¹ Nkesho mumyongoni mwenyu awoha ukuwe au walota injozi, ² na nkesho ahobhapela ishala au mayele, na nkesho ishara au amayele gafumila, hansi shayanjile humwenyu na yanje, "Eshi tifate angolobhe abhamwawo, wasagatibhamenye, na tigabudu. ³ Usatejelezye amazu ga nkuwe oyo, au hoyowaleta injozi, afwatanaje uYahwe Ungolobhe waho ahujezya amanye nkesho ugene uYahwe Ungolobhe waho hu moyo gwaho gonti ni roho yaho yonti. ⁴ Mwayijenda baada ya Yahwe Ungolobhe wenyu, umweshimu, muzileme indajizyo zyakwe, na muyitii isauti yakwe na mwayihumwabudu na lemane. ⁵ Ukuwe oyo au walota injozi ayigogwa, hu sababu ayanjile utolosi wha Yahwe Ungolobhe wenyu wabhaletile afume hunse yi Misri, na abhagomboye afume munyumba yiwuboyi. Esho ukuwe ahanza hubhefwe mwidala lya Yahwe Ungolobhe wenyu abhawozezye ajende. Whesho bhishi uhutali imbibhi afume humwenyu. ⁶ Tiyanje aje uholo waho, umwana wa maye waho, au umwana waho, au umwale waho, au ushe wepepe nawe au uchale waho wali hansi iroho yaho, ahusipe husili na yanje, "Leha tibhale nawhabudu angolobhe abhamwawo sagatigamenye, wala awe wala ababu bhaho- ⁷ Angolobhe bhobhonti bha bhantu bhabhazyongolele, pepe namwe au uhutali afume, hu mwiisho winse abhale hu mwisho uwa mwao winse. ⁸ Usamweteshe au huntejelezye. Wala amaso gaho gosahalole inkombo, wala sagawayihuneha shipolo au humfise. ⁹ Baadala yakwe, wayihuneha kweli; inyobhe yaho yayibha ya whande hugoje, na pamande inyobhe ya bhantu wonti. ¹⁰ Mwayihupola hadi afwe humawe, hu sababu ajezizye hubhefwe afume wha Yahwe Ungolobhe wenyu, wabhefwizye afume hunse yi Misri, hunze yi nyumba yiwuboyi. ¹¹ Iisraeli yonti yayihevwa nahogope, na sagayayihendelela awombe ikabela yiwubhibhi mumyongoni mwenyu. ¹² Nkesho ubhahevwe wowonti ayanga ahusu yeka yi khaya zyenyu, aje uYahwe Ungolobhe wenyu ehubha pela akhale mukasi yakwe. ¹³ Abhamwenyu bhamo abhabhibhi bhaleshile mumyongoni mwenyu na leshe uhutali abhakhaya bhikhaya zyawo na yanje, "Leha tibhale na whabudu angolobhe abhamwawo bhasaga mubhamenye. ¹⁴ Basi wayipelelezya amanye, awombe uwupelelezi na huyipelelezye sha mukasi. Hu wakati umanya aje lyoli na hamuna amashaka aje uvisyo owo wowombeshe mumyongoni mwenyu, tena wayihega ihatuwa. ¹⁵ Wayihubhashambulila lyoli abhakhaya bhikhaya eyo hu makhali gi panga. Wayiteketezya kabisa na bhantu wonti bhabhali mukasi yakwe, pamoja ni vyoma vyakwe, pamoja na makhali gipanga. ¹⁶ Wayiwonganya inyara zyonti afume pakasi mu mitaa gakwe na wayipemba ikhaya, pamoja ni nyara zyakwe zyonti - afwatanaje uYahwe Ungolobhe waho. Ikhaya yayibha hali yibhibhi wila; sagawuhanziwa azengwe tena. ¹⁷ Nahamo hata heka kati yi vintu evyo vibheshewelwe sipesho kwa ajili yahangamizye vihanziwa akhamantane munyobhe yaho. Ene ihanziwa abhe nongwa, ili aje uYahwe abhageushe afume hu khali winkuni yakwe, ahunolesye irehema, abhe ni nkombo huliwe, na huwombe awe uyonjeleshe hu hesabu, hansi shalapile wha baba bhaho. ¹⁸ Ayiwomba eshi hu sababu utejelezya isauti ya Yahwe Ungolobhe waho, ahuzileme indajizyo zyaho zihuwozya ilelo, awombe shila shishili shinza whilongolela limaso ga Yahwe Ungolobhe waho.