¹ Pawolo mbanda wa Yesu Kristu, wakukemeleka apostolo, wakupatuliwa kwa evangeli ya Mulungu. ² Yila akalagini palongolo pa wakulweta wake, pa malembo mawalafu. ³ Ya mwana mundu uyu, akahogoliki kuhuma lukolo lwa Daudi; kwa ndingo wa mbeii. ⁴ Na yombe akapatuliwi mwana wa Mulungu ni mbafu, kwa ndingo wa roho ya uwalafu, pa kusyuka kwa wakufwa; yuyu Yesu Kristo Bambo witu. ⁵ Pa yula tikayupiti neema nu uapostolo, kwa kuyufwanila kiyitakiso pa mihuku yoha, ndawa ya lihina lyake. ⁶ Pa wala mwenga namu muyii wakukemeleka wake Yesu Kristo. ⁷ Kwa woha wala wayii pa Lumi, wakuganika nu Mulungu wakukemeleka wawalafu; neema kwinu ni kindamba kuhuma pa Mulungu Dadi witu nu Bambo Yesu Kristo. ⁸ Pakutumbula ninsengusa Mulungu wangu pa Yesu Kristo ndawa ya mwenga mwawoha, kukita kiyitakiso kinu kiwandasika pohapoha pa ndima woha. ⁹ Pakuya Mulungu ayii ndungamakiso wangu, yula nimhengele pa roho wangu pa evangeli ya mwana mundu, umu nenga nukukotoka lepa kuluwula mwenga. ¹⁰ Magono goha pa maluwo gangu kiluwile, pangi hino kwali yanipatile mwanja unofu kuhicha kwinu pa kilonda kyake Mulungu. ¹¹ Pakuya nigana muni kuwawona mwenga nausi niwapele kiyetulo kya neema kya roho, nausi mutamasike. ¹² Kila kukita nenga pamonga na mwenga ninyamasike pa mwenga, ayii yoha pa kiyitakiso kya njini, kya mwenga ni kya nenga. ¹³ Koma nilonda lepa muye wangali kumanya walongo, kukita kawili kawili nikapangiti luhala kuhicha kwinu (ni nikasiliwasiki mpaka hino) nausi niye ni kipambiko kingi pa mwenga, kawili ngati pa mihuku wangi kawili. ¹⁴ Niyii ni nsigilo kwa Wagiliki ni kwa wakuweweta kawili, kwa wene malango ni kwa wangali malango kawili. ¹⁵ Mumu umu nihotolela niyii tayari kuwandisa evangeli kwa mwenga kawili muyii pa Lumi. ¹⁶ Pakuya niwona lihamu lepa pa evangeli, ndawa yiyii makakala ga Mulungu kwa kuyokola ayii yoha yaukela kikelike kwa Myahudi pakutumbula ni kwa Mgiliki kawili. ¹⁷ Ndawa ya yila ugolofu wake Mulungu ufunukulika pa kiyitakiso mpaka kiyitakiso; umu yilembikili leka wagolofu yawalame pa kiyitakiso. ¹⁸ Ndawa kudada kwake Mulungu kufunukulika kuhumila kunani pa unya mitafu yoha ni uwifu wa wandu wala wasiwilisika fya chankaka pa wifu. ¹⁹ Ndawa kila kimanyike pa Mulungu kilasika pa wombe; pakuya Mulungu akakilasiti kwawe. ²⁰ Pakuya fila fyangawoneka fya yombe kitumbulile kuupanga ndima fiwonakila ngani, kuholakaseka pa fila fyapangiki, sisi mbafu syake sya miaka yoha ni uMulungu wake, kukita waye wangali ni kigwalilo. ²¹ Ndawa wombe kummanya Mulungu, wankwisiti lepa ngati Mulungu wansengwisi lepa; koma wakitiki mfuki wa waka pa maholo gawe, ni mwoyo wawe wangali malango ukalekaliki lwisi. ²³ Pa kwiwalanga wene malango wakitiki wahimu. ²² Ni wakang'anamwili kukwisika kwake Mulungu wangawola kuya kihwanakiso kya kifwilifwili kya mundu wakuwola, ni kya fidege ni kya nyama sya maulu ncheche, ni kya fya kukuwala. ²⁴ Mumu Mulungu akawafumbukisi pa manyonyelo ga pa mioyo yawe pa uwafu, kukita miwili yawe yiwe yanganginikika na wayawe. ²⁵ Na wombe wafing'anamusa fya chankaka, fya Mulungu kwa mageya ni wakagwilikimbo ni kutumakila kapangiko kulutila wakukapanga uyu ayii wakupelewa kihomo miaka ni mika. Amina ²⁶ Kwa ndawa iyi Mulungu akawafumbukisi pa manyonyelo mawifu; pakuya wadada wawe wakang'anamwisi kutumila kwa matamilo gawe kwa kupindika mawikiko. ²⁷ Na kawili wiwi wagosi kukela kutumila kwa matamilo ga ndala, wakosanilaga pa manyonyelo yungi kwa njini, ngosi pa ngosi kukitila uwafu ni kuyupa mugati mwawe njombe ya mahoko gawe yila yakawalinganili. ²⁸ Ni umu wakabeliti kuya nako Mulungu pa kumanya Mulungu akawafumbukisi pa mwoyo uwifu, kukita fila fyanganogela. ²⁹ Wakumema ni uwiu woha, usokosi, lunyonyelo, kuwipa, wakumena nu kuwinu mwoyo kusyangala, kutumbulana, kukongana, kwiwipisa mikuwa, wakupwepwelela; ³⁰ wa luheku, wauwipalika nu Mulungu wa mihenje wa kinywinda wa kwihikalila, wakupanga malango mawifu, wangali kuwayufwana wakuhogola wawe; ³¹ nu kuya na malango wakukidumula kilago, wangali kuholalela wangali lukolo. ³² Wala na wombe wakumanyila ngani lipaulo lyake Mulungu, kukita wala wakitaga fya ntundu uwu walinganila kufwa, wafikita lepa ifi waka, koma wayitisingana kawili na wala wafikitaga.