¹ O Yahweh ahabhula oMusa, ² "Bhabhuula bhahu Israeli bhamfumizye esadaka ola muntu nawe oyejelele hwa muntu wawonti wabhafumye humwoyo ogwinza. Lazima oyejelele ezi esadaka sababu yaline. ³ Ezi zye sadaka zyobhahwejelele hwa bhene; edhahabu, ehela, ne shaba, ⁴ ebululu, ezambalau ne nshamwamu, ne menda ge kitani enyinza, na mawoya ge mbuzi; ⁵ ne ngola zye ndobhi zyazibhahwelwe ousha mwamu ne ngola ye pomboo, amakwi ge mjohoro, ⁶ amafuta ge tala, ne vintu vyavinushila shinza, humafuta gapahala ne vintu vyonti evinza; ⁷ amawe ge shohamu na mawe ga mwabho gapashenela enevera na hwahala afuko hapashifuloha. ⁸ Bhaleshe bhandanganyizye apinza ili ehala nabho. ⁹ Lazima ubhombe neshi ega gehulanga ofano gwe nyumba ne vintu vyakwe, ndivyo shabhabhabhombe. ¹⁰ Bhahwanziwa alenganye empogoso yikwi lye mjoholo. Otali wakwe ubhe ne dhiraa zibhele na nusu; na mapana gakwe dhiraa yeka na nusu, na bhale humwanya hwakwe edhiraa yeka ne nusu. ¹¹ Lazima olikwinshile muhati ne dhahabu enyinza na obheshe okingo gwe dhahabu alizyongole munshenje mwonti. ¹² Nawe obhayeyusye mviduara vine vye dhahabu, navibheshe mumagaga gakwe gane; eviduara vibhele oupande wakwe wabhele. ¹³ Nawe lazima olenganye amakwi amatali ge mshita na ikwinshile edhahabu. ¹⁴ Nawe lazima obheshe ego amakwi mviduala vyavili epande zibhele zyi mpogoso ili eyeje eyo empogoso. ¹⁵ Ego amakwi gabhakhale mula muviduara vye mpogoso; sagagaihwepa. ¹⁶ Esho obheshe mumpogoso endongozo zye mbahupele. ¹⁷ Nawe lazima olenganye igubiho lye dhahabu ilinza. Otali wakwe ubhabhe edhiraa zibhele na hashe, na amapana gakwe dhiraa yeka na hashe. ¹⁸ Nawe lenganya amakerubi gabhele ge dhahabu mumiisho gabhele gitengo lye rehema. ¹⁹ Bheha ikerubi limo hu mwisho umo wi tengo lye rehema, ni kerubi lyabhele hu mwisho gwa mwabho. Lazima ebho akerubi bhabha hantu hamo ni tengo lye rehema. ²⁰ Na ebho amakerubi bhabhabhosye amapiho amwanya, na likwinshile elyo itengo lye rehema n amapiho gabho. Amaso gabho gabhahwenyane na wehelekele itengo lye rehema. ²¹ Lazima obheshe itengo pamwanya pampogoso, esho obheshe endongozyo zyembahupele mpogoso. ²² Nane embakhomane nawe epo pampogoso. Naiyenga nawe pala pehweli pamwanya pitengo lye rehema. Yaibha pahati yabho amakerubi bhabhele bhabhali pamwanya pampogoso ye ushuhuda pana iyanga nawe hu mambo gembahubhole hu bhana bha hu Israeli. ²³ Nawe olenganye emeza yikwi lye mshiti. Outali wakwe yaibha edhiraa zibhele, no uvitima wakwe edhiraa yeka na bhale mwanya hwakwe dhiraa emo na hashe. ²⁴ Oikwinshile edhahabu enyinza mmwisho wa izyongola esehemu zyonti. ²⁵ Lazima olenganye ifelemu lya izyongole esehemu zyonti, ouvilima wakwe waibha nyanda zine, oumwisho we dhahabu alizyongole ifelemu lyonti. ²⁶ Olitenganyizye eviduara vine vye dhahabu na vibheshe mkona zyakwe zine, mmagaga gakwe gane pagahali. ²⁷ Vila eviduara vibhe karibu nalila ifelemu ili vibhe pabheshele gala amakwi, gahwejele emeza. ²⁸ Lenganya amakwi ge mshita, na ikwinshile edhahabu, aje ela emeza eyegwe hweyo. ²⁹ Nawe lenganya ensahani zyakwe, ne ntiho zyakwe, na makopa gakwe, ne vikombe vyakwe vyatapulile. Vilenganya vyonti vye dhahabu nyinza. ³⁰ Nawe obhabheshe amabumunda ge wonyesho pamwanya pameza hwitagalila lyane ensiku zyonti. ³¹ Nawe lenganya ahantu he taa he dhahabu enyinza; eho habhe he mbombo ya hwonjezye omwanga, eshikhosi shakwe, ni kwi lyakwe, vikombe vyakwe, na matovu gakwe, na maua gakwe, vyonti vibhabhe vya hantu hamo. ³² Hope habhabhe ne nsamba sita zyafume mumbazu zyakwe - ensaamba zitatu eshinara esehemu yakwe yeka, ne nsaamba zitatu esehemu yakwe yabhele. ³³ Osamba lwa kwanza lazima libhe ne vikombe vitatu vyavilenganyiziwe neshi amaua mlozi mnsaamba yeka, itovu ni ua ne vikombe vitatu vyavilengenywe neshi amaua mlozi msaamba yabhele, itovu ni ua. Shesho ezo ensamba zyonti sita zyazifuma mshinala. ³⁴ Mshinala esho, lazima mubhe ne vikombe vine vyavilengenywe neshi amaua mlozi, amatovu gakwe, na maua gakwe. ³⁵ Lazima hubhe ni tovu pansi pansamba - gabhele gagali pandwemo, ni tovu pansi pansamba zibhele zyazili pandwemo, hunsamba sita zyazifuma pashinala. ³⁶ Amatovu gakwe ne nsamba zyakwe gaibha gepandwemo, habhe honti nantele mbombo emo, yahwonjezye, ye dhahabu enyinza. ³⁷ Lazima nawe olenganye evyo evinara saba ne taa zyakwe saba, bhope bhaihwansya ezyo etaa zyakwe, zifumye omwanga hwitagalila lyakwe. ³⁸ Na makolelo gakwe, ne visahani vyakwe, vyonti vyaibha vye dhahabu enyinza. ³⁹ Tumila etalanta yeka ye dhahabu enyinza, pandwemo ne vyombo evi vyonti. ⁴⁰ Nawe enya aje ovilenganye neshi shabhalanjile hwigamba.