¹ Paulo, muwopwa wa Kilisito Yesu, na mlongo Timoseo, tungumuyandikila Filemoni, mpalwa ghanja wa twenga na mghola lihengu pamonga na twenga, ² na kwa Afia mhacha wa twenga, na kwa Akipasi mtovangondu myetu, na kulipinga lila limkwinila Kilisito lyeni kukonganika ukaya kwa wenga. ³ Manemu yaweli kwa mwenga na kulikala kwa kukotoho kutovana kula kunguhuma kwa Sapanga Tati wa twenga na kwa Bambu Yesu Kilisito. ⁴ Lipindi lyogha ningumshukwile Sapanga,. Ningulikema lihina lyaku kumayupo ghangu. ⁵ Nihyoghanila upalo na ukwinila uwela nau ku Bambu Yesu na kwaikiva gha wakwinila wogha. ⁶ Ninguluwa yiwa mkongano wa Kiukwinila wa ukwinila wa mwenga uweli na uweso kuumanyi wa kila mghalu maha weni kuwela paghati gha twenga ku Kilisito. ⁷ Kwaikiva niwela na luheku na mbumulilo kwaikiva gha upalo ghako, kwaikiva mioyu gha wakwinila iwelili ikipongwa na wenga, mlongo. ⁸ Kwa nagha pamonga na yiwa niwela na makakala hyogha kukulongela wenga kughola kila ungukiwesa kukighola, ⁹ ila kwaikiva gha upalo badili ghaki ningukuluwa nenga Paulo, mwenikuwela mgogolo na hinaa ni muwopwa kwaikiva gha Kilisito Yesu. ¹⁰ Ningukulongela kwa hayu mwana ghangu Onesimo, nimlela kuvifungu vya nenga. ¹¹ Kwaikiva haku dahili awelili ng'ogha maha, ila hinaa wa maha kwa wenga na nenga. ¹² Nimyegha mweni mwenikuwela wa moyu ghangu chakaka ahiki kangi kwa wenga. ¹³ Ninguliwachila angaliyendelela kuhighala pamonga na nenga, ili anitumikili badili gha wenga, lipindi paniwela mukihungu kwaikiva gha Habali Maha. ¹⁴ Ila nipala ng''ogha kughola mghalu wowosi bila luhusa ghaku. Nigholile nagha ili mghalu wowosi wa Maha ukotoho kugholeka kwaikiva nikulasimisa, ila kwaikiva upalile mweni kughola. ¹⁵ Labuda ni kwaikiva avikilwi weka na wenga kwa lipindi, iwelili nagha ili uweli pamonga na mweni machuwa yayendelela. ¹⁶ Ili akotoho kuwela kangi mhusutuna, ila maha kupiti mhusutu, handa mlongo mpalwa, nesu nesu, kwa nenga, na nesu kupiti ni kwa wenga, kuhigha na ku Bambu. ¹⁷ Na paikawela unguniwachila nenga ni mkwinila, umpokeli handa vila ungalinipokela nenga. ¹⁸ Ila paikawela kakukosela mghalu wowosi, au kana chochosi kukuhipa wenga, ukilidili haki kuhuma kwa nenga. ¹⁹ Nenga Paulo ninguyandika kwa liwoko gha nenga mweni, nenga nitekuhipa. Ningulonga ng'ogha kwa wenga yiwa utenihipa kulama kwa wenga kogha. ²⁰ Hina mlongo uleki mbati luheku lwa Bambu kuhuma kwa wenga, uuhekelesi moyu ghangu ku Kilisito. ²¹ Panikawela na imani kulongela utundamilu ghako, ningukuyandikila kunu nikimanya yiwa uteghola kupiti vila ningukuluwa. ²² Lipindi halihali uyandali kyumba kya wahenja kwaikiva gha nenga, kwaikiva ningutumaini kupitila mayupo ghako nitekutyangilila machuwa gha pabehi. ²³ Epafula muwopwa muyangu ku Kilisito Yesu angukujambusa, ²⁴ na handa vila aigholile Maliko, Alisitako, Dema, Luka, waghola lihengu pamonga na nenga. ²⁵ Manemu gha Bambu Yesu Kilisito yaweli pamonga na mpumulo wa wenga. Hina.