¹ O Bezaleli ahalenganya empogoso ye mbabho ye mshita. Amakhono gabhele ne nusu otali wawe, no khono gumo ne nusu ovilima wakwe, no khono gumo ne nusu abhale amwanya. ² Ahakwinshila ne dhahabu enyiza muhati na hwonze nalengane dhahabu mushenje yakwe alizyongole hwonti. ³ Ahalenganyizya epete zine zye dhahabu, zya mwanya hu magaga gakwe gane, epete zibhele opande umo, ne pete zibhele opande wakwe wa mwabho ⁴ Ahalenganya amakwi ge mshita naikwinshile ne dhahabu. ⁵ Alafu ahabheha amakwi ego mupete zyazili hwisanduku ili ahinyemule. ⁶ Wope ahalenganya igubiho lye dhahabu enyinza. Amakhono gabhele ne nusu otali wakwe, no khono gumo ne nusu ovilima wakwe. ⁷ O Bezaleli ahalenganya amakerubi gabhele ge dhahabu. Hu mbombo ahalenganya hu mwisho ubhele gigubiho. ⁸ Akerubi limo hu mwisho ula, no kerubi wa mwabho hu mwisho ou. Alenganye akerubi amwanya hwi gubiho hu mwisho ubhele. ⁹ Bhahabha makerubi bhabagolosya amapiho gabho gabhele amwanya, ohu bhafisa igubiho na mapiho gabho, amaso gabho gahali gabhalilana. Amaso gamakerubi ebho gahenyizye igubiho elyo. ¹⁰ O Bezaleli ahalenganya emeza ye mbabho ye mshita. Amakhono gabhele otali wakwe, no khono gumo ovilima wakwe, no khono gumo ne nusu azubhe amwanya. ¹¹ Alafu ahaikwinshila ne dhahabu enyinza na lenganye omwisho we dhahabu munshenje mwonti. ¹² Ahalenganya ozyongolelo we vilima we khono aziyongole na bheshe edhahabu azyongole mshenje mwonti. ¹³ Nantele, ahalenganya epete zine zye dhahabu na zibheshe mkona zine zye magaga gala gane. ¹⁴ Epete ezyo zyahali kalibu na gula ozyongolelo, ili agavwe gala amakwi gagakhete emeza. ¹⁵ Alafu ahalenganya amakwi ge mshita na gakwinshile ne dhahabu ili gainyemule emeza. ¹⁶ Afume epo ahalenga evyombo vye dhahabu vyapameza pamwanya, embakuli zyakwe evikombe vyakwe namabakuli gakwe na masayi gakwe gabhabheshelaga esadakazye mwelo. ¹⁷ Ahalenganya eshinala she taa she dhahabu enyinza. Hu mbombo ya shansye ahalenganya eshinala she taa. Epande zyakwe ne nsamba zyakwe, evikombe vyakwe, mafundo gakwe na maua gakwe gahabhoneha. ¹⁸ Ne nsamba sita zyafumaga hu pande zyakwe, ensamba zitatu zye shinala she taa afume hu pande wa mwabho. ¹⁹ Evikombe vitatu vyi umbo lye maua ge mlozi vyahali mshikundi shimo she nsamba evifundo na maua vyafuatanaga/vyalongozanyaga; ne vikombe vitatu vye maua ge mlozi vyahali mshikundi sha mwabho she nsamba; evifundo na maua vyalangozanyaga. Esho shayahali hu zila ensamba sita zyazyafumile hushinala she taa. ²⁰ Na mula mushinara she taa hwa hali evikombe vine vyi umbo lye maua ge mlozi, evifundo vyakwe na maua gakwe galongozanyaga. ²¹ Na shila shifundo pansi pa nsamba zibhele afume epo, ne shifundo shashili pansi pazila ensamba zibhele afume hu lyene, kwa ajili ye nsamba sita zyazifuma hu shinara. ²² Evifundo vyakwe ne nsamba zyakwe vyafumile hu lyene, vyonti vyahali ne mbombo emo yahwansye, she dhahabu enyinza. ²³ Ahalenganya ataa zyakwe saba ne meteto zye tambe zyakwe ne vyetezo vyakwe hu dhahabu enyinza. ²⁴ Ahalengenye ne talanta ye dhahabu enyinza, eshene pandwemo ne vyelelo vyakwe vyonti. ²⁵ Ahalenganya emadhabahu e uvumba ne mbabho zye mshita. + Okhono gumo otali wakwe, no khono gumo ovilima wakwe, hwonti hwalenganaga, na makhono gabhele azubhe mwanya. Ekona zyakwe zyafumile huyene. ²⁶ Aikwinshile ne dhahabu enyiza, opande wakwe wa mwanya ne pande zakwe zya mshenje azyongole ekona zyakwe, wope ahalenganya ne dhahabu mshenje aizyongole epande zyonti. ²⁷ Wape ahalenganyiza epele zibhele zye dhahabu pansi pa mwisho we pande zyakwe zibhele, mupande zyakwe zibhele zyazibhalitana, na zyazigavwagala amakwi gagainyemula. ²⁸ Ahalenganya gala amakwi ge mshita naikwinshila ne dhahabu. ²⁹ Nantele ahailenganya na gala amafuta gabheshele amafuta no uvumba owinza waubhehwelwe amanukato, + embombo ya walenganya e marhamu.