¹ Chikahi hechi pahikita ku Yerusalemu, pavaheghalya Besthfage ni Bethania, mu chitombi chi Mizeituni, Yesu akavatuma vaveli miongoni mwa vanafunzi vake. ² ni akavapwaghila, "Muyenda mu kijiji chechikabiliana ni tenga. Mala pamayingala mola,mwanhimaniya mwanaliponda ambayi ngachekwelikwi.Mwambopula ni mwamuleta kwango. ³ Ni ngati yokapi avapwahila, 'ndava kiki mutenda vela?' mupaswa kuvaha, 'Bambo amuhitaji ni mala ankeluhila pambani." ⁴ Vakapiti ni kulihimani liponda valikongiki kunja yi ndyangu kouvii mutaa wouvii waze, nivombi vakaliwopola. ⁵ Ni baazi yi vandu vakavi vayemi pala ni vakavapwaghila, "Mutenda kike, kumbopola mwanaliponda oyu?" ⁶ Vakavapwaghila ngati Yesu moakavapwaghila, ni vandu vakavaleka vayenda. ⁷ Vanafunzi vaveli vakalileta mwanaliponda kwaka Yesu ni vakatandika malaya yawu panani yaki ili Yesu aweza kulikwela. ⁸ Vandu vanawingi vakatandika malaya yawu mu balabala, ni vangi vakatandika mandambi yavayahekiti kuhuma mumighonda. ⁹ Vala vavakapiti kulongi yawu na vala vavakanjengali vakapegha mangomela, "Hosana! Abalikiwi yoahika kwa lihina laka Bambo. ¹⁰ Ubalikiwe ufalumi wouhika wa tati witu Daudi! Hasana kwa yoyuvi panani." ¹¹ Ndipo Yesu akayingila ku Yerusalemu ni akayenda ku hekalu ni akalolaki kila chindu. Henu chikahi chikavi chipiti, akapiti ku Bethania papamu nawu kumi ni vaveli. ¹² Lichova lelayengalya, chikahi pavavi vamuya kuhuma ku Bethania, akawona injala. ¹³ Ni akauweni nkongu wu mtini wowukavi ni mahamba kwa kutali, akayenda kuulinga ngati aweza kupata chokapi panani yaki. Ni chikahi paayenda kwa wola, ngacheakapatiki chokapi isipokuva mahamba, kwa kuva ngacheyikavi majila yi mtini. ¹⁴ Akaupwaghila, "Njeta yokapi yoakulayi tunda kuhuma kwaku kaveti." Ni vanafunzi vaki vayowana. ¹⁵ Vakahikiti ku Yerusalemu, Niyombi akayingi mu hekalu nu kutumbu kuvawoha kunja vavahemilya ni vavahemela mukati yi hekalu. Akazing'anambwi meza yi vabadilishaji wa fedha ni hitewu hya vala vavakavi vahemele injeva. ¹⁶ Ngacheakumuluhusu yokapi kutatola chokapi mu hekalu chechikawezikini kuhemeleha. ¹⁷ Akavawoliki nu kuvaha, "Je ngacheyalembakiki, 'nyumba yango yakemilika nyumba yi sala kwa mataifa yoha?' nambu muitendiki pangu la vanyang'anyi." ¹⁸ Makuhani vakolongwa ni vaandishi vakayowini moakavi avaha, nawu vakatafuta ndela yi kunkoma. Hata vela vakanjogwipi ndandi umati ukakangichi mawolu yaki. ¹⁹ Ni kila chikahi chimihi pachihikika, vakawokiki pu mujini. ²⁰ Pavakavi vayenda pulukyela, vauweni nkongo wu mtini uyomiki mpaka ku mikegha yaki. ²¹ Petro akakomboka nu kuvaha, "Rabi! Lolakya,nkongu wu mtini woukaulaani uyomike." ²² Yesu akavayanga, "Muya ni imane muka Chapanga. ²³ Amini numpwaghila kwamba 'Wokayi,ni ukalilekalya wamweti bahalini, ni ngati ngacheuvi ni mashaka mu ntima waki nambu aamini kwamba cheakavahiti chawokila, vela ndivyo Chapanga moatendila. ²⁴ Kwa vela numpwaghila: kila chindu chendova nu kulalukila kwa ajili yaki, muaminayi ngati muyopiki, navyo vyaya vinu. ²⁵ Chikahi pamuyema nu kulova, mupaswa kusamehe chokapi dhidi yika yokapi, ili Tati winu yoyuvi kunani ansamehi kaveti mwanga mahoku yinu. ²⁶ "Nambu nangakusamehe, wala Tati winu yoyuvi kunani ngaansamehi dhambi yino." ²⁷ Vakahikiti ku Yerusalemu kaveti. Ni Yesu paakavi atembela mu hekalu, makuhani vakolongwa, vaandishi ni vazee vakahika kwaki. ²⁸ Vakampwaghila, " Kwa mamulaka woli utenda mambu yanaya?" Na ni nane yoakupeki mamlaka kuyatenda yanaya?" ²⁹ Yesu akavapwaghila, "Yanundalukya swali limo. Munipwaghila ni nenga nanimpwaghila kwa mamulaka woli niyatenda mambu yanaya. ³⁰ Je, ubatizo waka Yohana wahuma kunane au wahuma kwa vanadamo? Munijibwaye." ³¹ Vakajadiliana miongoni mwawu ni kushindana nu kuvaha, "Ngati natuvahiki kuhuma kunani,' avaha, 'Ndava ki basi ngachemamwamini?' ³² Nambu ngati natuvahiki, 'Kuhuma kwa vanadamu,'..." Vavakavayogwipi vandu, kwa kuva voha vakakamuliki kwamba Yohana akavi nabii. ³³ Ndipo vakanjanga Yesu nu kuvaha, "Ngachetumanye. Ndipo Yesu akavapwaghila, "Wala nenga nganumpwaghili ni kwa mamulaka woli niyatenda yanaya.