¹ Nnjonyi luvaha imwe vathuri, oronjokenyi vundu vwa vwathi vwamuchia. ² Vuthuri vwenyu vundekondwa, nguvo tdhenyu tdhindeliwa ni kathe. ³ Dhahabu yenyu na petha tdhenyu tdhinevura vughri na ikondeka yakwe yamuvwilia na iretdha miri yenyu hena moro. Mundekuvikia kihenge kyenyu kwa mifiri ichiye. ⁴ Lolienyi, mariho gha vahiri muranavaliha, vaya vakovie hena miremi yenyu vakyafugha, na kifughie kya vamukoverie kindefikia marwi gha Mndumi wa marivati. ⁵ Miikalie yenyu indeva yekondakonda mari na ikuchelelesha. Mundekung'anitha ngoo tdhenyu mukivera ichinjwa. ⁶ Mundenyamarisha na ivwagha aghire kitea arairima ivakela. ⁷ Hena ikyo vambwie, rimilienyi mpaka icha ya mndumi thafundu mgherema achivera mafindiko gha vufuri ifuma mbai na irimilia mpaka mwera wevokea na wemalilia kimo ukave. ⁸ Kangi imwe murimilie, vwarenyi ngoo tdhanyu ang'u icha ya Mndumi like haghwihi. ⁹ Vambwie, munadughushanya kimecha munachenyamurishwa. Kangi lolienyi, mchili mlangonyi. ¹⁰ Kwa mfano vambwie, lolienyi mabinuko na irimilia ya varoti varerie kwa rina ya mndumi. ¹¹ Lolienyi, vagherimilia vachiviwa, "Keba." Mundeichwa vundu Ayubu arimililie na kangi muichi vundu Mndumi alefurie hena mburi ya Ayubu, ni kwa njia njiki Mndumi aichue mbenea ikelele. ¹² Ikela vyoshe vambwie vakwa munararia kwa kaghu kana kwa mbai kana kwa kiraro kingi kyoshe. Mira "Yee" yenyu ive "Yee" na "Hai" netha munacheghwia hena inyamarishwa. ¹³ Haghire unywi aghire vwathi? Kyashigha alombe. Kana haghire umwi wenyu ashangalalie? Na abumije. ¹⁴ Aka lee, haghire i henaIimwe akyalwaa? Na ailaghe vaghothi va kanitha na vaghothi va kanitha vamlombie vakimfia mafura hena irina lya Mndumi, ¹⁵ Na malembo gha miirikilie ya Ruva ghamnura muwaji na Mndumi amvutdhira. Na kole ahirire thambi, Ruva amreghea. ¹⁶ Hena ikyo ungamenyi thambi tdhenyu imwe kwa imwe na ilombeana kila mndu na urwee netha munurwe. Ilombo lya mkitea lichighira matokeo marwe. ¹⁷ Elia nile mndu aghire madunganyo tha ifwe, alelombie kwa ndhinya iku mwera unakava na urakave hena ithanga kwa miaka iraru na miri mtandatu. ¹⁸ Na Elia akalomba he na kaghu ikakuta mwera kaghu ya ithanga na mbai ikafunya mafindiko. ¹⁹ Vambwie vakwa, kole umwi wenyu akareka njia hena ukweri mira mndu ungi akamvwighira, ²⁰ na akimanye iku, uya amtasha aghire thambi ivuka hena njia yakwe mbichwa, akira ngoo yakwe ifuma hena kiphwa na ishikia thambi fwaa.