¹ Yesu ekali hekaluni na kuso ku-u. Vahina ku-u vekamsoya na kum-aija minda ya hekalu. ² Mira ekavalandula, "He, tumuaho mburi kabuna ya? Kweri namubaya, tehelo isaheru lineshighala ana ya ihali bila kupuwe. ³ Na arehema he Lungori lwa Mizeituni, vahina ku-u vekamdosa venye na kuba, "Tubaye, mburi ya jinelianya ami? Ni kigi mina chinekwa dalili ya kulita ke na mwisho wa dunia?" ⁴ Yesu ekalandula na kuvabaya, "mukwa chonjo ite mhe asee-mta. ⁵ Kwaite vakumure venelita kwa ilhe gho. Veneba, 'Ani nihu Kristo', na venevata vakumure. ⁶ Mneko nkondo na mburi ja nkondo. Wesiani msee kwa na futofuto, kwaite buri ya jinelijanya bi; mira hu hu mwisho unekwa teunahe. ⁷ Kwaite itaifa lineka kukwe na itaifa ihali, na udilao kukwe na udilao. He nekwa na kela na kuzingizika kwa ardhi hodi hakumure. ⁸ Mira mburi ka kabuna nija bosi bi he uchungu wa kusa. ⁹ niho venevagu kwa masulumijo na kuvaga-a. Mnesanuiwa ni mataifa makabuna kwa mburi yailhe gho. ¹⁰ Niho vakumure vekuhiri na kusalitiana na venesanuiana vo kwa vo. ¹¹ Valotezi vakumure va mambeza venelijanya na kuvata vakumure. ¹² Kwaite makusa eneongejika, udumuisho wa vakumure unesaru, ¹³ Mira enesumirija mpaka mwisho, eneokolwa. ¹⁴ Ya Injili ya udilao inehubiriwa he idi izime sa ushuhuda he mataifa makabuna. Na niho hu mwisho unehe. ¹⁵ Kwato mkuneaho malha ya ku-oni, liyoiwe ni mlotezi Daanieli la-auma hodi hatakafu [esoma na ile], ¹⁶ niho veata Yuda vauguluye mangori. ¹⁷ Na hu eata ana he mi-a ya minda asidimi dori kigi chochose kuli za ya minda ke, ¹⁸ nahu eata he mbuva asikirii kudori gomae ku-u. ¹⁹ Mira ole kini velo va-inyi na hu vegosija he ma-aze ka. ²⁰ Tasani ite kugugulu kaghu kusikwa he sa, kana i-aze la sabato. ²¹ Kwa ite henekwa na dhiki giru,teyenaralijanya kuvoka kuumbwa kwa ulimwengu mpaka wa-i, na neri teikalijanya wa. ²² Kai ma-aze te-ete fupishwa, tehelo esemuru kuokoka. Mira kwa mburi ya vesaghurwe, ma-aze ka enefuhijwa. ²³ Halafu kai mhe wowose enemuba 'Wesia, Kristo eata i-i! kana, 'Kristo eata twai " msimuamini mburi ka. ²⁴ Kwa ite Makristo va mambeza na valotezi va mambeza venelita na kuaija ishara giru na maajabu, kwa mburi ya kulahatianya, kai cheku-muruika hata vesaghurwe. ²⁵ Wesiani, naa-mubaya mburi jisina lijanya. ²⁶ Kwato, kai venemubaya, "Kristo eata jangwani,' msieso are jangwani. Kana, 'Wesiani, eata za he minda,' msiamini mburi ka. ²⁷ Sa radi cho imurika kulia mashariki na kumurika mpaka magharibi, nicho chinekwa hekulita he M-inyi wakwe Adamu. ²⁸ Hohose uata mzoga, are niho tai jikusanyika. ²⁹ Mira baada ya dhiki giru ja maa-ze hu, I-aze line butuwe kidughu, Mlhihe teukagu mwangaza ku-u, ntondwe jinelhu kuli ana, na nguvu ja mbinguni jinesingiza. ³⁰ Niho ishara ja m-inyi wakwe Adamu ineahoika ana, na makabilamakabuna ya dunia yeneomboleza. Venemwaho M-inyi wakwe Adamu ekulita he majunde ya ana kwa nguvu ya utukufu mgiru. ³¹ Enevasugha malaikaku-u ya tarumbeta, navo venevatuta hawe vasaghurwa ku-ukuli bwa hai ja dunia, kuli mwisho muwe wa mbingu mpaka mhali. ³² Hinani isomo kuli he mtini. Too bi itambi likushuka na kugu mahako, mraile ite kiangazi kiata sina. ³³ Kwato iji, mkuneaho mburi ya kabuna, mdumuwe kuile ite aahe sina, eata sina na luhige. ³⁴ Kweri nimubaya, kizazi ya techikataho, mpaka mburi kabuna ya jinekwa ja lijanya. ³⁵ Mbingu na di jinetaho, mira mburi ho tejikataho neri. ³⁶ Mira mburi ya i-aze hu na saa tehelo mhe eiliye, neri malaika va mbinguni, neri M-inyi, mira Aba mwenye u. ³⁷ Sa cho che kwae he ma-aze ya kwe Nuhu, Nicho chinekwa kulita he M-inyi wa Adamu. ³⁸ Kwaite he ma-aze ka gharika vahe ve-eku-a na kuwaha, vekudori na kudoriwe mpaka hu i-aze nuhu ekabuu he safina, ³⁹ Na teve-iliye kigi chochose mpaka gharika irehe na kuvati-ianya vakabuna- nicho inerakwa kulita kwa M-inyi wakwe Adamu. ⁴⁰ Niho vahe vanu venekwa hembuva- muwe edoriwe, na muwe erowe mzungure. ⁴¹ Valage vanu venekwa veshagha hawe- muwe enedoriwe, na muwe eshighala. ⁴² Kwato mukwa ma-ila kwaite tem-iliye i-aze mina yo enelita Dilao kaghu. ⁴³ Mira m-ile ite, Kai dilao elo minda nanga eiliye ni saa me mgwalo enelita, eseehema maila na teseero minda ku-u kuvamiwa. ⁴⁴ Kwato mdumuwe kuhema tayari, kwaite M-inyi wa Adamu enelita he saa msii-la-aye. ⁴⁵ Kwato niji e mwaminifu, mzasughawe elo akiri, Hu dilao ku-u em-o madaraka ana ya veata he minda ku-u, nesa ava-o viaghu he muda u ye? ⁴⁶ Keba na mhe ka, enehelhawe ni dilao ku-u enemheya ekubo-i to wakati ekulita. ⁴⁷ Kweri nimubaya ite dilao enemke ana ya kila kigi eki ku-u. ⁴⁸ Mira kai Mzasughawa mkusa ekuyo he swaho ku-u, 'Dilao gho aacheri,' ⁴⁹ na ekavoka kuvama vanyamalo ku-u, na eka-a na kuengeli va kuwaha, ⁵⁰ Dilao wa mzasughawa ka ekulita he ma-aze esi-iliye, na he saa esi-iliye. ⁵¹ Dilao ku-u enemte vihindi vinu na kumke he nafasi we sa vanafiki, ambaho henekwa na kizoi na kushagha ma-iki.