¹ Na anli mwanama, tuterevie, kwa irina lya Ndumi amulikwaaniswa na iitikiswa, shakasa jikai kwanii. ² Terevei kyiimba titaulwa nlemei na vandu vareti amu mnvaase vaare ikusurunndi. ³ Kake Ndumi akeudeedei, ye amutomarisaa ini na imuringa na ngituva. ⁴ Toore finya kwa Ndumi kyiimba kyamu sheeli mrundaa na irundo findo fisuma ni na fila ndemuiya . ⁵ Ndumi amakyii ishilia mirima yanu kya ikunda na isisiria lya Kiristo ⁶ Anli tikemuvavasa, mwanama, kwa irima lya Ndumi Yesu Kiristo, sheeli lakanai na kila mwanama arule kya uroko ana kyiimba kya mikaaye mwasaria akuuka koru. ⁷ Kwa kyiimba ini muven mwishi sheelu nkisha itinla ise. Tarua kwanu sha vala vataare sonu ndi. ⁸ Ana lale shoonga ya ndu woose titaitaiya ndi. Kyiimba kya ikyo larunda mashora jio na nsanyii tena mashura maamu titavinga kaara titeemie woose ula kari kanu. ⁹ Tarunda kuri amu titaavo finya ndi, kyiimba kyayo tarunda amu amlolie kuuka koru kaara mukuvakanise naise. ¹⁰ Ilo tike andu emwi na ini lamvavasa kwangwaa umwi kari kari kanu ataari mashora atale. ¹¹ Amu tiisila sheeli venji kari kanu vakoe vakeenda kwa uroko. Vakerunda mashora ndi nvandu vataare waalio. ¹² Anli iva nao titevavasa na ivekyimba kari ka Ndumi Yesu Kiristo. Sheeli ngita varunda mashora kwa uwoo na ila shoonga yaao veni. ¹³ Kake ini vana vama mtafikwa mmirima irunda fisumani. ¹⁴ Kyangwaa nndu woose ataari iindia kirero kyeeru baruwei yii. kaai kyaambura naye ana mtaware undoo naye, amu asuke. ¹⁵ Mta nvakanise na ngituva kake mnaiyei. ¹⁶ Ndumi wa unambwe yemuni amuniinge unambwe feeri fyoose karika shiatoose Ndumi akaa na ini muwoose. ¹⁷ Ili yiisana lyakwa, Paulo, kwa uko lwakwa shimunii nayona alama ya barua nkuri ntisirie. ¹⁸ Unambwe lwa Ndumi weeru Yesu Kiristo lumakyii ikaa na ini muwoose.