'mwalimu,' wikhala kwii?'' ³⁹ Wavajovela, ''Yinsi na mulwaje, ''Bahene valutaga na kilwaga amahali pini akhali ikhala; vakhalaga bahamo numwene ulusiku ulo, kwa kiva yikhandi ngaja saa kumi ndeni. ⁴⁰ Yumo wa vala vavili mwini wamupulikhaga Uyohana ilogola na bahene kumufwata Uyesu akhandi yu Andrea, ukholo lwakwe Usimoni Petro. ⁴¹ Wamwagaga ukholo lwakwe Usimoni na wamujovelaga, ''Tamupata Umasihi'' (yini yitafisiliwa Kristo). ⁴² Wamuletaga kwa Yesu. Uyesu wamulelela na waja, ''Owe yu Simoni mwana wa Yohana'' ambi wushemelwa Kefa,'' (amaana yakwe 'Petro'). ⁴³ Ulusiku lwaini lwafwataga pini Uyesu akhandi isakula kiwukha kiluta Kugalilaya, wamupataga Ufilipo na wamujovela, ''Nifwata one.'' ⁴⁴ Ufilipo akhandi mukhaya wa Kubethsaidi, inyii ya Andrea nu Petro. ⁴⁵ Ufilipo wamupataga Unathanaeli na kimujovela, Tamupata yula mwini Umusa wayandikhaga ihabari sakwe ku sheriya na Vakuvamalago. Uyesu mwana wa Yusufu, kihuma Kunazareti. ⁴⁶ Unathanaeli wamujovelaga, ''Wuli ishinu shinofu shiwesa kupolela Kunasareti?'' Ufilipo wamujova, Yinsa na ulwaje.'' ⁴⁷ uyesu wamwagaga Unathanaeli pini iyinsa kunyakwe na wajovaga, ''Lelela, Umwisraeli kweli kweli mwini asina uudehi mukhati yakwe!'' ⁴⁸ Unathanaeli wamujova, ''Wanimanya wuli one?'' Uyesu wajibu na wamujovela, ''Khabla Ufilipo asinakushemele pini wa pansi ya mupishi, nanikwajile.'' ⁴⁹ Unathanaeli wajibu, ''Rabi owe uli Mwana wa Nguluvi! Owe uli Mfalme wa Israeli''! ⁵⁰ Uyesu wajibugu wamujovela, Kwa kiva nalinga nakujovela ' nalinga nakwaga pansi ya mupishi' wuli wuyamini? ukhagaga amatendo makhome kishila aga.'' ⁵¹ Uyesu waja, ''Yamini yamini nikivajovela ambi mukisaga imbingu sidindukha, na kivaga avamalaikha vitana na kiyikha kushanya ya Mwana wa Adamu.''