Sura ya 30

1 Nawe lenganya amadhabahu gafukizye ovumba; obhailenganye hwikwi lye mshita. 2 Otali wakwe waibha dhiraa yeka, no vilima wakwe dhiraa yeka; yaibha mraba; na bhala mwanya hwakwe dhiraa zibhele; epembe zyakwe zibhabhe pandwemo naho. 3 Nawe obhabheshe edhahabu enyinza pamwanya yakwe - na mbazu zyakwe munshenje, ne pembe zakwe. 4 Nawe obhabheshe okingo we dhahabu aizyongole. Obhalenganye epete zibhele zye dhahabu, pansi pa ukingo nakwe mu mbazu zibhele, mupande zibhele obhazilenganye; zyope zibhabhe pa kwizizye amakwi gahwejele emadhabu. 5 Na gala amakwi obhagalenganye hwikwi lye mshita, naibheshe edhahabu enyinza. 6 Nawe obhabhe hwitagalila hwi pazia lyalili karibu ne mpogoso lye nongwa zya Ngolobhe hwitagalila hwi lengo lye rehema lyalili amwanya hushuhuda, epo pembakhomane nawe. 7 No Aruni aifukizya ovumba we manukato pa mwanya yakwe; wila nashampwii. Pailenganya zila etaa, aifukizya, 8 no Aruni paihwansya zila etaa paliswa, aifukizya, gubhe uvumba we nsiku nzyonti hwitagalila lya Yahwe, hwa bhana bhenyu bhonti. 9 Sagamwaifukizya hwa muntu ojenyi, wala esadaka ya pembe, wala esadaka ye usu, wala sagamwaihwita pamwanya yakwe esadaka ya mwele. 10 Wope oAruni abhabhomba ahwelewane huzila epembe zyakwe mala limo limo kila mwaha. Hu danda yela esadaka ye nzambe yabhombe awelewane, mala limo hu mwaha, aibhombela awelewane, mu bhana bhakwe bhonti. Linza tee hwa Yahweh." 11 O BWANA ahayanga no Musa, 12 "Pawaibhabhazya bhahu Israeli, shaihwenza embazyo yabho, pabhaihupela O BWANA ola muntu oukombozi hu loho yakwe, pawaibhabhazya, ili zigandebhe empongo hwa bhene, pawaibhabhozya. 13 Ola muntu wajenda hwa bhabhabhaizwe aifumya enusu ye shekeli aifuate eshekeli ye pala apinze pa Ngolobhe (gera ishilini). Nusu shekeli hu sadaka ya Yahweh. 14 Ola muntu wajenda hwa bhabhabhaziwe ahwande oyo wali na maha shilini, au ahwendelele, aifumya eyo esadaka huline. 15 Abhantu pabhaileta esadaka huline abhombe ahwomvwane, bhabhali ne hela enyinji sagabhaileta zinyinji, wala bhasagabhalinazyo sagabhaifumya hashe hunusu shekeli. 16 Nawe waiwejelela ezyo ehela zya wele wane mmakhono gabho abhana bhe Israeli, nazibheshe zya tumishi wi hema lya khomanile. Ili zikombohwe hwa bhana bhahu Israeli hwitagalila lyane ili abhome awele wane hu loho zyenyu. 17 O Yahweh ahabhula oMusa, 18 "Lenganya ni birika lye shaba, ni khosi lyakwe lye shaba, ili ahwojele; nawe obhalibheshe pihema lya khomanile na madhabahu, nawe obhabheshe amenze. 19 No Aruni na bhana bhakwe bhaihwozya amagaga gabho na makhono gabho mwomwo. 20 Pabhahwinjila mwihema lyakhomanile au pabhabhala hu madhabahu ambombele ampembezezye esadaka, bhaikwiyozya mumenze, ili bhagandefwe. 21 Basi bhaihwozya amakhono gabho na magaga gabho ili bhagande fwe; ne nongwa ezi zyaibha ndogoyo hwa bhene hu wila, hwa mwene na hwa bhana bhakwe bhonti. 22 O Yahweh ahayanga no Musa, 23 "Whiyejele amanukato gagali minza, emanemane embese eshekeli mia zisanu, no mdalasini kwaguli no nonsi owinza 250, ne kane shekeli 250 24 ne kida shekeli mia sizanu, alifuata ishekeli lya paala pa ngolobhe, na mafuta ge zeituni evibaba visanu. 25 Nawe obhabheshe mafuta gapashe apinza pa ngolobhe, emarhamu yesangenywe humbombo enyinza ya muntu watenganya; gaibha mafuta aminza gabheshe. 26 Nawe waipaha ehema ya khomanile amafuta ego, ne mpogoso ye nongwa za ngolobhe, 27 neyo emeza, ne vyelelo vyakwe vyonti, ne shinara she taa, ne vyombo vyakwe, 28 ne madhabahu yafukizizye ouvumba, ne madhabahu ya pembele esadaka, pandwemo ne vyelelo vyakwe vyonti ni birika ni khosi lyakwe. 29 Nawe waivyozya evintu evyo, ili vibhe vinza tee; kila hahagusa evintu evyo haibha hinza. 30 Nawe waibhapaha amafuta oAruni na bhana bhakwe, na bhozye, ili habhombele embombo ya ukuhani. 31 Nawe waibhabhula abhana bhe Israeli aje, Ega gaibha mafuta aminza gapashe kwa ajili yaline hwa bhana bhenyu bhonti. 32 Saga gaisohanywa mshiwiliwili sha muntu, mgande bhombe ga mwabho neshi ega; ga ngolobhe, na hulimwe gaibha minza. 33 Omuntu wawonti waisanganya amafuta neshi ega, au omuntu wawonti waipaha amafuta ega hwa jenyi, omuntu oyo aifwela hutali na holo bhakwe."' 34 O Yahweh ahabhula oMusa, "Hwiyejele amanukato aminza, yaani, enatafi, ne shekelethi, ne kelbena; evisanganyizyo vye manukato enyinza no ubani owinza; evintu evyo vyonti vibha ne shipimo shimo. 35 Nawe obhalenganye ouvumba we vintu evyo, amanukato gembombo ye ustadi ya bhantu bhabhalenganya amanukato, gaibha gakholele, safi, minza hwa ngolobhe. 36 Nawe gamo obhagapole tee, nagbhe hwitagalila hunongwa zya ngolobhe muhati mwihema lya khomanile, panaikhomana nawe; gope gaibha hulimwe minza tee. 37 No uvumba wa mubhalenganye, sagamwaihwilenganyizya ovumba wa uli ne vilongo neshi evyo; wubhabha winza huline. 38 Omuntu wa wonti wabhalenganye neshi owo, ili aununsye, omuntu oyo afwe.