¹ Ingulonda mmanye mumwo ingwikakila kumaka ukubhomba imbombo ku nongwa jyinyu, kunongwa iya bhandu bhabhwo bhakwikala munaya aka Labhondikeya sona na kunongwa iya bhwandu bhoshi bhwabho bhatamenye na lumo. ² Ingubhwomba ulwo ukuti imbakashe nukwikusila iya kughanana bhenebhene bhabhange pamupene nu kubhwa nubhumanyi bhwoshi bhubhwo bhwukubhapa ubhwanaloli ubha Chala, ku sila iyo bhabhaghile ukushima nya inonghwa isha Chala shisho shitabhikinghwe paghwelu shisho ghwi Kilisti. ³ Ukilisti uyo ghweyuyo akubhapa abhandu amahala nu bhumanyi ubhwa kushaghania inonghwa isho. ⁴ Ingubhwasimbila isho ukuti manye umundu najhumo abhashimbulaghe kumashu ghake agha kupyelesha. ⁵ Pamupene nukuti indi kubhutali numwe kumubhili, pope ingwongela ukubhinong'ona mundumbula yangu amashiku ghooshi. Ingupulika mumwo mkwikala pampene na mumwo muwikakila ukumwitika u Kilisti. ⁶ Kunongwa iya kuti mumwitikite u Yesu ukubhaghwi malafyale ghwinyu, ongolagha ukumkonga mubhumi bhunyu bhwoshi. ⁷ Ongelagha ukwijumila ukumwitika ukilisti nu kwina akisa mu lwitiko isa mumwo mukamanyilagha, soona mumupalishange Uchala ku shila shisho akubhabhombela, ⁸ Mubhwange moso ukuti umundu nayumo abhashimbulaghe ku sila iya fimanyisha fyake fifyo fitakwafwa na kamu ni fya bhumiyashi shisho nyiho sha bhandu sana fimanyisho ifya bhandilo ifya chisu ichi, ifimanyisho ifyo fitakufuma kwa Yesu Kilisti. ⁹ Papo mubhundu ubhwa Kilisti, umwene ali isamumwo Uchala abhelile muli shoshi. ¹⁰ Kusila iya kubha pampene nu Kilisti. Umwe muli nu bhwumi bhwoshi. Umwene ghwejyujyo ghwi songo ughwabhosongo na bhalongoshi bhwoshi. ¹¹ Kusila iya kubha pamupene nu Kilisti umwe mkakwesulighwa, mtakabha mkubhwumbela utukono utwa bhandu, lole mkapakighwa nu Kilisti kusila iya kubhapoka ukufuma kubhandu ubhwa mbibhi. ¹² Papo ghwo mwoshighwa mkabhwa ungati mkafwa nukushilighwa pamupene nu Kilisto soona, mkabha ungati mkashuka pampene naghwe, akabalilo kako mkapokelagha amaka agha Chala jyujyo akamushusha. ¹³ Kubhwandilo numwe mkabha ungati bhafwe kunongwa jya mbibhi shinyu nakunogwa iya kuti mkatakwesulighwa. ¹⁴ Uchala akaghatisha amasimbo agha ndaghilo ghwushi ghagho ghakatusitakagha kununghwa iya mbibhi kusila iya Yesu ukilisti ukukomelighwa pakikohekano. ¹⁵ Pachikohekano apo papopo ukilisti akopoka amaka aghabhwosongo nabhwalongoshi abhambepo imbibhi isho nukukosha isoni pa bhwelu. ¹⁶ Manye umuntu nayumo abhalongaghe kunongwa iya findu, panu fila fifyo mukungwa, kunongwa iya lusekelo, ulusekelo ulwa kusomoka umweshi panu kunongwa iya sabhati. ¹⁷ Papo fila fyoshi chifwwonikisho icha shila shoshi shikwisa mundashi. Lole ukilisti ghwe jyujyo ghwanaloli ghwa mbombo shoshi isho. ¹⁸ Manye mwitikaghe ukulongighwa nu munda jyujyo akwibhika ukubha mwisa kusila kwijyisha nukubhuputa abhandumi. Umundu ujyo akwikakila ulingania ingani shisho akushibhona munjoshi amifuno ghake agho ghakufuma kwa Chala lole ghakufuma mubhundu bhwake bhwa mbibhi. ¹⁹ Umundu ujyo alikubhutali nu Kilisti jyujyo akuchilungosha ichipanga isa mumwo umutu ghukughulongosha umubhili. Umwene akutubhika pampene utumbakasha ningelo isha mubhili ghwashi ukuti fikula ghe ukukongana nubhighane ubhwa Chala. ²⁰ Umwe muli ingati mkafwa pamupene nu Kilisti, sona mkabhulighwa ukufuma kufimanyisho ifya bhwandilo ifya chisu ichi fifyo fita kukwafwa na kamu. Kali koni mkwongola ukwikala sona ungati bhandu abha mchisu ichi?'' Kali koni mkushikanga inyiho. ²¹ Shisho shisimbighwe ukuti manye mkolaghe ichi panu manye mupalamashange ichi pamu manye mughonjaghe ichi? ²² Shoshi isho ndaghilo sona fmanysho ifya bhandu fifyo fikukomanika kukabhallo akapimba linga abhandu bhafibhombela imbombo. ²³ Naloli abhandu bhabho bhakukonga inyiho isho bhakubhoneka ungati bhandu bha bhala, bhakwikakila ukukonga ulwiputo lulwo bhwibhikile bhabho bhene, ukwijyosha nukuyifulasha imibhili jyabhwo. Lole inyiho isho shitakubhofwa nakamuukufipota ifinyonywa ifibhibhi ifya mibhili jyabho.