¹ Yakobo, ntumintumi gwa Mlungu na ntumintumi gwa Mtua Yesu Kristu, kwa mkakabila kumi na mawili yagawapasiwitwi,mwakashina. ² Mwalangi kuwela nemeru zaidi walongu wangu pampita mu matabaziu mbalimbali, ³ pamvimana kuwela kuyelwa kwa imani yenu kujega uvumilivu. ⁴ Mleki uvumivu imalili liyengu lakui , anda muwezi kukamara kabisa , pota kupungurwa mroseli. ⁵ Kumbiti paiwera pana muntu pakati penu pakafira hekima, kamrui Mlungu , mweni karavia kwa ukarimu pota kukalipila woseli ya wamrua, naakawapanani hekima. ⁶ Ila galui kwa imani, pata kutila maana yakatira kawera gambira makupala ya bahali, gatolwa na upepu na kwasilwa aku na aku. ⁷ Nakaka muntu ayu nakalihola mweni kuwela luwa yakui yanguliwa na Mtua; ⁸ muntu ayu kwawera na firu mbili , kagagamandili mu njira yakui yoseli. ⁹ Mromu muhushu kafiriziwa kuritumba mumsimamu gwakui, ¹⁰ shaka shirahashi mromu mrunda mu unyenyekevu wakuyi, maana akapalasiwi gambira uluwa la kushiwala murulambu la kapita. ¹¹ Mshenji guwala na luvuki liyumizia mimea na maluwa gaturuka na uherepa wakuyi ufua. Viravilii wantu warundu awachakali mumahengu gau. ¹² Katekelwa muntu yulii yakavumiria majaribu, kwa kuwera baada ya kushinda rijaribu ali akanki mafupu ga ukomu geni gaaidwiti kwa walii gawamfiriziiti Mlungu. ¹³ Muntu yoseri kafiriziwandiri kutakula pakayerwa "lijeruali wawandiri kwa Mlungu " maana Mlungu kajerwandili na ukondoru na Mlungu na weni kajerwa ndiri muntu yoseli. ¹⁴ Kila muntu kajerwa kwa matamata gakui gadoda yazimjega kutali. ¹⁵ Baada ya matamata ya madoda hujega yinda, madoda kulelwa na pamadoda kukamala, kupelela mu kuhoa. ¹⁶ Warongu wangu yaniwafira, namrizyanga. ¹⁷ Kila mafupu maheri na mafupu yagamalilika gakuwa kumbindi, huselela pasi kulawa kwa Tati gwa ulangala. Nakaka kagalambuka ndiri gambira shivuri ndambu ya shigarambuka. ¹⁸ Mlungu kasagula kutupanana twenga ukomu kwa shisoweru shanakaka, su tuwezi kuwera gambira uwika wakuyi wa kwanja, muvamu mwa humbi vyakuyi. ¹⁹ Mushimana hashi, warongu wangu ya niwafira. Kila yumu kafiriziwa kuwera mwepesi gwa kupikanila na siyu simwepesi gwa kuyowela ama kuwena maya, ²⁰ kwa kuwera maya ga muntu wezandiri kutenda haki ya Mlungu. ²¹ Hangu muturi kutari uchafu na vidoda woseli yawauwera pahara poseli na kwa unyenyekevu mwanki shisoweru shashiyalitwi mumkati kwenu, lyeni lya na uwezu la kukongola lohu zenu. ²² Mshimiri shisoweru nampikanira hera, pamlizyanga mumoyu mwenu maweni. ²³ Maana yoseli yakapikanila shisoweru pota kushitenda ndo sawa na muntu yakalilola mweni mu shiou. ²⁴ Kurirora mweni sheni shakui na kugenda zakui baada ya muda mfupi kalyalua mweni ndambu ya karifana. ²⁵ Ila muntu yulii yakarirola kwanakaka sheria ya ikamilika, na huru ya kujimila tozia mweni mpikanila ya kalyalua, muntu ayu akatekerewi pakaitenda. ²⁶ Paiwera muntu yoseli akaliholi mweni kuwera muntu gwa dinio, kumbiti kawezandiri kulewelela tulimi lwakuyi, kauziyanga moyu gwakui na dini yakui iyoelahela. ²⁷ Dini yaiwera safi kulongoru kwa Mlungu gwetu na tati ndo ayi: kuwatanka washiwa na wakenja mu ndambiku yau. na kurirola weni na watenda kurola pasupanu.