¹ Na luvaha, vandughu, fuombeenyi ku kirero kya Mndumi kiirime ithathaa na ibumijwa tha fundu kike ipfho kwenyu. ² Lombenyi ku fuirime ikirwa ifuma hena vuvichwa na vandu vakondekie, kwaku thi voshe vaghire miirikilie michavo. ³ Mira mndumi ni mgheria mma, ngewe amumta imwe na imuria ifuma kwa uya mvichwa. ⁴ Fughire nguju hena Mndumi vundu vwenyu, ku mumwahira na mwaendelea ihira findo fiya fufwamuruma. ⁵ Mndumi airime ithongolea ngoo tenyu hena ifura na hena irimilia ya Kristo. ⁶ Luvaha fufwavaruma, ndughu, hena rina ya Mndumi Yesu Kristo, ku mutethie kila mndughu achiikaa miikalie ya vulethi thi ifumana na madikiro ngegho muondorie ifuma kweru. ⁷ Kwaku imwe mweka muichi ku ni kicha kwenyu ifuigha ifwe. Fuikee maghari yenyu fwe tha vandu varaghire adabu. ⁸ Na fulighie fwe kijo kya mndu vwia bila iliha. There kivio fuhirire ndima kio na mthaghari, na ndima nguji na kwa vwasi, kimacha funava tha mjigho kwa yoyoshe hena imwe. ⁹ Fuhirire kwii thiku fuleghire nguju fwe. There kwio fuhirire kwio kimacha fuve vagheighwa kwenyu, kimacha muirime ifuigha ifwe. ¹⁰ Ngeho fuleke hamwi na imwe fumurumie, "Kole umwi wenyu akyashigha ihira ndimawe, na anaya." ¹¹ Kwa ku fufwaichwa ku vengi vana mighendie ya vulethi maghari yenyu. Vakyahira ndima vo mira therekyo ni vandu varaghire miikalie. ¹² Luvaha ivo navo fufwaruma na ivapuchia hena Mndumi Yesu Kristo ku ni mithari vahire ndima hena mborere na iya kijo kyavo voka. ¹³ Mira imwe, vandughu, munamringilia mbeho mukihira fiya fikolokie. ¹⁴ Kole mndu wowoshe uya akyashigha we iivaria kirero kyeru hena barua i, mukutethie henawe na munavwarana hamwi nawe, kimacha airime iraghwa. ¹⁵ Munamlambua tha mntho, mira mrungenyi tha mndughu. ¹⁶ wa mborere we weka amunike mborere magheri ghoshe hena njia toshe. Mndumi aikae naimwe voshe. ¹⁷ Ili niyo iirikira yakwa Paulo, kwa kuvoko kwakwa njeka na luvengo hena kila barua. Kwii nifo ninaandika. ¹⁸ Mbora ya Mndumi weru Yesu Kristo iirime iikaa naimwe voshe.