¹ Yuda, mhutusutu wa Yesu Kilisito na mwenikuwela mlongu ghaki Yakobu, kwa wala weni kukemwa na weni kupalwa na Tati Sapanga na wenikuyandalwa kwaikiva gha Yesu Kilisito. ² Luhungu na upalo wa viyongeswi kwa mwenga. ³ Wapalwa, lipindi paniwelili nikiyangala kuwayandikila mwenga ghala yalongela ulokola wa twenga wogha, inipalili kuwayandikila ili kuwalongela msindanile kwa chakaka ukwinila hula weni kuyeghwa kwa twenga kwa lihanja limonga hela kwa wakwinila. ⁴ Kwaikiva wandu watenu wajiyingisa kwa kujihigha kwa mwenga wandu hagha wawelili wavikwa vilangihi kwaikiva gha kulamulwa, wandu weni kuwela ng'ogha watumikila wa Sapanga na weni kughalambula manemu gha Sapanga wa twenga na kuwoneka kindu maha ng'ogha, na kumkanila Bambu wa twenga wa weka na Bambu Yesu Kilisito. ⁵ Hinaa ningupala kuwakumbusila mwenga pamonga na yiwa kuwelili na lipindi mwenga mkamanya yiwa Bambu awalokolili wandu kuhuma mlima wa Misilii, ila kuulongolo kuwayalamisa wala weni kukwinila ng'ogha. ⁶ Na Watumikila wa Sapanga weni kusindwa kuygholokela lipindi lyau weni ila wakaleka kaya ghau chakaka, Sapanga kawavika kuminyololu gha machuwa yayendelela na mghati gha lwisa, kwaikiva gha ulamulo wa lichuwa lila likulu. ⁷ Handa vila Sodoma na Gomola na milima yeni kutindila , yeni kujiyingisa kweni hilahila kungongola na wakakovekela lumatamata lweni kuwela lwa weni ng'ogha. Wawonesilwi handa milandanu gha wala weni kughasika kuulamulo gha liloto lya machuwa yayendelela. ⁸ Hilahila kwa njila haihai weni kulota ndotu hagha hilahila wanguvika ndaka mihigha ghau, na wangulema ulongosi, na wangumkupikila mkwilikihi. ⁹ Hilahila hata mtumikila mkulu wa Sapanga mweni kukemwa, lipindi pakawela akisindana na lihyukana na kukonyana nayu kwaikiva gha mhigha wa Musa, kayesa ng'ogha kuyegha ulamulo wa uhwangi kwa mweni, ila badili ghaki ailongile, ''Bambu akukemeli!'' ¹⁰ Ila wandu hagha wanguyegha uhwangi wa chochosi wakimanya ng'ogha. Na kila wakimanya ng'ogha - kila kivile mikokolu ivile ng'ogha na malangu ingumanya kwa ndyangilu ghau- hagha ndiwa yawabyodosa. ¹¹ Chondi kwa weni! kwaikiva watyangila kunjila gha Kaini, na kukovekela uhakata wa Baalamu. Wayalamika kuuhakata wa Kora. ¹² Hagha ndiwa mighomba kumihambu gha mwenga gha upalu, wakihina kwa kuwela ng'ogha na honi, wakilyegha weni hela. Ni mahindu yawela ng'ogha na masi, yeni kupapwa na liyegha, ni mibiki yeni kulaghala na kuwela ng'ogha na matungula na yeni kuhova lihanja lya ivili, yeni kutupulwa mikegha. ¹³ Ni mawimbi gha kubahali yeni lilowi yakihumisa honi ghau weni, Ni ndondwa zyeni kuyelejayeleja na kughola mbile gha lwisa uvikwa kwaikiva gha weni machuwa yayendelela. ¹⁴ Enoko, wa isaba kumnyololu wa Adamu, alotili ghala yatewahumila weni, akilonga, ''Uloli! Bambu anguhika na maielufu kwa maielufu gha wahaghulwa ghaki, ¹⁵ ili agholi ulamulo kwa kila mundu, na kuvika masitaka wogha weni kumkwinila ng'ogha Sapanga kwa ghala matendu ghau hyogha wayagholile kunjila ziwela ng'ogha zya kiutumikila gha Sapanga, na kwa milando hyogha gha ukalipa ivile wala wogha wawela ng'ogha watumikila wa Sapanga wamlongelelela.'' ¹⁶ Hagha ni wala wenikung'ung'ulika, weni kuitutumula nesu, hagha kwa kupala manemu wangughola kuwangonga waghangi. ¹⁷ Ila mwenga, wapalwa, mkumbwike milando ivile ilongwa wachuva yayendili na wandumindumi wa Bambu Yesu Kilisito. ¹⁸ Wailongile kwa mwenga, '''Kulipindi lya kumwihu kutewela na wandu weni kupughanya weni kukovekela lumatamata lwau lweni kuwela ng'ogha wa kiutumikila.'' ¹⁹ Wandu hagha ni weni kulekanisa, wangulongoswa na lumatamata lwa ndyangilu ghau, na wawela ng'ogha na Mpumulo. ²⁰ Ila mwenga, wapalwa, handa vila mngujichenga kuukwinila wa mwenga weni kuhaghulwa na Sapanga, na handa vila mnguyupa kumpumulo yula mweni kuwahaghula, ²¹ mjiviki kuupalo wa Sapanga, na mlindili luhungu lwa Bambu wa twenga Yesu Kilisito luvile lunguwapatila ukomu wa machuwa yayendelela. ²² Mulangihi luhungu kwa wala weni kuwajumila ng'ogha. ²³ Muwalokoli waghangi kwa kuwanyakula kuhuma kulyoto. Kwa waghangi mlangihi luhungu kwa holu, mkihyomela hata nguu yeni kuvikwa lidowa na mhigha. ²⁴ Hinaa kwa hayu mweni kuwagholokela mkotoho kulikwala, na kuwaghola mgholoki kuulongolo gha ukwilikihi ghaki, kwa kuwela ng'ogha na lipingilo na kuwela na luheku lukulu, ²⁵ kwa mweni Sapanga wa weka mlokola kupitila Yesu Kilisito Bambu wa twenga, ukwilikihi uweli kwa mweni, ukulu, uwesu na makakala pambila gha lipindi lyogha, na hinaa na hata machuwa yayendelela. Hina.