1 Want'hu wengi wagezaga vedi kwaviya wadahile kuwandika izimbuli ze vint'hu vilaile mgati mwetu. 2 Wawandikaga vint'hu viya kisimuilwe ni wadya waonaga vint'hu ivo kukongela nk'hongo, na wadya wabilikizaga Imbuli Yedi. 3 Kwaviya name hizungula ukindedi we zimbuli izi kukongela nk'hongo, hiona vedi niwawandikile kwa uwedi vint'hu ivo vose vilaile, mkulu Teofilo. 4 Hitenda ivi vileke weye nawe umanye kindedi che vint'hu vose uhinizwe. 5 Umwo Helode andaga seuta ywa Uyahudi, handaga na mlava nt'hambiko zina dyakwe Zakalia. Uyo andaga yumwenga mwe difyo dya walava nt'hambiko dya Abiya. Mkaziwe etangagwa Elizabeti, naye andaga ni ywa lukolo lwa mlava nt'hambiko etangwe Haluni. 6 Wose waidi wandaga wazumilwa kunda wedi ha Mnungu, naho waitozaga kwa kindedi Imiko yose ya Zumbe. 7 Wandaga hawana mwana kwaviya Elizabeti andaga hana cheleko, naho wose waidi wadalahalisaga. 8 Zuwa dimwenga Zakalia andaga mwe Nyumba nk'hulu ya Mnungu akadamanya ndima yakwe yo ulava nt'hambiko, enga ivo akudamanyaga mwo luzo lwakwe. 9 Viligane na ivo chandaga kihendo cha walava nt'hambiko, usaguzi wamgweelaga Zakalia kwingila mwe Nyumba ya Zumbe kufunk'hiza ubani. 10 Fyo dya want'hu nadyo dyandaga dikuse dikamlombeza Mnungu umo ubani wandaga ukafunk'hizwa. 11 Niyo mtumigwa ywa Zumbe amlaila no kukimala hakulume he kilingo cho kufunk'hizila ubani. 12 Zakalia eze amuone, etukaga na kwingilwa ni wogofi. 13 Mna yudya mtumigwa ywa kwe Mbingu niyo amgamba Zakalia, “Usekogoha Mnungu keva kulombeza kwako. Mkazio Elizabeti naakwelekele mwana kilume, nawe noumwitange niye Yohana. 14 Weye nawe nounde na kinyemi na kusekeela, naho want'hu wose nawande na kinyemi kwa kwelekwa kwakwe. 15 Naande mkulu ha Zumbe, naho haanywe divai hegu mp'hombe yoyose. Naamemezwe Muye ywa Mnungu kukongela dizuwa dyo kwelekwa kwakwe. 16 Naawavuze want'hu wengi wa Izilaeli kwa Zumbe Mnungu ywawe. 17 Naye naamlongoele Zumbe kwa Muye na ludole lwa Eliya, na aihitule mioyo ya welesi vileke waivane na wana wawe. Naawavuze want'hu wasaguke vileke wande wedi ha Mnungu no kumwiikila Mnungu want'hu waikilwe lumwe.” 18 Zakalia niyo amgamba mtumigwa ywa kwe Mbingu, “Nenimanye vivihi zimbuli izi? Miye hidalahala, naho hata mkazangu naye kadalahala.” 19 Mtumigwa ywa kwe mbingu niyo amgamba, “Ni miye Gabilieli hukimala ha Mnungu anitumile nize nilonge na weye na kukugambila mbuli ino iyedi. 20 Mna kwaviya huhuwile ulosi wangu, houdahe kulonga kubula mwe dizuwa idyo, aho zimbuli izo nezilaile.” 21 Want'hu wandile kuse wakamgoja Zakalia, niyo weheelwa kwaviya ekalise kufosa kwe Nyumba ink'hulu ya Mnungu. 22 Eze afosele kuse, niyo anda hakudaha kulonga nawo. Woho nawo niyo wabunk'hula kugamba nakaona maona mwe Nyumba nk'hulu ya Mnungu. Kwaviya andaga hakudaha kulonga, andaga akalonga nawo kwa vilagiso. 23 Zakalia eze abinde indima yakwe niyo auya kaya. 24 Yeze yomboke mazuwa mageke, Elizabeti uyo mkaziwe niyo enula ubovu, ivo andaga hahalaile he nyumba yakwe kwa miezi mishano. 25 Niyo agamba, “Zumbe kanidamanyila mbuli ino! Haluse kanionela mbazi, naho kaniusila soni zangu mwa want'hu.” 26 Mwo mwezi wa mtandatu wo ubovu wa Elizabeti, Mnungu amtumaga mtumigwa ywa kwe Mbingu etangwe Gabilieli kwe isi ye Galilaya, mwo mzi ukwitangwa Nazaleti. 27 Nakanda na ulosi kwa mwali na mazanga akwitangwa Maliamu. Mndele uyu andaga katumizwa ni mgosi yumwenga etangagwa Yusufu, andaga ywo lukolo lwa zumbe Daudi. 28 Mtumigwa ywa kwe mbingu amwizilaga mwali uyo niyo amgamba, “Ndamsa! Zumbe e hamwenga na weye, naho kakuvikila vitendese.” 29 Maliamu engilwagwa ni kinyulu kwo ulosi udya wo mtumigwa ywa kwe mbingu, naho niyo ehelwa mbuli idya nivo yagaaze. 30 Mna mtumigwa ywa kwe mbingu niyo amgamba, “Maliamu, usekogoha! Mnungu kakulagisa uwedi wakwe. 31 Kaula, nowinule ubovu, naho noweleke mwana kilume, zina dyakwe noumwitange niye Yesu. 32 Naande mkulu naho neetangwe Mwana ywa Mnungu e Kulanga. Zumbe Mnungu naamwink'he difumbi dyo useuta enga ivo andaga mkale ywakwe Daudi. 33 Naande Seuta ywe cheleko cha Yakobo mazuwa yose, naho uzumbe wakwe ni wa ulo na ulo. 34 Maliamu niyo amgamba yudya mtumigwa ywa kwe mbingu, “Miye ni mwali na mazanga. Elo neinde vihi mbuli ino?” 35 Mtumigwa ywa kwe mbingu niyo amhitula, “Muye ywa Mnungu naakwizile, naho ludole lwa Mnungu ekulanga nelukugubike. Kwaivo mwana akuunga elekwe neetangwe, akukile Mwana Mnungu. 36 Naho, kaula nduguyo Elizabeti kenula ubovu wa mwana kilume mwo udala wakwe naho uno ni mwezi wa mtandatu. Naakalongwa hakudaha kweleka, mna ivi haluse mbovu ywa miezi mtandatu iivo adalahale. 37 Kwaviya hadihali Mnungu heekudaha kudidamanya!” 38 Maliamu niyo amgamba, “Miye ni mndima ywa Zumbe, nevinde kwangu enga ivo ukulonga.” Mtumigwa ywa kwe mbingu niyo ahalawa no kuita. 39 Akajika aho, Maliamu niyo akeika lumwe na kusunguza kwiita kwo mzi umwe vigulu va isi ya Uyahudi. 40 Niyo engila kwe nyumba ye Zakalia na kumlamsa Elizabeti. 41 Elizabeti eze eve Maliamu akamlamsa, kazana kandaga mwe nda yakwe katugusaga. Elizabeti andaga kamemezwa Muye ywa Mnungu, 42 niyo alonga kwa izwi kulu, “Weye kuvikilwa kujink'ha wavele wose, mwana naye ukuunga umweleke kavikilwa! 43 Nii mbuli ino ink'hulu ikanilaila miye, nine dya Zumbe ywangu akeza kunitalamkila? 44 Nize nive du indamsa yako, kazana kwe zinda zangu niyo katugusa kwa kinyemi. 45 Kaula kinyemi unanacho weye uhuwile mbuli ya Zumbe, kwaviya neinde kindedi kwako.” 46 Maliamu niyo agamba, “Moyo wangu wamtogola Zumbe, 47 no muye wangu welelwa kwa mbuli ya Mnungu, Myokozi ywangu, 48 kwaivo anikumbukile miye mndima ywakwe mkiwa kukongela dielo na kugendeela, want'hu wose nawanitange mvikilwa, 49 kwe zimbuli zakwe zink'hulu Mnungu wo udahi anidamanyile. Zina dya Mnungu dikuka. 50 Kukongela cheleko iki na kugendeela kalagisa mbazi kwa wadya wakumhuwila. 51 Kadamanya vint'hu vikulu kwa udahi wakwe. Kawatenda wadya wakukefenya mwe mioyo yawe wasambale. 52 Kawakinya maseuta kulawa mwe difumbi dyo useuta, na kuwenula want'hu waoneke kunda wasokezi. 53 Kawegusa wata sala kwa vint'hu vedi, naho kawagulusa wagoli heweena kint'hu. 54 Kamwambiza mtumwa ywakwe Izilaeli, naho hajaile kulagisa zimbazi zakwe 55 (kwa tati yetu Ibulahimu) hamwenga na cheleko chakwe ulo na ulo.” 56 Maliamu nakekala na Elizbeti miezi mitatu, niyo auya kaya kwakwe. 57 Lupisi lwa Elizabeti wa kweleka uze ubule, niyo eleka mwana kilume. 58 Want'hu we haguhi naye hamwenga na wanduguze weze weve ivo Zumbe kamuwonela mbazi, niyo wanda na kinyemi hamwenga naye. 59 Umwana eze abule mazuwa mnane, niyo want'hu wagenda kumvina. Waungaga wamwink'he zina niye Zakalia, idizina dya ise. 60 Mna nine niyo alemela no kuwagamba, “Bule! Dizina dyakwe neetangwe Yohana.” 61 Niyo wamgamba, “Mna hahali mnt'hu mwe lukolo lwenyu mta dizina idyo.” 62 Niyo wamuuza ise kwa vilagiso vileke awagambile kugamba umwana etangwe ani. 63 Zakalia niyo alombeza kabao kakwe kwo kuwandikila, niyo awandika mwe kabao kadya, “Zina dyakwe niye Yohana.” Want'hu wose niyo weheleswa! 64 Ahadya Zakalia adahaga kulonga naho, niyo akonga kumtogola Mnungu. 65 Want'hu we haguhi naye wengilwagwa ni wogofi, niyo imbuli idya yagendezwa mwe vigulu ve isi ya Uyahudi. 66 Naho wose weviga zimbuli izo niyo nawakeuza mwe mioyo yawe, “Mwana uyu na ande mwana ywa vivihi? Kwaviya ludole lwa Zumbe lwihamwenga naye. 67 Zakalia, ise dya Yohana niyo amemezwa Muye ywa Mnungu, niyo akonga kulotela. 68 “Atogolwe Zumbe, Mnungu ywa Izilaeli! Kwaviya keza kuwambiza want'hu wakwe no kuwakombola. 69 Kakikimalisila uyokozi una ludole, mwe nyumba ya Daudi mndima ywakwe. 70 Enga ivo alongaga kwa milomo ya walotezi wakwe wakukile kukongela uko kale 71 kugamba naakiyokole kulawa mwa wank'hondo wetu, na kulawa mwo ludole lwa wadya wose wakukiihiya. 72 Nakagamba nawaonele mbazi wakale wetu, naho naakumbukile ndagano yakwe ikukile. 73 Amlaganaga Ibulahimu mkale ywetu 74 kugamba naakikombole suwe kulawa mwe mikono ya waihi wetu. Naho naakitende kidahe kumdamanyila ndima haheina wogofi, 75 kwa kukuka na kuzumilwa kunda wedi hameso hakwe, mwa mazuwa yose yo ugima wetu. 76 Nawe mwanangu, nowitangwe mlotezi ywa Mnungu ekulanga vitendese. Kwaviya noumlongoele Zumbe, umdamanyile isila, 77 kuwagambila want'hu wakwe kugamba nawayokolwe kwa kuusilwa wavu wawe. 78 Kwe zimbazi no ywedi wa Mnungu ywetu, akink'ha ung'azi wa ukombola kulawa kwe mbingu, 79 awang'gazile want'hu wose wakwikala kwe kizuli che file, na kuzilongoza nk'hacho zetu mwe sila yo utondowazi.” 80 Yudya mwana niyo akula no kongezekela umwili hamwenga no muye. Niyo ekala kwe nyika mpaka mwe dizuwa diya awalailaga want'hu wa Izilaeli.