¹ Ndipo abhantu wonti bha Israeli bhahafuma nanzi umuntu weka, afume hu Dani mpaka Beer-sheba, peka ninsi ya Gileadi; nope bhahawungana hu maso ga mweene uho hu Mispa. ² Abhalongozi wonti bhabhantu wonti wi kabila zyonti zya Israeli, bhahenga inafasi zyao bhahawungana abhantu bha Ngolobhe abhantu 400, 000 bhabhajenda na manama bhahali tayari akhomane ni panga. ³ Basi abhana wa Benyamini iwawuvwa aje abhantu bha Israeli bhahazuwile hu Mispa. Abhana bha Israeli bhahayanga, "Tiwozye hu namna wele ubhiwi uwombeshe owu." ⁴ Umlawi, unume washe yahabudilwe, ahajibu, Nahezel hu Gibea hunsi ya Benyamini ane nu suria wane, ili tigone. ⁵ Wakati wa nusiku abhalongozi bha Gibea bhahahomile, bhahaizwongola inyumba bhahapanjile hubude. Bhahakhete nahugone usuria wane, ahafwa. ⁶ Nahamwenga usuria wane nadumula ubele gwakwe vipande vipande kila ansi nahameha yi ulithi wa Israeli, kwa sababu bhawombile ubhibhi uwo nupumbafu hu Israeli. ⁷ Eshi, amwe Bhaisraeli wonti, fumiaji inongwa nu shauri wenyu epa." ⁸ Abhantu wonti bhahasogola peka nanzi umuntu weka, bhahayanga, Numo hata weka wetu yanzabhale hwibhaza lyakwe, wala numo hata weka wetu yazawele hu nyumba yakwe. ⁹ Lakini eshi ndiyo shatinza huiwombele iGibea tinzahuikhome nanzi ikura shihutilongola. ¹⁰ Tinzahweje abhantu kumi hu bhantu mia moja hu makabila gonti ga bha Israeli, na mia moja hu elfu na lhu elfu moja hu elfu kumi, hubhapele ishalye kwa ajili ya bhantu ebha, ili bhafishe hu Gibea ya Benyamini, bhanzahubhalavye humbiwi zyao zyabhawombile hu Israeli. ¹¹ Basi abhalugo wonti bha Israeli bhahawungana pamwanya yi muji, nanzi umutu weka. ¹² Amakabila ga Israeli bhahabhatuma abhantu wikabila lyonti ilya Benyamini, bhahayanga, "Yenu muwombile ubhibhi uwu pahantu yenyu? ¹³ Kwa hiyo, tipeli abhantu ewo abhabhibhi bhahu Gibea tibhabude, epo tinza hwefwe kabisa ubhibhi uwo afume hu Israeli." Lakini Abhabenyamini sangabhahatenjetezya Israeli, ¹⁴ Ndipo abhana bha Benyamini bhawungana afume hu mjini abale hu Gibea bhaipanga akhomane na bhana bha Israeli. ¹⁵ Abhantu bha Benyamini bhahawungana afume hu miji gao ili akhomane isiku elyo, abhalugo elfu ishirini na sita bhapangwile akhomane ni panga. Lakini, huli abhantu mia saba bhahasaluliwe afume hwabhakhaya bhahu Gibea. ¹⁶ Mwabhalungo wonti ebha bhahali abhantu mia saba bhabhasalulilwe wi mongo. Kila muntu ahawezizye akhome isisi na mawe bila tukule. ¹⁷ Abhantu bha Israeli, bila abhazye inamba afume hwa Benyamini, bhali abhantu 400, 000 bhabhaahamanyiye akhomane ni panga. Wonti ebha bhahali bhantu wiwo. ¹⁸ Abhantu wi Israeli bhahasogola, bhahabhala hu Betheli, bhahalabha ushauri afume hwa Ngolobhe. Bhahawuozya, "Yunanu uwahwande yanzahuwangamizye abhantu bha Benyamini kwa ajili yetu?" Ungolobhe ahayanga, "U Yuda anzahubhakhone kwanza." ¹⁹ Abhantu bha Israeli bhahawuha ishandabhe, bhahasamya ikambi lya karibu hu Gibea. ²⁰ Abhantu bha Israeli bhahabhala alwe nabha Benyamini. Bhahabheha inafasi zyao ziwo uho hu Gibea. ²¹ Abhantu bha Benyamini bhahasogo hu Gibea, bhahabhabuda abhantu elfu ishirini na mbili abhalungo bha Israeli isiku lila. ²² Abhana bha Israeli bhaipela ingovu bhewo, bhahatayalisya umstari gwiwo amahali pala lwawenga inafasi isiku ilya hwande. ²³ Abhana bha Israeli bhahabhala bhahalila pamaso ga Ngolobhe hata ilyewela. Bhahanza ulongozi afume hwa ngolobhe "Je, tihwanziwa abhale tena alwe nabha holo bhantu, abhantu bha Benyamini?" Ungolobhe ahaga, "Bhakhomaji!" ²⁴ Abhantu bha Israeli bhahakhomana na bhalugo bha Benyamini isiku ilyabhele. ²⁵ Isiku ilyabhele uBenyamini ahabhala alwe nao afume hu Gibea, bhahabhabuda abhantu bha Israeli elfu kumi na nane. Wonti abhantu ewo bhahamanyiye akhomane nu panga. ²⁶ Basi abhalugo wonti bha Israeli na bhantu wonti bhahabhala hu Betheli, bhahalila, bhahakhala pilongolela lya Ngolobhe; nope bhahaleha alye isiku elyo hata ilyebhela, bhahafumya isadaka ya lungolezye ni sadaka yi seshelo pamaso ga Ngolobhe. ²⁷ Abhana bha Israeli bhahanabha Ungolobhe, - kwa sababu yisandiko yi ndagano zya Ngolobhe lyalyahali isiku ezyo; ²⁸ nu Finehasi, umwana wa Eleazari, umwana wa Haruni, yahawombaga hwisandiko insiku ezyo. "Je tibhale hwiwo tena hwabhantu wa Benyamini, abhaholo wetu, au tileshe?" Ungolobhe ahayanga, "Bhakhomi, maana indabhe nahibhavwa mwahaimamena. ²⁹ Basi Israeli ihabheha abhantu amali pa siri karibu ni Gibea. ³⁰ Abhantu bha Israeli bhahakhomene na bhana bha Benyamini hu siku zitatu, bhahazenga iwo lyao hu Gibea, nanzi shabha halongoleye. ³¹ Abhantu bha Benyamini bhahabhala akhomane na bhantu, nope bhahegwa hutali nu muji. Bhahnda hubhabude abhantu abhamo. Hwa hali abhantu selasini abha Israeli bhabhafwiye hu magonda na hu balabala. Idala lyeka lyahabhalile hu Betheli, ilya mwao lyahabhalile hu Gibea. ³² Ndipo abhana bha Benyamini bhahayanga, "Bhapotilwe na bhahutishembela, nanzyepo pahwande." Lakini abhalugo bha Israeli bhahayanga, "Namba tishembele libhavunte palali nu muji hadi hu barabara." ³³ Abhantu wonti bha Israeli bhahasongola afume isehemu yao, bhahaipanga hwiwo uho hu Baal-Tamari. Basi abhalugo bha Israeli bhabhahobhele amahali pa siri bhahashembele afume hu Maare-Geba. ³⁴ Bhahasogola hu Gibea abhantu kumi elfu bhabhasaluliwe afume hu Israeli yonti, iwo lyahali likhali, lakini Abhabenyamini sagabhahamenye aje impungo ihali karibu hwa bhene. ³⁵ Ungolobhe ahamenile uBenyamini hu maso ga bha Israeli. Isiku elyo abhalugo bha Israeli bhahabhabudile abhantu bha Benyamini 25, 100. Bhabhahafwiye wonti bhahamanyie alwe ni panga. ³⁶ Basi abhalugo bha Benyamini bhahalola aje bhamenilwe. Abhana bha Israeli bhahafumizye insi iya Benyamini, kwa kuwa bhahabhazizye abhantu bhabhahabheshelwe hu nafasi zizyahafisilwe hosi yi Gibea. ³⁷ Ndipo abhantu bhabhahubhele bhahabhukha nalinali bhahashembela uGibea. Nope bhahabuda kila muntu yahakheye hu mjini ni panga lyao. ³⁸ Idala lyalyahapagwilwe nabhalugo bha Israeli na bhantu bhabhahobhele hu siri lyahali libhengo igosi ni lyosi linzafumile hunze yi munji. ³⁹ Injama lyayenz eabhalugo bha Israeli bhahagaluha afume hwiwo. Basi Abhabenyamini bhahanda hubhakhome nahubhabude abhantu bha Israeli selasini, bhahayanga, "Lyoli bhakhomwa pamaso getu, nanzi iwo ilya huande." ⁴⁰ Lakini wakati ilyosi lyalyahanda asushe honze yi muji, abhabenyamini bhahagaluha na hulyenye ilyosi humwanya afume hu muji gonti. ⁴¹ Ndipo abhantu bha Israeli bhahabhagaluha. Abhana bha Benyamini bhahogopa kwa sababu bhahalola aje ufwe ubhe eye. ⁴² Basi bhahashembele afume hwabha Israeli, abhale idala lyahwikhombe. Lakini iwo lyahabheje. Abhalogo bha Israeli bhahafuma hu mjini pabhaahemeleye pala ⁴³ Bhahabhazyungoleye abha Benyamini na hubhafuate. Bhakhabhakhaya okho hu Noha, bhahabhabuda hata upande wa hu mashariki wi Gibea. ⁴⁴ Afume hwi kabila lya Benyamini abhantu kumi nanne elfu bhahafwiye, wonti bhahali bhalume bhahamanyishe hwiwo. ⁴⁵ Bhahagaluha nashembele ibhale hwikhombe hadi hu mwala gwa Rimoni. Abhaisraeli bhahabudilwe zaidi ya elfu tano pahati yi barabara. Bhahendeleye hubhafuante hwidala igosi abhale hu Gidimu ukho bhabhabhabuda elfu mbili zaidi. ⁴⁶ Abhalugo bha Benyamini bhabhahishile isiku elyo bhahali abhantu ishilini na tano bhahamanyiye akhomane ni panga wonti bhahamanyishe aje wiwo. ⁴⁷ Lakini abhantu mia sita bhahagaluha nashembele hwi khombe abhale hwiwe lya Rimoni. Bhahakhala hwiwe ilya Rimoni hu muda gwi mezi gane. ⁴⁸ Abhalugo bha Israeli bhahabhawelelea abhantu bha Benyamini bhahamamena nahubhabude umuji gonti, ing'ombe na kila hantu habhahenje. Alafu bhahapembile nu moto kila muji hwidala lyao.