¹ Mafarisayo na masadukayo vekamlitia na kumghesha Yesu avaaije ishara ili ana. ² Mira Yesu akavalandula na kuvaba ite kai ni chamagheri mtaba ite hali ya hewa ni kulho, kwaite ianga libayu. ³ Na chalhenu mtaba 'Hali ya hewa si kulho kwa ite ianga libayu na majumbi yaghubika ianga ikabuna.' Muilie kulag'honi miahoikike ya ianga, Mira tem-muru kulag'honi ishara ja nyakati. ⁴ Kizazi kikusa na cha uzinzi chidaa ishara, mira tehelo ishara yoyose chineowe, sa hu ya kwe Yona. Halafu Yesu ekavaro na ekaso ku-u. ⁵ Vahini vekalita kwa bwa wa kanu, mira vekwae vaazi kudori mikate. ⁶ Yesu ekavaba " Muwesi-ishishe na mukwa makini na vikusa vya mafarisayona masadukayo." ⁷ vahini vekahojiana vo kwa vo na kuba. "Ni kwaite tetudorie mikate." ⁸ Yesu ekaile ka na kuba Kune ml;o imani ja gitutu, kwa ahoni mwafanyanya na kuyoiyana kune kwa kune na kuba ite kwa ite temdorie mikate? ⁹ He bado tem-iliye neri temhulha hu mikate mikoi he vahe elfu koi, na viteju vime vyo mtutie? ¹⁰ Kana mikate saba na vahe elfu hai, na ni viteju vime mdorie? ¹¹ Ikwaemo hata temuelewa ite nikwae siyo na kune ja mikate? Hinani na lag'honini na chachu ya mafarisayo." ¹² Halafu vekaile ite te-ekuvabaya mburi ja kulang'honi na mikate ilo chachu, mira kulang'honi na mahinizi ya mafarisayo na masadukayo. ¹³ Too Yesu arehe hodi ja Kaisaria ya Filipi, ekavalhasu vahini ku-u, ekuba, "Vahe veba ite M-inyi wa Mhe niji?" ¹⁴ Vekaba ,"Vahali veba ite ni Yohana Mbatizaji; vahali, Eliya; na vahali, Yeremia, kana muwe wa valotezi. ¹⁵ Ekavaba, kune muba ani ni ji? ¹⁶ Ekalandula, Simoni Petro ekaba, "Ari ni Kristo M-inyi wa Kiumbi eata swaho" ¹⁷ Yesu ekalandula, "Keba ari, Simoni Bar Yona, Kwaite sako na nihena tevikughubulie ya, mira Aba gho eata mbinguni. ¹⁸ Na ani nikubaya ite ari ni Petro, na ana ya isaheru ya ninelikwa ikanisa gho. Maluhige ya kujimu teikalishinde. ¹⁹ Nineku-o ari funguo ja udilao wa mbinguni. Chochose unechilhatia duniani chinekwa cha lhatiwe mbinguni, na chochose unechilhaya duniani chinelhaiwa mbinguni. ²⁰ "Halafu Yesu ekavaamuru vahini vasimbaye mhe wowose ite nee-u Kristo. ²¹ Kuvokia ka iaze Yesu ekavoka kuvaba vahini ite ni lazima aso Yerusalemu, kusumirijwa kwa mburi kumure he miheregha ya vazee na vagiru va makuhani na vaandishi, kuga-awe na kufufuka iaze la kakai. ²² Halafu Petro ekamdori Yesu kakera na kumjoghoya , kwa kumba, "Mburi ya na ikwa uda na ari, Dilao, ya lisilianye hake. ²³ Mira Yesu ekageuka na kum-ba Ptro, "kirii mzungure gho shetani! Ari u kizingiti hagho, kwaite tuilie mburi ya Kiumbi, mira mburi ja vanadamu." ²⁴ Halafu Yesu ekavaba vahina ku-u, "Kai mhe wowose ekudumu kunidosa ani, ni lazima akukane mwenye, audori msalaba ku-u, na anidose. ²⁵ Kwa ite edumuishe kuokoa maisha ku-u eneyalahati, na kwa wowose elahati maisha ku-u kwa mburi gho eneyaokoa. ²⁶ He! ni faida mina enepata mhe ekupata dunia kabuna mira ekalahati maisha kuu? He Ni kigi mina enegu mhe he kubadirisha na maisha ku-u? ²⁷ Kwa ite M-inyi wakwe Adamu enelita he utukufu wakwe Aba ku-u na malaika ku-u. Nau enemriha kila mhe kuwesia na miboire ku-u. ²⁸ Kweri nimubaya helo vahali ve-umaye i-i tevekae gali kuga mpaka ho venemuahoya m-inyi wa Adamu ekulita he Udilao ku-u.