¹ He iaze ka Yesu ekahaka ang'a na kuzaa hema kakera ya bahari. ² Umati mgiru ukakusanyika kwa kumjunguluka, ekabuu za ya mtumbwi na kuzokodi za. Umati mkabuna uka-uma kakera ya bahari. ³ Halafu Yesu ekayo mburi kumure kwa mifano, Ebae, "Wesia, mzalha eesoe kulha. ⁴ Ekulha baazi ya mbeyu jikalhu kakera ya kwalhi na madeghe ekalita ekaji-a ⁵ Mbeyu hali jikalhu ana ya he isaheru, ambaho tejipatie mpulhe utosha. Gafla jikashuka kwaite mpulhe ne-e mghere. ⁶ Mira ka-aze kare li jikalhahawe kwaite tejeelo majindo, na jikahala. ⁷ Mbeyu hali jilhue hasi ya mihatu ilo milhae. mihatu ilo milhae ikakua ana ikaisonga. ⁸ Mbeyu halijikalhu he mpulhe mkulho na kusa mbeyu, hali kawe kagi igana iwe na zidi, Hali mirongo sita na hali mirongo mikai. ⁹ Elo malama na ako. ¹⁰ Vahina vekalita na kumba Yesu, "Kwa ahoni uyo na makutano kwa mifano?" ¹¹ Yesu ekajibu kuvaba, "mwa-owe upendeleo wa ku-ile siri ja udilao wa mbinguni, bali vo teveoiwe. ¹² Mira wowose elonacho, u eneongejwa zaidi, na enepata faida giru. mira isilo hata hu elo nachoenelawe. ¹³ Kwato niyo kwa mifano kwaite ingawa veaho, vasiaho kweri. Na ingawa veko vasiko kweri wala kuile. ¹⁴ Ulotezi wakwe Isaya waatimia hakini, hu ubao, "Mkuneko msiko, mira kwa namna yoyose temkaelewe; Halafu mkuaho mumuru kuaho, mira kwa namna yoyose msi-ile. ¹⁵ Na swaho ja vahe ya ya-akwa kidughu, ni vigumu kuko, na ghubika ma-ila kini, ili vasimuru kuaho kwa maila kini, kana kuko kwa malama kini, kana kuile kwa swaho kini, kwato vese nikiriiya wa na nesee va-uti. ¹⁶ Kwaite maila kaghu yelo keba, kwaite yeaho, na malama kaghu kwaite yeko. ¹⁷ Kweri nimubaya Valotezi vakumure na vahe velo haki ve-edumuishe kujiaho mburi ya jo muaho, na tevemuruye kuya-aho. Vetamanie kuko mburijo mko, tevekoe. ¹⁸ Kwato sikijani mfano wa mzalha. ¹⁹ Wakati wowose ekuko mburi ya udilao na asi-i-ile, niho mkusa elita na kulinyakua hu chilhaiwe za he swaho ku-u. Ya ni mbeyu hu ilhaiwe kakera he kwalhi. ²⁰ Ka elhaiwe he miamba ni hu ekoia mburi na kuidoria upesi kwa kinyemi. ²¹ Bado tenasa majindo kwa za ku-u, mira egumirija kwa kitambo bi kifuhi. He matatizo kana mateso yekulianya ka sababu ya mburi eku-konta ghafla. ²² Elhaiwe hasi ya mihatu ya milhae, ya ni hu ekoo mburi mira masumbuko ya idi na kutawe ni uzuri huisonga hu mburi lisee-za sa matunda. ²³ Elhaiwe he mpulhe mkulho, ya ni hu ekoo mburi na kuli-ile. Ya ni hu esaa matunda na kuendelea kusa iwe zaidi ya kagi miongo ikado, hali miongo sita, hali salasini." ²⁴ Yesu ekavao mfano mhali. ekuba, "Udilao wa mbinguni utotijwa na mhe elhaye mbeyu kulho he mbuva ku-u ²⁵ Mira vahe vare gontira , mnkru ku-u ekalita na u ekalha hasihasi ya ngano halafu ekaso ku-u. ²⁶ Baadae ngano ireli na kugu mazao ku-u, niho magugu yekali nayo. ²⁷ Na vanyamalo va mwenye mbuva vekalita vekam-baya, "Dilao, tulhae mbeyu kulho he mbuva ke? Ikwaemo iji lilo magugu? ²⁸ Ekavaba, Mnkru a-abo-i to, ' Vanyamalo vekamba, "kwato udumu tuso tuzeyang'ofula?" ²⁹ Mlo mbuva akaba, 'Hai, wakati mkune ng'ofula magughu mneng'ofula na ngano. ³⁰ Yaroni yalheru hawe mpaka wakati wa uluki. Wakati wa uluki nineyo na valuki, 'Bosi ya ng'ofuleni magughu na ya-oroni mafunge funge na kuyalhaha, mira kusanyani ngano he ghala gho." ³¹ Halafu Yesu ekavaguya mfano mhali. ekaba, "Udilao wa mbinguni ufanane na mbeyu ya haradali ambayo mhe ekuidori na kuilha he mbuva ku-u. ³² Mbeyu ya kwa hakika ni gitutukutaho mihatu kabuna he bustani, ukwa mhatu, kiasi ite madeghe ya ana yelita na kukwa vishasha he matambi ku-u. ³³ Ekavabaya mfano mhali wa. "Udilao wa mbinguni ni sa chachu hu idoriwe ni mlage na kuikwari he vipimo vikai he unga hadi viumuke. ³⁴ Kayo makabuna Yesu eya-yoe he umati kwa mifano. Na bila mifano teyoe nchochose hakini. ³⁵ Ya yeekwae ite chihejije kuyowe kutahoya mlotezi chimuru kulijanya, too areba, "Nneghubula m-o gho he mifano. Nineyo mburi jihejijwe kufiswa tangu misingi ya idi." ³⁶ Halafu Yesu ekavaro makutano na kuso ang'a. Vahini ku-u vekamsoya na kuba, "Tufafanu-iye mfano wamagughu ya hembuva. ³⁷ "Yesu ekavajibu na kuba, "Elhae mbeyu kulho ni M-inyi wa Adamu. ³⁸ Mbuva ni ulimwengu; na mbeyu kulho, ya ni vainyi va udilao. Magughu ni va-inyi va hu mkusa, na mnkuru ejilhae ni ibilisi. ³⁹ Na uluki ni mwisho wa ulimwengu, na valuki ni malaika. ⁴⁰ Sa hucho magughu cho yetutwa hawe na kulhahawe mwalha, ka nicho inekwa mwisho wa ulimwengu. ⁴¹ M-inyi wa Adamu enesugha malaika ku-u, na kututa kuli he udilao ku-u mburi jose jisababishe makusa na hu vebo-i yesiye. ⁴² venevabibi vakabuna he tanuru la mwalha, ambaho henekwa na kuzo na kusaga ma-iki. ⁴³ Niho vahe velo haki veneng'ara sa ka-aze he Udilao wa Aba kini. Ka elo malama na akoie. ⁴⁴ Udilao wa mbinguni ni sa hazina ifisiwe he mbuva. Mhe ekaiaho na kuifisa. He kinyemi ku-u ekaso kudi vikabuna e-elo navyo, na kuiwe mbuva. ⁴⁵ Kahali, udilao wa mbinguni ni sa mhe ebo-i biashara edaa lulu ilo samani. ⁴⁶ Ata areiaho hu ilo samani, ekaso ekadi kila kigi e-elo nacho na kuiwe. ⁴⁷ Udilao wa mbinguni ni sa nyavu iata za he bahari, na ite ituta viumbe vya kila aina. ⁴⁸ Ire-hu vavuvi vekahuru ufukweni. Halafu vekazokodi di vekaumbika vigi kikulho za he vikolhe, mira visilo samani vikabibiwe uda. ⁴⁹ Inekwa sa to he mwisho wa idi. Malaika venelita na kuvatenga vahe vakusa kuli he velo haki. ⁵⁰ Na kuvabibi za jhe tanuru ya mwalha, ambaho henekwa na maombolezo na kusaga ma-iki. ⁵¹ mwa-aile mburi kabuna ya? Vahini vekamjibu , "Ee." ⁵² Halafu Yesu ekavaba, "Kila mzagonda aakwa-a mhini he udilao efanane ne mzalo minda eguu kuli he hazina ku-u na vigi viku-a na vya kae. ⁵³ Irekwa Yesu arefi mifano mikabuna ka, ekahaka hodi ata. ⁵⁴ Halafu Yesu ekahe he mkoa ku-u na ekavahinisha vahe he sinagogi. matokeo ku-u ni ite vekakwa na lundolo na kuba, "Ni le ya mhe epatie viugho ya na miujiza yaa? ⁵⁵ Mhe ya sihu m-inyi wakwe seremala? Mariamu siu lage ku-u? Na vabahu ku-u sio Yakobo, Yusufu, Simoni ne Yuda? ⁵⁶ Na va wau ku-u tulo navo i-i hakanu? Basi mhe ya eyaguye le ya makabuna?". ⁵⁷ Ekavasanuija. mira Yesu ekavaba, "Mlotezi tekosa kukwa na heshima mira hakini na he idi kini. ⁵⁸ Na teze muru kuboi miujiza mikumure kwa ite teve-elo na imani na-u.