¹ Khwenso Sauli, akhaendelea uhanya mantu oogh'ofha na ankuya kwa adhimi vama Thatha, akhaenda khene kuhani ni mukhuru ² na umuromba barua kwa ajili ama Sinagogi khukho Dameski, ili mbese ni wamuhanga muntu uyo mukhathi a njia iyo, athendekhe mugh'osia au mukhema, athungwe na uvaretha Yerusalemu. ³ Sokho nari ukhuhegh'a, ikhathendekha neari wahumbia Dameski, ghafla ikhamumwikhia khwong'ekhwong'e khimwiu ufhuma kirunde.' ⁴ mwenso akhagwa fhang'i na akhathegh'eya ruri ni ukhuhanya, "Sauli, Sauli, chu ukhunkhasya nene?" ⁵ Sauli akhahanya, Wi anyu veve Thatha? Thatha akhahanya, "Nene ni Yesu niukhunsimbia; ⁶ khwenso ukha, hefhea ung'ii, nave ujukhaniwa ni akhugh'okhee uthenda. ⁷ Avoyo antu narivathunguyie ithambi rimwe vina Sauli vakhakhia thwii, nivagh'imbiye ruri, vathaone muntu. ⁸ Sauli akhaukha mukhathi a ng'ii na newakhunukhua miho akhwe, athinadaha uona ringi, vakhamukhwaha mukhono vamuretha fhakha Dameski. ⁹ Khwa mathikhu athathu athikhengee, athulya, khunu athunywa. ¹⁰ Khwenso ari wifho mung'iya asule Dameski rina rakwe Anania, Thatha akharigh'itya nayo u ndothi, "Anania." Na akhahanya, "Rava nihafhai, Thatha. ¹¹ "Thatha akhamukhania, "Ukha wende mukhathi a muthaa ni ukhuithanwa nyofu, na mukhathi a khaya ama Yuda na endo wiya muntu ufhuma u Tarso niukhuithanwa Sauli; khwenso mbese ukhuromba; ¹² na akhamwona mukhathi a ndothi muntu rina rakhwe Anania akhahefhea na umwikhiya mikhono khunto akhwe ili khusokho adahe uona. ¹³ Khwenso Anania akhasiicha, "Thatha, nathegh'eya sayua muntu uyuo khwa antu ni vingi, khwa kiasi ikhi nari akhavathendea ni mavyi untu ni afhoo khukho u Yerusalemu; ¹⁴ Hafhai wina amuri ufhume khuni muthemi ni mkhuu umukhatha mu muntu ni ukhunithana rina rakhwe. ¹⁵ Khwenso Thatha akhamukhania, "Enda, khusokho mwenso ni ibele ni rija khuni nene, arihoe rina rane usonge a urimi na athemi na vana va Israeli. ¹⁶ Khusokho nijuvaragh'aa nino mingi ni ajomuthenda akhaswe kwa khusokho a rina rane." ¹⁷ Anania akhathunguya, akhahefhea khukhoo u nyumba; akhamwikhia mikhono akhahanya, Munyandugh'u Sauli, Thatha Yesu, nari wakhudwiya ufhuma unjia nari ujie, wantuma udahe uona khanki na uijuywe mwahu ni mweru. ¹⁸ Ghafla akhagwa u miho akhwe mantu, khinya mabada, akhahanga uona, akhimikha, akhafhumpwa akhalia malilwa na uhanga nguu. ¹⁹ Wakhikhaa ithambi rimwe na ang'iya va sule khukho Dameski kwa mathikhu mingi. ²⁰ U muda ururo akhamuhanya Yesu mukhathi a masinagogi, akhahanya mbense mwenso ni mwana wa Mungu. ²¹ Na vong'e ne vikhathegh'eya vikhaogh'ofha urigh'itya, "Nti muntu uyuyi ne akhavafhiranga nyong'e nari mwaithana rina iriyi khukho Yerusalemu? Na hafhai akhaja kwa ifhenji ro varuthia na uvothoa khuni makuhani." ²² Khusokho Sauli akhaariywa uhubiri na uvathenda a Yahudi nari vakhikhee Dameski vakharuangwa na umanyikha kuwa uyuyi ni mwenso Kristo. ²³ Baada a mathikhu ni mingi, Wayahudi vakhathenda ndighitya ithambi rimwe ili vamuuragh'e. ²⁴ Khwenso mufango wawe ukhamanyikha na Sauli, vakhamurindia umulango mumwi na uthikhu vahange umuuragh'a. ²⁵ Khwenso anafunzi vakhwe vakhamuhora ufhikhu vamusimya ukhiriya ukhuukutha, vakhamusimia fhang'i u nkapho. ²⁶ Na Sauli wafhukha u Yerusalemu, akhasoya ukhiunga na anafunzi khwenso ari venso vyumuthija, vathamanye mbese mwenso ni mwanafunzi. ²⁷ Khwenso Barnaba akhamuhoa na umuthoa khwa athumami, na akhavakhania mwino Sauli nariwamwona Thatha unjua na mwino Thatha nari ukhuhanya nayo, na mwino Sauli akharihanya kwa nguu rina rama Yesu khukho Dameski. ²⁸ Akhathana nayo nari vahefhea ufhuma u Yerusalemu. Akharigh'itya kwa nguu kwa rina rama Thatha Yesu, ²⁹ nivyukhikhania na Wayahudi vo Kiyunani sokho vyusoya thikhi thikhi umu uragh'a. ³⁰ Khwenso anyandugh'u nivajomanya ukhani uruyi, vakhamuhoa fhakha Kaisaria, na vamuthoe ende Tarso. ³¹ Basi ikhanisa rong'e khu Uyahudi, Galilaya na Smaria, rikhathendekha rina amani na rikhajengwa na uenenda na wova wama Thatha na uyanjo wa Mwahu ni mweru. Ikhanisa rikhakhua kwa ukhiongeya ni vingi. ³² Khwenso ikhathendekha Petro nari ukhufhimanga fhimanga mpande yong'e ya mikoa, akhavasimio akhisyu ni vukhikhaa ung'ii a Lida. ³³ Akhamwona khukho muntu umwedu rina rakhwe Ainea, muntu uyuyi ari akhu ndii miakha inane khwenso ari athuukhaa. ³⁴ Petro akhamugh'ania, "Ainea, Yesu Kristo akhufhorye ukha na ukhithandikhuje ndii akho, khwenso waukha. ³⁵ Na antu vong'e nevikhee u Lida na Sharoni ne vamwona muntu uyo, vikhamurava Thatha. ³⁶ Ari khwina mwanafunzi u Yafa ne ukhuithanwa Tabitha, nari rikhatafisiriwa khinya "Dorcas" Uyuyi mukhema akhaijua mwimo ni uja na ntendo ya uyanjo nari wa ithenda khini muntu ni athikhwethe. ³⁷ Ikhathendekha umathikhu asaya akhawaa na akhakhuya, nari vyumuthoa vakhamunantiya uchumba kha unto na umurencha. ³⁸ Khusokho Lida ari ifhifhi na Yafa, na anafunzi vakhathegh'eya niari Petro no wi khukho, vakhavathuma antu vaviri khuni mwenso, ni vyumukhania, "Njuu ukhithu bila uthinya". ³⁹ Petro akhaukha na uthungu ya ithambi rimwe nayo. Nari wagh'ea, vakhamuretha u chumba kha khunto na ajane vong'e vakhaimikha fhifhii na mwenso ni vyuria, nivumuragh'ia ikhothi na masaa nari Dorcas uvathumiye kipindi nari vi ithambi rimwe nayo. ⁴⁰ Petro akhavafunya vong'e unjii a chumba, akhathungama akharomba, na akhaurava mwiri, wahanya, "Tabitha, ukha". Akhakhunukhwa miho akhwe na newamwona Petro akhakhikhaa fhang'i. ⁴¹ Khwensa Petro akhamufha mkhono wakhwe akhamu ucha na uvaithana akhisyu na ajane, na uvafha venso ni mufanga. ⁴² Nkhani iyiyi ikhamanyikha Yafa ong'e, na antu vingi vikhamwamwini Thatha. ⁴³ Ikhathendekha Petro wakhikhaa mathikhu mingi u Yafa ithambi rimwe na muntu ni ukhuithanwa Simoni, mnyothenda ndii.